౪౩౫. హలిద్దిరాగజాతకం (౯)

౭౮. సుతితిక్ఖం అరఞ్ఞమ్హి, పన్తమ్హి సయనాసనే;

యే చ గామే తితిక్ఖన్తి, తే ఉళారతరా తయా.

౭౯. అరఞ్ఞా గామమాగమ్మ, కింసీలం కింవతం అహం;

పురిసం తాత సేవేయ్యం, తం మే అక్ఖాహి పుచ్ఛితో.

౮౦. యో తే [యో తం (స్యా. జా. ౧.౪.౧౯౦ అరఞ్ఞజాతకేపి)] విస్సాసయే తాత, విస్సాసఞ్చ ఖమేయ్య తే;

సుస్సూసీ చ తితిక్ఖీ చ, తం భజేహి ఇతో గతో.

౮౧. యస్స కాయేన వాచాయ, మనసా నత్థి దుక్కటం;

ఉరసీవ పతిట్ఠాయ, తం భజేహి ఇతో గతో.

౮౨. యో చ ధమ్మేన చరతి, చరన్తోపి న మఞ్ఞతి;

విసుద్ధకారిం సప్పఞ్ఞం, తం భజేహి ఇతో గతో.

౮౩. హలిద్దిరాగం కపిచిత్తం, పురిసం రాగవిరాగినం;

తాదిసం తాత మా సేవి, నిమ్మనుస్సమ్పి చే సియా.

౮౪. ఆసీవిసంవ కుపితం, మీళ్హలిత్తం మహాపథం;

ఆరకా పరివజ్జేహి, యానీవ విసమం పథం.

౮౫. అనత్థా తాత వడ్ఢన్తి, బాలం అచ్చుపసేవతో;

మాస్సు బాలేన సంగచ్ఛి, అమిత్తేనేవ సబ్బదా.

౮౬. తం తాహం తాత యాచామి, కరస్సు వచనం మమ;

మాస్సు బాలేన సంగచ్ఛి [సంగఞ్ఛి (సీ. పీ.)], దుక్ఖో బాలేహి సఙ్గమోతి.

హలిద్దిరాగజాతకం నవమం.