౧. కాలిఙ్గవగ్గో

౩౦౧. చూళకాలిఙ్గజాతకం (౪-౧-౧)

౧. వివరథిమాసం [వివరథ ఇమాసం (సీ. స్యా. పీ.)] ద్వారం, నగరం పవిసన్తు [పవిసితుం మయా; (క.)] అరుణరాజస్స;

సీహేన సుసిట్ఠేన, సురక్ఖితం [సుసత్థేన, సురక్ఖితం (సీ. పీ.), సుసిట్ఠేన (క.)] నన్దిసేనేన.

౨. జయో కలిఙ్గానమసయ్హసాహినం, పరాజయో అనయో [అజయో (స్యా.), అన్వితో (క.)] అస్సకానం;

ఇచ్చేవ తే భాసితం బ్రహ్మచారి, న ఉజ్జుభూతా వితథం భణన్తి.

౩. దేవా ముసావాదముపాతివత్తా, సచ్చం ధనం పరమం తేసు [తథం పేమకరం ను (క.), తథం పరమం కరం ను (స్యా.)] సక్క;

తం తే ముసా భాసితం దేవరాజ, కిం వా పటిచ్చ మఘవా మహిన్ద.

౪. నను తే సుతం బ్రాహ్మణ భఞ్ఞమానే, దేవా న ఇస్సన్తి పురిసపరక్కమస్స;

దమో సమాధి మనసో అభేజ్జో [అదేజ్జో (సీ. పీ.), అభిజ్జో (క.)], అబ్యగ్గతా నిక్కమనఞ్చ [నిక్ఖమనఞ్చ (సీ.)] కాలే;

దళ్హఞ్చ విరియం పురిసపరక్కమో చ, తేనేవ ఆసి విజయో అస్సకానన్తి.

చూళకాలిఙ్గజాతకం పఠమం.

౩౦౨. మహాఅస్సారోహజాతకం (౪-౧-౨)

౫. అదేయ్యేసు దదం దానం, దేయ్యేసు నప్పవేచ్ఛతి;

ఆపాసు బ్యసనం పత్తో, సహాయం నాధిగచ్ఛతి.

౬. నాదేయ్యేసు దదం దానం, దేయ్యేసు యో పవేచ్ఛతి;

ఆపాసు బ్యసనం పత్తో, సహాయమధిగచ్ఛతి.

౭. సఞ్ఞోగసమ్భోగవిసేసదస్సనం, అనరియధమ్మేసు సఠేసు నస్సతి;

కతఞ్చ అరియేసు చ అజ్జవేసు, మహప్ఫలం హోతి అణుమ్పి తాదిసు.

౮. యో పుబ్బే కతకల్యాణో, అకా లోకే సుదుక్కరం;

పచ్ఛా కయిరా న వా కయిరా, అచ్చన్తం పూజనారహోతి.

మహాఅస్సారోహజాతకం దుతియం.

౩౦౩. ఏకరాజజాతకం (౪-౧-౩)

౯. అనుత్తరే కామగుణే సమిద్ధే, భుత్వాన పుబ్బే వసీ ఏకరాజ;

సో దాని దుగ్గే నరకమ్హి ఖిత్తో, నప్పజ్జహే వణ్ణబలం పురాణం.

౧౦. పుబ్బేవ ఖన్తీ చ తపో చ మయ్హం, సమ్పత్థితా దుబ్భిసేన [దబ్బసేనా (సీ. పీ.)] అహోసి;

తం దాని లద్ధాన కథం ను రాజ, జహే అహం వణ్ణబలం పురాణం.

౧౧. సబ్బా కిరేవం పరినిట్ఠితాని, యసస్సినం పఞ్ఞవన్తం విసయ్హ;

యసో చ లద్ధా పురిమం ఉళారం, నప్పజ్జహే వణ్ణబలం పురాణం.

౧౨. పనుజ్జ దుక్ఖేన సుఖం జనిన్ద, సుఖేన వా దుక్ఖమసయ్హసాహి;

ఉభయత్థ సన్తో అభినిబ్బుతత్తా, సుఖే చ దుక్ఖే చ భవన్తి తుల్యాతి.

ఏకరాజజాతకం తతియం.

