౧౦. కప్పమాణవపుచ్ఛా

౧౧౭. ‘‘మజ్ఝే సరస్మిం తిట్ఠతం, [ఇచ్చాయస్మా కప్పో]

ఓఘే జాతే మహబ్భయే;

జరామచ్చుపరేతానం, దీపం పబ్రూహి మారిస;

త్వఞ్చ మే దీపమక్ఖాహి, యథాయిదం నాపరం సియా’’.

౧౧౮. ‘‘మజ్ఝే సరస్మిం తిట్ఠతం, [కప్పాతి భగవా]

ఓఘే జాతే మహబ్భయే;

జరామచ్చుపరేతానం, దీపం పబ్రూమి కప్ప తే.

౧౧౯. ‘‘అకిఞ్చనం అనాదానం, ఏతం దీపం అనాపరం;

నిబ్బానం ఇతి నం బ్రూమి, జరామచ్చుపరిక్ఖయం.

౧౨౦. ‘‘ఏతదఞ్ఞాయ యే సతా, దిట్ఠధమ్మాభినిబ్బుతా;

న తే మారవసానుగా, న తే మారస్స పట్ఠగూ’’తి [పద్ధగూ (సీ.)].

కప్పమాణవపుచ్ఛా దసమా.