౪౩౭. పూతిమంసజాతకం (౧౧)

౯౬. న ఖో మే రుచ్చతి ఆళి, పూతిమంసస్స పేక్ఖనా;

ఏతాదిసా సఖారస్మా, ఆరకా పరివజ్జయే.

౯౭. ఉమ్మత్తికా అయం వేణీ, వణ్ణేతి పతినో సఖిం;

పజ్ఝాయి [పజ్ఝాతి (సీ. పీ.), పజ్ఝాయతి (సీ. నియ్య)] పటిగచ్ఛన్తిం, ఆగతం మేణ్డ [మేళ (సీ. పీ.)] మాతరం.

౯౮. త్వం ఖోసి సమ్మ ఉమ్మత్తో, దుమ్మేధో అవిచక్ఖణో;

యో త్వం [సో త్వం (స్యా.)] మతాలయం కత్వా, అకాలేన విపేక్ఖసి.

౯౯. న అకాలే విపేక్ఖేయ్య, కాలే పేక్ఖేయ్య పణ్డితో;

పూతిమంసోవ పజ్ఝాయి [పజ్ఝాతి (సీ. పీ.), పజ్ఝాయతి (సీ. నియ్య)], యో అకాలే విపేక్ఖతి.

౧౦౦. పియం ఖో ఆళి మే హోతు, పుణ్ణపత్తం దదాహి మే;

పతి సఞ్జీవితో మయ్హం, ఏయ్యాసి పియపుచ్ఛికా [పుచ్ఛితా (స్యా. క.)].

౧౦౧. పియం ఖో ఆళి తే హోతు, పుణ్ణపత్తం దదామి తే;

మహతా పరివారేన [పరిహారేన (స్యా.)], ఏస్సం [ఏసం (సీ. పీ.)] కయిరాహి [కయిరాసి (పీ.)] భోజనం.

౧౦౨. కీదిసో తుయ్హం పరివారో, యేసం కాహామి భోజనం;

కింనామకా చ తే సబ్బే, తం [తే (సీ. స్యా. పీ.)] మే అక్ఖాహి పుచ్ఛితా.

౧౦౩. మాలియో చతురక్ఖో చ, పిఙ్గియో అథ జమ్బుకో;

ఏదిసో మయ్హం పరివారో, తేసం కయిరాహి [కయిరాసి (పీ.)] భోజనం.

౧౦౪. నిక్ఖన్తాయ అగారస్మా, భణ్డకమ్పి వినస్సతి;

ఆరోగ్యం ఆళినో వజ్జం [వచ్ఛం (?)], ఇధేవ వస మాగమాతి.

పూతిమంసజాతకం ఏకాదసమం.