౨౯-౩౧. ఞాణత్తయనిద్దేసో

౭౮. కథం విహారనానత్తే పఞ్ఞా విహారట్ఠే ఞాణం, సమాపత్తినానత్తే పఞ్ఞా సమాపత్తట్ఠే ఞాణం, విహారసమాపత్తినానత్తే పఞ్ఞా విహారసమాపత్తట్ఠే ఞాణం? నిమిత్తం భయతో సమ్పస్సమానో అనిమిత్తే అధిముత్తత్తా ఫుస్స ఫుస్స వయం పస్సతి – అనిమిత్తో విహారో. పణిధిం భయతో సమ్పస్సమానో అప్పణిహితే అధిముత్తత్తా ఫుస్స ఫుస్స వయం పస్సతి – అప్పణిహితో విహారో. అభినివేసం భయతో సమ్పస్సమానో సుఞ్ఞతే అధిముత్తత్తా ఫుస్స ఫుస్స వయం పస్సతి – సుఞ్ఞతో విహారో.

నిమిత్తం భయతో సమ్పస్సమానో అనిమిత్తే అధిముత్తత్తా పవత్తం అజ్ఝుపేక్ఖిత్వా నిరోధం నిబ్బానం అనిమిత్తం ఆవజ్జిత్వా సమాపజ్జతి – అనిమిత్తా సమాపత్తి. పణిధిం భయతో సమ్పస్సమానో అప్పణిహితే అధిముత్తత్తా పవత్తం అజ్ఝుపేక్ఖిత్వా నిరోధం నిబ్బానం అప్పణిహితం ఆవజ్జిత్వా సమాపజ్జతి – అప్పణిహితా సమాపత్తి. అభినివేసం భయతో సమ్పస్సమానో సుఞ్ఞతే అధిముత్తత్తా పవత్తం అజ్ఝుపేక్ఖిత్వా నిరోధం నిబ్బానం సుఞ్ఞతం ఆవజ్జిత్వా సమాపజ్జతి – సుఞ్ఞతా సమాపత్తి.

నిమిత్తం భయతో సమ్పస్సమానో అనిమిత్తే అధిముత్తత్తా ఫుస్స ఫుస్స వయం పస్సతి, పవత్తం అజ్ఝుపేక్ఖిత్వా నిరోధం నిబ్బానం అనిమిత్తం ఆవజ్జిత్వా సమాపజ్జతి – అనిమిత్తవిహారసమాపత్తి. పణిధిం భయతో సమ్పస్సమానో అప్పణిహితే అధిముత్తత్తా ఫుస్స ఫుస్స వయం పస్సతి, పవత్తం అజ్ఝుపేక్ఖిత్వా నిరోధం నిబ్బానం అప్పణిహితం ఆవజ్జిత్వా సమాపజ్జతి – అప్పణిహితవిహారసమాపత్తి. అభినివేసం భయతో సమ్పస్సమానో సుఞ్ఞతే అధిముత్తత్తా ఫుస్స ఫుస్స వయం పస్సతి, పవత్తం అజ్ఝుపేక్ఖిత్వా నిరోధం నిబ్బానం సుఞ్ఞతం ఆవజ్జిత్వా సమాపజ్జతి – సుఞ్ఞతవిహారసమాపత్తి.

౭౯. రూపనిమిత్తం భయతో సమ్పస్సమానో అనిమిత్తే అధిముత్తత్తా ఫుస్స ఫుస్స వయం పస్సతి – అనిమిత్తో విహారో. రూపపణిధిం భయతో సమ్పస్సమానో అప్పణిహితే అధిముత్తత్తా ఫుస్స ఫుస్స వయం పస్సతి – అప్పణిహితో విహారో. రూపాభినివేసం భయతో సమ్పస్సమానో సుఞ్ఞతే అధిముత్తత్తా ఫుస్స ఫుస్స వయం పస్సతి – సుఞ్ఞతో విహారో.

రూపనిమిత్తం భయతో సమ్పస్సమానో అనిమిత్తే అధిముత్తత్తా పవత్తం అజ్ఝుపేక్ఖిత్వా నిరోధం నిబ్బానం అనిమిత్తం ఆవజ్జిత్వా సమాపజ్జతి – అనిమిత్తా సమాపత్తి. రూపపణిధిం భయతో సమ్పస్సమానో అప్పణిహితే అధిముత్తత్తా పవత్తం అజ్ఝుపేక్ఖిత్వా నిరోధం నిబ్బానం అప్పణిహితం ఆవజ్జిత్వా సమాపజ్జతి – అప్పణిహితా సమాపత్తి. రూపాభినివేసం భయతో సమ్పస్సమానో సుఞ్ఞతే అధిముత్తత్తా పవత్తం అజ్ఝుపేక్ఖిత్వా నిరోధం నిబ్బానం సుఞ్ఞతం ఆవజ్జిత్వా సమాపజ్జతి – సుఞ్ఞతా సమాపత్తి.

