౮. మనసికారలక్ఖణపఞ్హో

౮. రాజా ఆహ ‘‘కింలక్ఖణో, భన్తే నాగసేన, మనసికారో, కింలక్ఖణా పఞ్ఞా’’తి? ‘‘ఊహనలక్ఖణో ఖో, మహారాజ, మనసికారో, ఛేదనలక్ఖణా పఞ్ఞా’’తి.

‘‘కథం ఊహనలక్ఖణో మనసికారో, కథం ఛేదనలక్ఖణా పఞ్ఞా, ఓపమ్మం కరోహీ’’తి. ‘‘జానాసి, త్వం మహారాజ, యవలావకే’’తి. ‘‘ఆమ, భన్తే, జానామీ’’తి. ‘‘కథం, మహారాజ, యవలావకా యవం లునన్తీ’’తి? ‘‘వామేన, భన్తే, హత్థేన యవకలాపం గహేత్వా దక్ఖిణేన హత్థేన దాత్తం గహేత్వా దాత్తేన ఛిన్దన్తీ’’తి.

‘‘యథా, మహారాజ, యవలావకో వామేన హత్థేన యవకలాపం గహేత్వా దక్ఖిణేన హత్థేన దాత్తం గహేత్వా యవం ఛిన్దతి, ఏవమేవ ఖో, మహారాజ, యోగావచరో మనసికారేన మానసం గహేత్వా పఞ్ఞాయ కిలేసే ఛిన్దతి, ఏవం ఖో, మహారాజ, ఊహనలక్ఖణో మనసికారో, ఏవం ఛేదనలక్ఖణా పఞ్ఞా’’తి.

‘‘కల్లోసి, భన్తే నాగసేనా’’తి.

మనసికారలక్ఖణపఞ్హో అట్ఠమో.