౧౧. మగ్గఞాణనిద్దేసో

౬౧. కథం దుభతో వుట్ఠానవివట్టనే పఞ్ఞా మగ్గే ఞాణం? సోతాపత్తిమగ్గక్ఖణే దస్సనట్ఠేన సమ్మాదిట్ఠి మిచ్ఛాదిట్ఠియా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తేన వుచ్చతి – ‘‘దుభతో వుట్ఠానవివట్టనే పఞ్ఞా మగ్గే ఞాణం’’. అభినిరోపనట్ఠేన సమ్మాసఙ్కప్పో మిచ్ఛాసఙ్కప్పా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తేన వుచ్చతి – ‘‘దుభతో వుట్ఠానవివట్టనే పఞ్ఞా మగ్గే ఞాణం’’.

పరిగ్గహట్ఠేన సమ్మావాచా మిచ్ఛావాచాయ వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తేన వుచ్చతి – ‘‘దుభతో వుట్ఠానవివట్టనే పఞ్ఞా మగ్గే ఞాణం’’.

సముట్ఠానట్ఠేన సమ్మాకమ్మన్తో మిచ్ఛాకమ్మన్తా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తేన వుచ్చతి – ‘‘దుభతో వుట్ఠానవివట్టనే పఞ్ఞా మగ్గే ఞాణం’’.

వోదానట్ఠేన సమ్మాఆజీవో మిచ్ఛాఆజీవా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తేన వుచ్చతి – ‘‘దుభతో వుట్ఠానవివట్టనే పఞ్ఞా మగ్గే ఞాణం’’.

పగ్గహట్ఠేన సమ్మావాయామో మిచ్ఛావాయామా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తేన వుచ్చతి – ‘‘దుభతో వుట్ఠానవివట్టనే పఞ్ఞా మగ్గే ఞాణం’’.

ఉపట్ఠానట్ఠేన సమ్మాసతి మిచ్ఛాసతియా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తేన వుచ్చతి – ‘‘దుభతో వుట్ఠానవివట్టనే పఞ్ఞా మగ్గే ఞాణం’’.

అవిక్ఖేపట్ఠేన సమ్మాసమాధి మిచ్ఛాసమాధితో వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తేన వుచ్చతి – ‘‘దుభతో వుట్ఠానవివట్టనే పఞ్ఞా మగ్గే ఞాణం’’.

సకదాగామిమగ్గక్ఖణే దస్సనట్ఠేన సమ్మాదిట్ఠి …పే… అవిక్ఖేపట్ఠేన సమ్మాసమాధి ఓళారికా కామరాగసఞ్ఞోజనా పటిఘసఞ్ఞోజనా ఓళారికా కామరాగానుసయా పటిఘానుసయా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తేన వుచ్చతి – ‘‘దుభతో వుట్ఠానవివట్టనే పఞ్ఞా మగ్గే ఞాణం’’.

అనాగామిమగ్గక్ఖణే దస్సనట్ఠేన సమ్మాదిట్ఠి…పే… అవిక్ఖేపట్ఠేన సమ్మాసమాధి అనుసహగతా కామరాగసఞ్ఞోజనా పటిఘసఞ్ఞోజనా అనుసహగతా కామరాగానుసయా పటిఘానుసయా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తేన వుచ్చతి – ‘‘దుభతో వుట్ఠానవివట్టనే పఞ్ఞా మగ్గే ఞాణం’’.

అరహత్తమగ్గక్ఖణే దస్సనట్ఠేన సమ్మాదిట్ఠి…పే… అవిక్ఖేపట్ఠేన సమ్మాసమాధి రూపరాగా అరూపరాగా మానా ఉద్ధచ్చా అవిజ్జాయ మానానుసయా భవరాగానుసయా అవిజ్జానుసయా వుట్ఠాతి, తదనువత్తకకిలేసేహి చ ఖన్ధేహి చ వుట్ఠాతి, బహిద్ధా చ సబ్బనిమిత్తేహి వుట్ఠాతి. తేన వుచ్చతి – ‘‘దుభతో వుట్ఠానవివట్టనే పఞ్ఞా మగ్గే ఞాణం’’.

౬౨. అజాతం ఝాపేతి జాతేన, ఝానం తేన పవుచ్చతి;

ఝానవిమోక్ఖే కుసలతా, నానాదిట్ఠీసు న కమ్పతి.

సమాదహిత్వా యథా చే విపస్సతి, విపస్సమానో తథా చే సమాదహే;

విపస్సనా చ సమథో తదా అహు, సమానభాగా యుగనద్ధా వత్తరే.

దుక్ఖా సఙ్ఖారా సుఖో, నిరోధో ఇతి దస్సనం [నిరోధోతి దస్సనం (స్యా. క.)];

దుభతో వుట్ఠితా పఞ్ఞా, ఫస్సేతి అమతం పదం.

విమోక్ఖచరియం జానాతి, నానత్తేకత్తకోవిదో;

ద్విన్నం ఞాణానం కుసలతా, నానాదిట్ఠీసు న కమ్పతీతి.

తం ఞాతట్ఠేన ఞాణం, పజాననట్ఠేన పఞ్ఞా. తేన వుచ్చతి – ‘‘దుభతో వుట్ఠానవివట్టనే పఞ్ఞా మగ్గే ఞాణం’’.

మగ్గఞాణనిద్దేసో ఏకాదసమో.