౯. సూరియతపనపఞ్హో

౯. ‘‘భన్తే నాగసేన, అయం సూరియో సబ్బకాలం కఠినం తపతి, ఉదాహు కిఞ్చికాలం మన్దం తపతీ’’తి? ‘‘సబ్బకాలం, మహారాజ, సూరియో కఠినం తపతి, న కిఞ్చికాలం మన్దం తపతీ’’తి. ‘‘యది, భన్తే నాగసేన, సూరియో సబ్బకాలం కఠినం తపతి, కిస్స పన అప్పేకదా సూరియో కఠినం తపతి, అప్పేకదా మన్దం తపతీ’’తి? ‘‘చత్తారోమే, మహారాజ, సూరియస్స రోగా, యేసం అఞ్ఞతరేన రోగేన పటిపీళితో సూరియో మన్దం తపతి. కతమే చత్తారో? అబ్భం, మహారాజ, సూరియస్స రోగో, తేన రోగేన పటిపీళితో సూరియో మన్దం తపతి. మహికా, మహారాజ, సూరియస్స రోగో, తేన రోగేన పటిపీళితో సూరియో మన్దం తపతి. మేఘో, మహారాజ, సూరియస్స రోగో, తేన రోగేన పటిపీళితో సూరియో మన్దం తపతి. రాహు, మహారాజ, సూరియస్స రోగో, తేన రోగేన పటిపీళితో సూరియో మన్దం తపతి. ఇమే ఖో, మహారాజ, చత్తారో సూరియస్స రోగా, యేసం అఞ్ఞతరేన రోగేన పటిపీళితో సూరియో మన్దం తపతీ’’తి. ‘‘అచ్ఛరియం, భన్తే నాగసేన, అబ్భుతం, భన్తే నాగసేన, సూరియస్సపి తావ తేజోసమ్పన్నస్స రోగో ఉప్పజ్జిస్సతి, కిమఙ్గం పన అఞ్ఞేసం సత్తానం, నత్థి, భన్తే, ఏసా విభత్తి అఞ్ఞస్స అఞ్ఞత్ర తవాదిసేన బుద్ధిమతా’’తి.

సూరియతపనపఞ్హో నవమో.