౪౩౬. సముగ్గజాతకం (౧౦)

౮౭. కుతో ను ఆగచ్ఛథ భో తయో జనా, స్వాగతా ఏథ [స్వాగతం ఏత్థ (సీ. పీ.)] నిసీదథాసనే;

కచ్చిత్థ భోన్తో కుసలం అనామయం, చిరస్సమబ్భాగమనం హి వో ఇధ.

౮౮. అహమేవ ఏకో ఇధ మజ్జ పత్తో, న చాపి మే దుతియో కోచి విజ్జతి;

కిమేవ సన్ధాయ తే భాసితం ఇసే, ‘‘కుతో ను ఆగచ్ఛథ భో తయో జనా’’.

౮౯. తువఞ్చ ఏకో భరియా చ తే పియా, సముగ్గపక్ఖిత్తనికిణ్ణమన్తరే;

సా రక్ఖితా కుచ్ఛిగతావ [కుచ్ఛిగతా చ (క.)] తే సదా, వాయుస్స [హరిస్స (క.)] పుత్తేన సహా తహిం రతా.

౯౦. సంవిగ్గరూపో ఇసినా వియాకతో [పబ్యాకతో (క.), బ్యాకతో (స్యా. పీ.)], సో దానవో తత్థ సముగ్గముగ్గిలి;

అద్దక్ఖి భరియం సుచి మాలధారినిం, వాయుస్స పుత్తేన సహా తహిం రతం.

౯౧. సుదిట్ఠరూపముగ్గతపానువత్తినా [సుదిట్ఠరూపుగ్గతపానువత్తినా (సీ. స్యా. పీ.)], హీనా నరా యే పమదావసం గతా;

యథా హవే పాణరివేత్థ రక్ఖితా, దుట్ఠా మయీ అఞ్ఞమభిప్పమోదయి.

౯౨. దివా చ రత్తో చ మయా ఉపట్ఠితా, తపస్సినా జోతిరివా వనే వసం;

సా ధమ్మముక్కమ్మ అధమ్మమాచరి, అకిరియరూపో పమదాహి సన్థవో.

౯౩. సరీరమజ్ఝమ్హి ఠితాతిమఞ్ఞహం, మయ్హం అయన్తి అసతిం అసఞ్ఞతం;

సా ధమ్మముక్కమ్మ అధమ్మమాచరి, అకిరియరూపో పమదాహి సన్థవో.

౯౪. సురక్ఖితం మేతి కథం ను విస్ససే, అనేకచిత్తాసు న హత్థి [అనేకచిత్తా పున హేత్థ (క.)] రక్ఖణా;

ఏతా హి పాతాలపపాతసన్నిభా, ఏత్థప్పమత్తో బ్యసనం నిగచ్ఛతి.

౯౫. తస్మా హి తే సుఖినో వీతసోకా, యే మాతుగామేహి చరన్తి నిస్సటా;

ఏతం సివం ఉత్తమమాభిపత్థయం, న మాతుగామేహి కరేయ్య సన్థవన్తి.

సముగ్గజాతకం దసమం.