౧౨. ఫలఞాణనిద్దేసో

౬౩. కథం పయోగప్పటిప్పస్సద్ధిపఞ్ఞా ఫలే ఞాణం? సోతాపత్తిమగ్గక్ఖణే దస్సనట్ఠేన సమ్మాదిట్ఠి మిచ్ఛాదిట్ఠియా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తంపయోగప్పటిప్పస్సద్ధత్తా ఉప్పజ్జతి సమ్మాదిట్ఠి. మగ్గస్సేతం ఫలం.

అభినిరోపనట్ఠేన సమ్మాసఙ్కప్పో మిచ్ఛాసఙ్కప్పా వుట్ఠాతి తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తంపయోగప్పటిప్పస్సద్ధత్తా ఉప్పజ్జతి సమ్మాసఙ్కప్పో. మగ్గస్సేతం ఫలం.

పరిగ్గహట్ఠేన సమ్మావాచా మిచ్ఛావాచాయ వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తంపయోగప్పటిప్పస్సద్ధత్తా ఉప్పజ్జతి సమ్మావాచా. మగ్గస్సేతం ఫలం.

సముట్ఠానట్ఠేన సమ్మాకమ్మన్తో మిచ్ఛాకమ్మన్తా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తంపయోగప్పటిప్పస్సద్ధత్తా ఉప్పజ్జతి సమ్మాకమ్మన్తో. మగ్గస్సేతం ఫలం.

వోదానట్ఠేన సమ్మాఆజీవో మిచ్ఛాఆజీవా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తంపయోగప్పటిప్పస్సద్ధత్తా ఉప్పజ్జతి సమ్మాఆజీవో. మగ్గస్సేతం ఫలం.

పగ్గహట్ఠేన సమ్మావాయామో మిచ్ఛావాయామా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తంపయోగప్పటిప్పస్సద్ధత్తా ఉప్పజ్జతి సమ్మావాయామో. మగ్గస్సేతం ఫలం.

ఉపట్ఠానట్ఠేన సమ్మాసతి మిచ్ఛాసతియా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తంపయోగప్పటిప్పస్సద్ధత్తా ఉప్పజ్జతి సమ్మాసతి. మగ్గస్సేతం ఫలం.

అవిక్ఖేపట్ఠేన సమ్మాసమాధి మిచ్ఛాసమాధితో వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తంపయోగప్పటిప్పస్సద్ధత్తా ఉప్పజ్జతి సమ్మాసమాధి. మగ్గస్సేతం ఫలం.

సకదాగామిమగ్గక్ఖణే దస్సనట్ఠేన సమ్మాదిట్ఠి…పే… అవిక్ఖేపట్ఠేన సమ్మాసమాధి ఓళారికా కామరాగసఞ్ఞోజనా పటిఘసఞ్ఞోజనా ఓళారికా కామరాగానుసయా పటిఘానుసయా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తంపయోగప్పటిప్పస్సద్ధత్తా ఉప్పజ్జతి సమ్మాసమాధి. మగ్గస్సేతం ఫలం.

అనాగామిమగ్గక్ఖణే దస్సనట్ఠేన సమ్మాదిట్ఠి…పే… అవిక్ఖేపట్ఠేన సమ్మాసమాధి అనుసహగతా కామరాగసఞ్ఞోజనా పటిఘసఞ్ఞోజనా అనుసహగతా కామరాగానుసయా పటిఘానుసయా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తంపయోగప్పటిప్పస్సద్ధత్తా ఉప్పజ్జతి సమ్మాసమాధి. మగ్గస్సేతం ఫలం.

అరహత్తమగ్గక్ఖణే దస్సనట్ఠేన సమ్మాదిట్ఠి…పే… అవిక్ఖేపట్ఠేన సమ్మాసమాధి రూపరాగా అరూపరాగా మానా ఉద్ధచ్చా అవిజ్జాయ మానానుసయా భవరాగానుసయా అవిజ్జానుసయా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తంపయోగప్పటిప్పస్సద్ధత్తా ఉప్పజ్జతి సమ్మాసమాధి. మగ్గస్సేతం ఫలం. తం ఞాతట్ఠేన ఞాణం, పజాననట్ఠేన పఞ్ఞా. తేన వుచ్చతి – ‘‘పయోగప్పటిప్పస్సద్ధిపఞ్ఞా ఫలే ఞాణం’’.

ఫలఞాణనిద్దేసో ద్వాదసమో.