౧౩. విముత్తిఞాణనిద్దేసో

౬౪. కథం ఛిన్నవటుమానుపస్సనే పఞ్ఞా విముత్తిఞాణం? సోతాపత్తిమగ్గేన సక్కాయదిట్ఠి, విచికిచ్ఛా, సీలబ్బతపరామాసో, దిట్ఠానుసయో, విచికిచ్ఛానుసయో అత్తనో చిత్తస్స ఉపక్కిలేసా సమ్మా సముచ్ఛిన్నా హోన్తి. ఇమేహి పఞ్చహి ఉపక్కిలేసేహి సపరియుట్ఠానేహి చిత్తం విముత్తం హోతి సువిముత్తం. తంవిముత్తి ఞాతట్ఠేన ఞాణం, పజాననట్ఠేన పఞ్ఞా. తేన వుచ్చతి – ‘‘ఛిన్నవటుమానుపస్సనే పఞ్ఞా విముత్తిఞాణం’’.

సకదాగామిమగ్గేన ఓళారికం కామరాగసఞ్ఞోజనం, పటిఘసఞ్ఞోజనం, ఓళారికో కామరాగానుసయో, పటిఘానుసయో – అత్తనో చిత్తస్స ఉపక్కిలేసా సమ్మా సముచ్ఛిన్నా హోన్తి. ఇమేహి చతూహి ఉపక్కిలేసేహి సపరియుట్ఠానేహి చిత్తం విముత్తం హోతి సువిముత్తం. తంవిముత్తి ఞాతట్ఠేన ఞాణం, పజాననట్ఠేన పఞ్ఞా. తేన వుచ్చతి – ‘‘ఛిన్నవటుమానుపస్సనే పఞ్ఞా విముత్తిఞాణం’’.

అనాగామిమగ్గేన అనుసహగతం కామరాగసఞ్ఞోజనం, పటిఘసఞ్ఞోజనం, అనుసహగతో కామరాగానుసయో, పటిఘానుసయో – అత్తనో చిత్తస్స ఉపక్కిలేసా సమ్మా సముచ్ఛిన్నా హోన్తి. ఇమేహి చతూహి ఉపక్కిలేసేహి సపరియుట్ఠానేహి చిత్తం విముత్తం హోతి సువిముత్తం. తంవిముత్తి ఞాతట్ఠేన ఞాణం, పజాననట్ఠేన పఞ్ఞా. తేన వుచ్చతి – ‘‘ఛిన్నవటుమానుపస్సనే పఞ్ఞా విముత్తిఞాణం’’.

అరహత్తమగ్గేన రూపరాగో, అరూపరాగో, మానో, ఉద్ధచ్చం, అవిజ్జా, మానానుసయో, భవరాగానుసయో, అవిజ్జానుసయో – అత్తనో చిత్తస్స ఉపక్కిలేసా సమ్మా సముచ్ఛిన్నా హోన్తి. ఇమేహి అట్ఠహి ఉపక్కిలేసేహి సపరియుట్ఠానేహి చిత్తం విముత్తం హోతి సువిముత్తం. తంవిముత్తి ఞాతట్ఠేన ఞాణం, పజాననట్ఠేన పఞ్ఞా. తేన వుచ్చతి – ‘‘ఛిన్నవటుమానుపస్సనే పఞ్ఞా విముత్తిఞాణం’’. తం ఞాతట్ఠేన ఞాణం, పజాననట్ఠేన పఞ్ఞా. తేన వుచ్చతి – ‘‘ఛిన్నవటుమానుపస్సనే పఞ్ఞా విముత్తిఞాణం’’.

విముత్తిఞాణనిద్దేసో తేరసమో.