౩౬. సమసీసట్ఠఞాణనిద్దేసో

౮౭. కథం సబ్బధమ్మానం సమ్మా సముచ్ఛేదే నిరోధే చ అనుపట్ఠానతా పఞ్ఞా సమసీసట్ఠే ఞాణం? సబ్బధమ్మానన్తి – పఞ్చక్ఖన్ధా, ద్వాదసాయతనాని, అట్ఠారస ధాతుయో, కుసలా ధమ్మా, అకుసలా ధమ్మా, అబ్యాకతా ధమ్మా, కామావచరా ధమ్మా, రూపావచరా ధమ్మా, అరూపావచరా ధమ్మా, అపరియాపన్నా ధమ్మా. సమ్మా సముచ్ఛేదేతి నేక్ఖమ్మేన కామచ్ఛన్దం సమ్మా సముచ్ఛిన్దతి. అబ్యాపాదేన బ్యాపాదం సమ్మా సముచ్ఛిన్దతి. ఆలోకసఞ్ఞాయ థినమిద్ధం సమ్మా సముచ్ఛిన్దతి. అవిక్ఖేపేన ఉద్ధచ్చం సమ్మా సముచ్ఛిన్దతి. ధమ్మవవత్థానేన విచికిచ్ఛం సమ్మా సముచ్ఛిన్దతి. ఞాణేన అవిజ్జం సమ్మా సముచ్ఛిన్దతి. పామోజ్జేన అరతిం సమ్మా సముచ్ఛిన్దతి. పఠమేన ఝానేన నీవరణే సమ్మా సముచ్ఛిన్దతి…పే… అరహత్తమగ్గేన సబ్బకిలేసే సమ్మా సముచ్ఛిన్దతి.

నిరోధేతి నేక్ఖమ్మేన కామచ్ఛన్దం నిరోధేతి. అబ్యాపాదేన బ్యాపాదం నిరోధేతి. ఆలోకసఞ్ఞాయ థినమిద్ధం నిరోధేతి. అవిక్ఖేపేన ఉద్ధచ్చం నిరోధేతి. ధమ్మవవత్థానేన విచికిచ్ఛం నిరోధేతి. ఞాణేన అవిజ్జం నిరోధేతి. పామోజ్జేన అరతిం నిరోధేతి. పఠమేన ఝానేన నీవరణే నిరోధేతి…పే… అరహత్తమగ్గేన సబ్బకిలేసే నిరోధేతి.

అనుపట్ఠానతాతి నేక్ఖమ్మం పటిలద్ధస్స కామచ్ఛన్దో న ఉపట్ఠాతి. అబ్యాపాదం పటిలద్ధస్స బ్యాపాదో న ఉపట్ఠాతి. ఆలోకసఞ్ఞం పటిలద్ధస్స థినమిద్ధం న ఉపట్ఠాతి. అవిక్ఖేపం పటిలద్ధస్స ఉద్ధచ్చం న ఉపట్ఠాతి. ధమ్మవవత్థానం పటిలద్ధస్స విచికిచ్ఛా న ఉపట్ఠాతి. ఞాణం పటిలద్ధస్స అవిజ్జా న ఉపట్ఠాతి. పామోజ్జం పటిలద్ధస్స అరతి న ఉపట్ఠాతి. పఠమం ఝానం పటిలద్ధస్స నీవరణా న ఉపట్ఠహన్తి…పే… అరహత్తమగ్గం పటిలద్ధస్స సబ్బకిలేసా న ఉపట్ఠహన్తి.

సమన్తి కామచ్ఛన్దస్స పహీనత్తా నేక్ఖమ్మం సమం. బ్యాపాదస్స పహీనత్తా అబ్యాపాదో సమం. థినమిద్ధస్స పహీనత్తా ఆలోకసఞ్ఞా సమం. ఉద్ధచ్చస్స పహీనత్తా అవిక్ఖేపో సమం. విచికిచ్ఛాయ పహీనత్తా ధమ్మవవత్థానం సమం. అవిజ్జాయ పహీనత్తా ఞాణం సమం. అరతియా పహీనత్తా పామోజ్జం సమం. నీవరణానం పహీనత్తా పఠమం ఝానం సమం…పే… సబ్బకిలేసానం పహీనత్తా అరహత్తమగ్గో సమం.

సీసన్తి తేరస సీసాని – పలిబోధసీసఞ్చ తణ్హా, వినిబన్ధనసీసఞ్చ మానో, పరామాససీసఞ్చ దిట్ఠి, విక్ఖేపసీసఞ్చ ఉద్ధచ్చం, సంకిలేససీసఞ్చ అవిజ్జా, అధిమోక్ఖసీసఞ్చ సద్ధా, పగ్గహసీసఞ్చ వీరియం, ఉపట్ఠానసీసఞ్చ సతి, అవిక్ఖేపసీసఞ్చ సమాధి, దస్సనసీసఞ్చ పఞ్ఞా, పవత్తసీసఞ్చ జీవితిన్ద్రియం, గోచరసీసఞ్చ విమోక్ఖో, సఙ్ఖారసీసఞ్చ నిరోధో. తం ఞాతట్ఠేన ఞాణం, పజాననట్ఠేన పఞ్ఞా. తేన వుచ్చతి – ‘‘సబ్బధమ్మానం సమ్మా సముచ్ఛేదే నిరోధే చ అనుపట్ఠానతా పఞ్ఞా సమసీసట్ఠే ఞాణం’’.

సమసీసట్ఠఞాణనిద్దేసో ఛత్తింసతిమో.