౧౪. సమాధిపఞ్హో

౧౪. రాజా ఆహ ‘‘భన్తే నాగసేన, కింలక్ఖణో సమాధీ’’తి? ‘‘పముఖలక్ఖణో, మహారాజ, సమాధి, యే కేచి కుసలా ధమ్మా, సబ్బే తే సమాధిపముఖా హోన్తి సమాధినిన్నా సమాధిపోణా సమాధిపబ్భారా’’తి.

‘‘ఓపమ్మం కరోహీ’’తి. ‘‘యథా, మహారాజ, కూటాగారస్స యా యాచి గోపానసియో, సబ్బా తా కూటఙ్గమా హోన్తి కూటనిన్నా కూటసమోసరణా, కూటం తాసం అగ్గమక్ఖాయతి. ఏవమేవ ఖో, మహారాజ, యే కేచి కుసలా ధమ్మా, సబ్బే తే సమాధిపముఖా హోన్తి సమాధినిన్నా సమాధిపోణా సమాధిపబ్భారాతి.

‘‘భియ్యో ఓపమ్మం కరోహీ’’తి. ‘‘యథా, మహారాజ, కోచి రాజా చతురఙ్గినియా సేనాయ సద్ధిం సఙ్గామం ఓతరేయ్య, సబ్బావ సేనా హత్థీ చ అస్సా చ రథా చ పత్తీ చ తప్పముఖా [తమ్పముఖా (స్యా. క.)] భవేయ్యుం తన్నిన్నా తప్పోణా తప్పబ్భారా తం యేవ అనుపరియాయేయ్యుం. ఏవమేవ ఖో, మహారాజ, యే కేచి కుసలా ధమ్మా, సబ్బే తే సమాధిపముఖా హోన్తి సమాధినిన్నా సమాధిపోణా సమాధిపబ్భారా. ఏవం ఖో, మహారాజ, పముఖలక్ఖణో సమాధి. భాసితమ్పేతం, మహారాజ, భగవతా – ‘‘సమాధిం, భిక్ఖవే, భావేథ, సమాహితో, భిక్ఖవే, భిక్ఖు యథాభూతం పజానాతీ’’తి.

‘‘కల్లోసి, భన్తే నాగసేనా’’తి.

సమాధిపఞ్హో చుద్దసమో.