౩౦౪. దద్దరజాతకం (౪-౧-౪)

౧౩. ఇమాని మం దద్దర తాపయన్తి, వాచాదురుత్తాని మనుస్సలోకే;

మణ్డూకభక్ఖా ఉదకన్తసేవీ, ఆసీవిసం మం అవిసా సపన్తి.

౧౪. సకా రట్ఠా పబ్బాజితో, అఞ్ఞం జనపదం గతో;

మహన్తం కోట్ఠం కయిరాథ, దురుత్తానం [దురుత్తాని (క.)] నిధేతవే.

౧౫. యత్థ పోసం న జానన్తి, జాతియా వినయేన వా;

న తత్థ మానం కయిరాథ, వసమఞ్ఞాతకే జనే.

౧౬. విదేసవాసం వసతో, జాతవేదసమేనపి [జాతవేదభయేనపి (క.)];

ఖమితబ్బం సపఞ్ఞేన, అపి దాసస్స తజ్జితన్తి.

దద్దరజాతకం చతుత్థం.

౩౦౫. సీలవీమంసనజాతకం (౪-౧-౫)

౧౭. నత్థి లోకే రహో నామ, పాపకమ్మం పకుబ్బతో;

పస్సన్తి వనభూతాని, తం బాలో మఞ్ఞతీ రహో.

౧౮. అహం రహో న పస్సామి, సుఞ్ఞం వాపి న విజ్జతి;

యత్థ అఞ్ఞం [సుఞ్ఞం (స్యా. క.)] న పస్సామి, అసుఞ్ఞం హోతి తం మయా.

౧౯. దుజ్జచ్చో చ సుజచ్చో [అజచ్చో (పీ.)] చ, నన్దో చ సుఖవడ్ఢితో [సుఖవచ్ఛకో (సీ.), సుఖవచ్ఛనో (స్యా. పీ.)];

వేజ్జో చ అద్ధువసీలో [అథ సీలో (క.)] చ, తే ధమ్మం జహు మత్థికా.

౨౦. బ్రాహ్మణో చ కథం జహే, సబ్బధమ్మాన పారగూ;

యో ధమ్మమనుపాలేతి, ధితిమా సచ్చనిక్కమోతి.

సీలవీమంసనజాతకం పఞ్చమం.

౩౦౬. సుజాతజాతకం (౪-౧-౬)

౨౧. కిమణ్డకా ఇమే దేవ, నిక్ఖిత్తా కంసమల్లకే;

ఉపలోహితకా వగ్గూ, తం [తే (పీ.)] మే అక్ఖాహి పుచ్ఛితో.

౨౨. యాని పురే తువం దేవి, భణ్డు నన్తకవాసినీ;

ఉచ్ఛఙ్గహత్థా పచినాసి, తస్సా తే కోలియం ఫలం.

౨౩. ఉడ్డయ్హతే న రమతి, భోగా విప్పజహన్తి తం [విప్పజహన్తి’మం (?)];

తత్థేవిమం పటినేథ, యత్థ కోలం పచిస్సతి.

౨౪. హోన్తి హేతే మహారాజ, ఇద్ధిప్పత్తాయ [ఇద్ధిమత్తాయ (క.)] నారియా;

ఖమ దేవ సుజాతాయ, మాస్సా [మాసు (క.)] కుజ్ఝ రథేసభాతి.

సుజాతజాతకం ఛట్ఠం.

౩౦౭. పలాసజాతకం (౪-౧-౭)

౨౫. అచేతనం బ్రాహ్మణ అస్సుణన్తం, జానో అజానన్తమిమం పలాసం;

ఆరద్ధవిరియో ధువం అప్పమత్తో, సుఖసేయ్యం పుచ్ఛసి కిస్స హేతు.

౨౬. దూరే సుతో చేవ బ్రహా చ రుక్ఖో, దేసే ఠితో భూతనివాసరూపో;

తస్మా నమస్సామి ఇమం పలాసం, యే చేత్థ భూతా తే [తే చ (సీ. పీ.)] ధనస్స హేతు.