రూపనిమిత్తం భయతో సమ్పస్సమానో అనిమిత్తే అధిముత్తత్తా ఫుస్స ఫుస్స వయం పస్సతి, పవత్తం అజ్ఝుపేక్ఖిత్వా నిరోధం నిబ్బానం అనిమిత్తం ఆవజ్జిత్వా సమాపజ్జతి – అనిమిత్తవిహారసమాపత్తి. రూపపణిధిం భయతో సమ్పస్సమానో అప్పణిహితే అధిముత్తత్తా ఫుస్స ఫుస్స వయం పస్సతి, పవత్తం అజ్ఝుపేక్ఖిత్వా నిరోధం నిబ్బానం అప్పణిహితం ఆవజ్జిత్వా సమాపజ్జతి – అప్పణిహితవిహారసమాపత్తి. రూపాభినివేసం భయతో సమ్పస్సమానో సుఞ్ఞతే అధిముత్తత్తా ఫుస్స ఫుస్స వయం పస్సతి, పవత్తం అజ్ఝుపేక్ఖిత్వా నిరోధం నిబ్బానం సుఞ్ఞతం ఆవజ్జిత్వా సమాపజ్జతి – సుఞ్ఞతవిహారసమాపత్తి.

వేదనానిమిత్తం …పే… సఞ్ఞానిమిత్తం… సఙ్ఖారనిమిత్తం… విఞ్ఞాణనిమిత్తం… చక్ఖునిమిత్తం…పే… జరామరణనిమిత్తం భయతో సమ్పస్సమానో అనిమిత్తే అధిముత్తత్తా ఫుస్స ఫుస్స వయం పస్సతి – అనిమిత్తో విహారో. జరామరణపణిధిం భయతో సమ్పస్సమానో అప్పణిహితే అధిముత్తత్తా ఫుస్స ఫుస్స వయం పస్సతి – అప్పణిహితో విహారో. జరామరణాభినివేసం భయతో సమ్పస్సమానో సుఞ్ఞతే అధిముత్తత్తా ఫుస్స ఫుస్స వయం పస్సతి – సుఞ్ఞతో విహారో.

జరామరణనిమిత్తం భయతో సమ్పస్సమానో అనిమిత్తే అధిముత్తత్తా పవత్తం అజ్ఝుపేక్ఖిత్వా నిరోధం నిబ్బానం అనిమిత్తం ఆవజ్జిత్వా సమాపజ్జతి – అనిమిత్తా సమాపత్తి. జరామరణపణిధిం భయతో సమ్పస్సమానో అప్పణిహితే అధిముత్తత్తా పవత్తం అజ్ఝుపేక్ఖిత్వా నిరోధం నిబ్బానం అప్పణిహితం ఆవజ్జిత్వా సమాపజ్జతి – అప్పణిహితా సమాపత్తి. జరామరణాభినివేసం భయతో సమ్పస్సమానో సుఞ్ఞతే అధిముత్తత్తా పవత్తం అజ్ఝుపేక్ఖిత్వా నిరోధం నిబ్బానం సుఞ్ఞతం ఆవజ్జిత్వా సమాపజ్జతి – సుఞ్ఞతా సమాపత్తి.

జరామరణనిమిత్తం భయతో సమ్పస్సమానో అనిమిత్తే అధిముత్తత్తా ఫుస్స ఫుస్స వయం పస్సతి, పవత్తం అజ్ఝుపేక్ఖిత్వా నిరోధం నిబ్బానం అనిమిత్తం ఆవజ్జిత్వా సమాపజ్జతి – అనిమిత్తవిహారసమాపత్తి. జరామరణపణిధిం భయతో సమ్పస్సమానో అప్పణిహితే అధిముత్తత్తా ఫుస్స ఫుస్స వయం పస్సతి, పవత్తం అజ్ఝుపేక్ఖిత్వా నిరోధం నిబ్బానం అప్పణిహితం ఆవజ్జిత్వా సమాపజ్జతి – అప్పణిహితవిహారసమాపత్తి. జరామరణాభినివేసం భయతో సమ్పస్సమానో సుఞ్ఞతే అధిముత్తత్తా ఫుస్స ఫుస్స వయం పస్సతి, పవత్తం అజ్ఝుపేక్ఖిత్వా నిరోధం నిబ్బానం సుఞ్ఞతం ఆవజ్జిత్వా సమాపజ్జతి – సుఞ్ఞతవిహారసమాపత్తి. అఞ్ఞో అనిమిత్తో విహారో, అఞ్ఞో అప్పణిహితో విహారో, అఞ్ఞో సుఞ్ఞతో విహారో. అఞ్ఞా అనిమిత్తసమాపత్తి, అఞ్ఞా అప్పణిహితసమాపత్తి, అఞ్ఞా సుఞ్ఞతసమాపత్తి. అఞ్ఞా అనిమిత్తా విహారసమాపత్తి, అఞ్ఞా అప్పణిహితా విహారసమాపత్తి, అఞ్ఞా సుఞ్ఞతా విహారసమాపత్తి. తం ఞాతట్ఠేన ఞాణం, పజాననట్ఠేన పఞ్ఞా. తేన వుచ్చతి – ‘‘విహారనానత్తే పఞ్ఞా విహారట్ఠే ఞాణం, సమాపత్తినానత్తే పఞ్ఞా సమాపత్తట్ఠే ఞాణం, విహారసమాపత్తినానత్తే పఞ్ఞా విహారసమాపత్తట్ఠే ఞాణం’’.

ఞాణత్తయనిద్దేసో ఏకతింసతిమో.