౧౩. సోధనహారవిభఙ్గో

౪౫. తత్థ కతమో సోధనో హారో? ‘‘విస్సజ్జితమ్హి పఞ్హే’’తిగాథా. యథా ఆయస్మా అజితో పారాయనే భగవన్తం పఞ్హం పుచ్ఛతి –

‘‘కేనస్సు నివుతో లోకో, కేనస్సు నప్పకాసతి;

కిస్సాభిలేపనం బ్రూసి, కింసు తస్స మహబ్భయ’’న్తి.

‘‘అవిజ్జాయ నివుతో లోకో, [అజితాతి భగవా]

వివిచ్ఛా పమాదా నప్పకాసతి;

జప్పాభిలేపనం బ్రూమి, దుక్ఖమస్స మహబ్భయ’’న్తి.

‘‘కేనస్సు నివుతో లోకో’’తి పఞ్హే ‘‘అవిజ్జాయ నివుతో లోకో’’తి భగవా పదం సోధేతి, నో చ ఆరమ్భం. ‘‘కేనస్సు నప్పకాసతీ’’తి పఞ్హే ‘‘వివిచ్ఛా పమాదా నప్పకాసతీ’’తి భగవా పదం సోధేతి, నో చ ఆరమ్భం. ‘‘కిస్సాభిలేపనం బ్రూసీ’’తి పఞ్హే ‘‘జప్పాభిలేపనం బ్రూమీ’’తి భగవా పదం సోధేతి, నో చ ఆరమ్భం. ‘‘కింసు తస్స మహబ్భయ’’న్తి పఞ్హే ‘‘దుక్ఖమస్స మహబ్భయ’’న్తి సుద్ధో ఆరమ్భో. తేనాహ భగవా ‘‘అవిజ్జాయ నివుతో లోకో’’తి.

‘‘సవన్తి సబ్బధి సోతా, [ఇచ్చాయస్మా అజితో]

సోతానం కిం నివారణం;

సోతానం సంవరం బ్రూహి, కేన సోతా పిధీయరే’’తి.

‘‘యాని సోతాని లోకస్మిం, [అజితాతి భగవా]

సతి తేసం నివారణం;

సోతానం సంవరం బ్రూమి, పఞ్ఞాయేతే పిధీయరే’’తి.

‘‘సవన్తి సబ్బధి సోతా, సోతానం కిం నివారణ’’న్తి పఞ్హే ‘‘యాని సోతాని లోకస్మిం, సతి తేసం నివారణ’’న్తి భగవా పదం సోధేతి, నో చ ఆరమ్భం. ‘‘సోతానం సంవరం బ్రూహి, కేన సోతా పిధీయరే’’తి పఞ్హే ‘‘సోతానం సంవరం బ్రూమి, పఞ్ఞాయేతే పిధీయరే’’తి సుద్ధో ఆరమ్భో. తేనాహ భగవా ‘‘యాని సోతాని లోకస్మి’’న్తి.

‘‘పఞ్ఞా చేవ సతి చ, [ఇచ్చాయస్మా అజితో]

నామరూపఞ్చ [నామం రూపఞ్చ (క.) పస్స సు. ని. ౧౦౪౨] మారిస;

ఏతం మే పుట్ఠో పబ్రూహి, కత్థేతం ఉపరుజ్ఝతీ’’తి.

పఞ్హే –

‘‘యమేతం పఞ్హం అపుచ్ఛి, అజిత తం వదామి తే;

యత్థ నామఞ్చ రూపఞ్చ, అసేసం ఉపరుజ్ఝతి;

విఞ్ఞాణస్స నిరోధేన, ఏత్థేతం ఉపరుజ్ఝతీ’’తి.

సుద్ధో ఆరమ్భో. తేనాహ భగవా ‘‘యమేతం పఞ్హం అపుచ్ఛీ’’తి. యత్థ ఏవం సుద్ధో ఆరమ్భో, సో పఞ్హో విసజ్జితో భవతి. యత్థ పన ఆరమ్భో అసుద్ధో, న తావ సో పఞ్హో విసజ్జితో భవతి. తేనాహ ఆయస్మా మహాకచ్చాయనో ‘‘విస్సజ్జితమ్హి పఞ్హే’’తి.

నియుత్తో సోధనో హారో.