౯. తోదేయ్యమాణవపుచ్ఛా

౧౧౩. ‘‘యస్మిం కామా న వసన్తి, [ఇచ్చాయస్మా తోదేయ్యో]

తణ్హా యస్స న విజ్జతి;

కథంకథా చ యో తిణ్ణో, విమోక్ఖో తస్స కీదిసో’’.

౧౧౪. ‘‘యస్మిం కామా న వసన్తి, [తోదేయ్యాతి భగవా]

తణ్హా యస్స న విజ్జతి;

కథంకథా చ యో తిణ్ణో, విమోక్ఖో తస్స నాపరో’’.

౧౧౫. ‘‘నిరాససో సో ఉద ఆససానో [ఆసయానో (క.)], పఞ్ఞాణవా సో ఉద పఞ్ఞకప్పీ;

మునిం అహం సక్క యథా విజఞ్ఞం, తం మే వియాచిక్ఖ సమన్తచక్ఖు’’.

౧౧౬. ‘‘నిరాససో సో న చ ఆససానో, పఞ్ఞాణవా సో న చ పఞ్ఞకప్పీ;

ఏవమ్పి తోదేయ్య మునిం విజాన, అకిఞ్చనం కామభవే అసత్త’’న్తి.

తోదేయ్యమాణవపుచ్ఛా నవమా.