౨౭. సో తే కరిస్సామి యథానుభావం, కతఞ్ఞుతం బ్రాహ్మణ పేక్ఖమానో;

కథఞ్హి ఆగమ్మ సతం సకాసే, మోఘాని తే అస్సు పరిఫన్దితాని.

౨౮. యో తిన్దుకరుక్ఖస్స పరో [పురో (క.)] పిలక్ఖో [పిలక్ఖు (సీ. పీ.), మిలక్ఖు (క.)], పరివారితో పుబ్బయఞ్ఞో ఉళారో;

తస్సేస మూలస్మిం నిధి నిఖాతో, అదాయాదో గచ్ఛ తం ఉద్ధరాహీతి.

పలాసజాతకం సత్తమం.

౩౦౮. సకుణజాతకం (౪-౧-౮)

౨౯. అకరమ్హస తే కిచ్చం, యం బలం అహువమ్హసే;

మిగరాజ నమో త్యత్థు, అపి కిఞ్చి లభామసే.

౩౦. మమ లోహితభక్ఖస్స, నిచ్చం లుద్దాని కుబ్బతో;

దన్తన్తరగతో సన్తో, తం బహుం యమ్పి జీవసి.

౩౧. అకతఞ్ఞుమకత్తారం, కతస్స అప్పటికారకం;

యస్మిం కతఞ్ఞుతా నత్థి, నిరత్థా తస్స సేవనా.

౩౨. యస్స సమ్ముఖచిణ్ణేన, మిత్తధమ్మో న లబ్భతి;

అనుసూయ [అనుసుయ్య (సీ. పీ.)] మనక్కోసం, సణికం తమ్హా అపక్కమేతి.

సకుణజాతకం అట్ఠమం.

౩౦౯. ఛవకజాతకం (౪-౧-౯)

౩౩. సబ్బమిదం చరిమం కతం [చరిమవతం (సీ. పీ.)], ఉభో ధమ్మం న పస్సరే;

ఉభో పకతియా చుతా, యో చాయం మన్తేజ్ఝాపేతి [మన్తజ్ఝాయతి (సీ.), సజ్ఝాపయతి (పీ.)];

యో చ మన్తం అధీయతి.

౩౪. సాలీనం ఓదనం భుఞ్జే, సుచిం మంసూపసేచనం;

తస్మా ఏతం న సేవామి, ధమ్మం ఇసీహి సేవితం.

౩౫. పరిబ్బజ మహా లోకో [మహాబ్రహ్మే (క.)], పచన్తఞ్ఞేపి పాణినో;

మా తం అధమ్మో ఆచరితో, అస్మా కుమ్భమివాభిదా.

౩౬. ధిరత్థు తం యసలాభం, ధనలాభఞ్చ బ్రాహ్మణ;

యా వుత్తి వినిపాతేన, అధమ్మచరణేన వాతి.

ఛవకజాతకం నవమం.

౩౧౦. సేయ్యజాతకం (౪-౧-౧౦)

౩౭. ససముద్దపరియాయం, మహిం సాగరకుణ్డలం;

న ఇచ్ఛే సహ నిన్దాయ, ఏవం సేయ్య [సయ్హ (సీ. స్యా. పీ.)] విజానహి.

౩౮. ధిరత్థు తం యసలాభం, ధనలాభఞ్చ బ్రాహ్మణ;

యా వుత్తి వినిపాతేన, అధమ్మచరణేన వా.

౩౯. అపి చే పత్తమాదాయ, అనగారో పరిబ్బజే;

సాయేవ జీవికా సేయ్యో, యా చాధమ్మేన ఏసనా.

౪౦. అపి చే పత్తమాదాయ, అనగారో పరిబ్బజే;

అఞ్ఞం అహింసయం లోకే, అపి రజ్జేన తం వరన్తి.

సేయ్యజాతకం [సయ్హజాతకం (సీ. స్యా. పీ.)] దసమం.

కాలిఙ్గవగ్గో [వివరవగ్గో (సీ. పీ.)] పఠమో.

తస్సుద్దానం –

వివరఞ్చ అదేయ్య సమిద్ధవరం, అథ దద్దర పాపమహాతిరహో;

అథ కోలి పలాసవరఞ్చ కర, చరిమం ససముద్దవరేన దసాతి.