౩౭. సల్లేఖట్ఠఞాణనిద్దేసో

౮౮. కథం పుథునానత్తేకత్తతేజపరియాదానే పఞ్ఞా సల్లేఖట్ఠే [పుథునానత్తేకత్తతేజపరియాదానే (క.)] ఞాణం? పుథూతి – రాగో పుథు, దోసో పుథు, మోహో పుథు, కోధో…పే… ఉపనాహో… మక్ఖో… పళాసో… ఇస్సా… మచ్ఛరియం… మాయా… సాఠేయ్యం… థమ్భో… సారమ్భో… మానో… అతిమానో… మదో… పమాదో… సబ్బే కిలేసా… సబ్బే దుచ్చరితా… సబ్బే అభిసఙ్ఖారా… సబ్బే భవగామికమ్మా.

నానత్తేకత్తన్తి కామచ్ఛన్దో నానత్తం, నేక్ఖమ్మం ఏకత్తం. బ్యాపాదో నానత్తం, అబ్యాపాదో ఏకత్తం. థినమిద్ధం నానత్తం, ఆలోకసఞ్ఞా ఏకత్తం. ఉద్ధచ్చం నానత్తం, అవిక్ఖేపో ఏకత్తం. విచికిచ్ఛా నానత్తం, ధమ్మవవత్థానం ఏకత్తం. అవిజ్జా నానత్తం, ఞాణం ఏకత్తం. అరతి నానత్తం, పామోజ్జం ఏకత్తం. నీవరణా నానత్తం, పఠమం ఝానం ఏకత్తం…పే… సబ్బే కిలేసా నానత్తం, అరహత్తమగ్గో ఏకత్తం.

తేజోతి పఞ్చ తేజా – చరణతేజో, గుణతేజో, పఞ్ఞాతేజో, పుఞ్ఞతేజో, ధమ్మతేజో. చరణతేజేన తేజితత్తా దుస్సీల్యతేజం పరియాదియతి. గుణతేజేన తేజితత్తా అగుణతేజం పరియాదియతి. పఞ్ఞాతేజేన తేజితత్తా దుప్పఞ్ఞతేజం పరియాదియతి. పుఞ్ఞతేజేన తేజితత్తా అపుఞ్ఞతేజం పరియాదియతి. ధమ్మతేజేన తేజితత్తా అధమ్మతేజం పరియాదియతి.

సల్లేఖోతి కామచ్ఛన్దో అసల్లేఖో, నేక్ఖమ్మం సల్లేఖో. బ్యాపాదో అసల్లేఖో, అబ్యాపాదో సల్లేఖో. థినమిద్ధం అసల్లేఖో, ఆలోకసఞ్ఞా సల్లేఖో. ఉద్ధచ్చం అసల్లేఖో, అవిక్ఖేపో సల్లేఖో. విచికిచ్ఛా అసల్లేఖో, ధమ్మవవత్థానం సల్లేఖో. అవిజ్జా అసల్లేఖో, ఞాణం సల్లేఖో. అరతి అసల్లేఖో, పామోజ్జం సల్లేఖో. నీవరణా అసల్లేఖో, పఠమం ఝానం సల్లేఖో…పే… సబ్బకిలేసా అసల్లేఖో, అరహత్తమగ్గో సల్లేఖో. తం ఞాతట్ఠేన ఞాణం, పజాననట్ఠేన పఞ్ఞా. తేన వుచ్చతి – ‘‘పుథునానత్తతేజపరియాదానే పఞ్ఞా సల్లేఖట్ఠే ఞాణం’’.

సల్లేఖట్ఠఞాణనిద్దేసో సత్తతింసతిమో.