౩౫. పరినిబ్బానఞాణనిద్దేసో

౮౬. కథం సమ్పజానస్స పవత్తపరియాదానే పఞ్ఞా పరినిబ్బానే ఞాణం? ఇధ సమ్పజానో నేక్ఖమ్మేన కామచ్ఛన్దస్స పవత్తం పరియాదియతి, అబ్యాపాదేన బ్యాపాదస్స పవత్తం పరియాదియతి, ఆలోకసఞ్ఞాయ థినమిద్ధస్స పవత్తం పరియాదియతి, అవిక్ఖేపేన ఉద్ధచ్చస్స పవత్తం పరియాదియతి, ధమ్మవవత్థానేన విచికిచ్ఛాయ…పే… ఞాణేన అవిజ్జాయ… పామోజ్జేన అరతియా … పఠమేన ఝానేన నీవరణానం పవత్తం పరియాదియతి…పే… అరహత్తమగ్గేన సబ్బకిలేసానం పవత్తం పరియాదియతి.

అథ వా పన సమ్పజానస్స అనుపాదిసేసాయ నిబ్బానధాతుయా పరినిబ్బాయన్తస్స ఇదఞ్చేవ చక్ఖుపవత్తం పరియాదియతి, అఞ్ఞఞ్చ చక్ఖుపవత్తం న ఉప్పజ్జతి. ఇదఞ్చేవ సోతపవత్తం…పే… ఘానపవత్తం… జివ్హాపవత్తం… కాయపవత్తం… మనోపవత్తం పరియాదియతి, అఞ్ఞఞ్చ మనోపవత్తం న ఉప్పజ్జతి. ఇదం సమ్పజానస్స పవత్తపరియాదానే పఞ్ఞా పరినిబ్బానే ఞాణం. తం ఞాతట్ఠేన ఞాణం, పజాననట్ఠేన పఞ్ఞా. తేన వుచ్చతి – ‘‘సమ్పజానస్స పవత్తపరియాదానే పఞ్ఞా పరినిబ్బానే ఞాణం’’.

పరినిబ్బానఞాణనిద్దేసో పఞ్చతింసతిమో.