౧౨. వీరియలక్ఖణపఞ్హో

౧౨. రాజా ఆహ ‘‘భన్తే నాగసేన, కింలక్ఖణం వీరియ’’న్తి? ‘‘ఉపత్థమ్భనలక్ఖణం, మహారాజ, వీరియం, వీరియూపత్థమ్భితా సబ్బే కుసలా ధమ్మా న పరిహాయన్తీ’’తి.

‘‘ఓపమ్మం కరోహీ’’తి. ‘‘యథా, మహారాజ, పురిసో గేహే పతన్తే అఞ్ఞేన దారునా ఉపత్థమ్భేయ్య, ఉపత్థమ్భితం సన్తం ఏవం తం గేహం న పతేయ్య. ఏవమేవ ఖో, మహారాజ, ఉపత్థమ్భనలక్ఖణం వీరియం, వీరియూపత్థమ్భితా సబ్బే కుసలా ధమ్మా న పరిహాయన్తీ’’తి.

‘‘భియ్యో ఓపమ్మం కరోహీ’’తి. ‘‘యథా, మహారాజ, పరిత్తకం సేనం మహతీ సేనా భఞ్జేయ్య, తతో రాజా అఞ్ఞమఞ్ఞం అనుస్సారేయ్య అనుపేసేయ్య అత్తనో పరిత్తకాయ సేనాయ బలం అనుపదం దదేయ్య, తాయ సద్ధిం పరిత్తకా సేనా మహతిం సేనం భఞ్జేయ్య. ఏవమేవ ఖో, మహారాజ, ఉపత్థమ్భనలక్ఖణం వీరియం, వీరియూపత్థమ్భితా సబ్బే కుసలా ధమ్మా న పరిహాయన్తి. భాసితమ్పేతం, మహారాజ, భగవతా – ‘వీరియవా ఖో, భిక్ఖవే, అరియసావకో అకుసలం పజహతి, కుసలం భావేతి. సావజ్జం పజహతి, అనవజ్జం భావేతి. సుద్ధమత్తానం పరిహరతీ’’’తి.

‘‘కల్లోసి, భన్తే నాగసేనా’’తి.

వీరియలక్ఖణపఞ్హో ద్వాదసమో.