౫౧౨. కుమ్భజాతకం (౨)

౩౩. కో పాతురాసీ తిదివా నభమ్హి, ఓభాసయం సంవరిం చన్దిమావ;

గత్తేహి తే రస్మియో నిచ్ఛరన్తి, సతేరతా [సతేరితా (సీ. స్యా. క.)] విజ్జురివన్తలిక్ఖే.

౩౪. సో ఛిన్నవాతం కమసీ అఘమ్హి, వేహాయసం గచ్ఛసి తిట్ఠసీ చ;

ఇద్ధీ ను తే వత్థుకతా సుభావితా, అనద్ధగూనం అపి దేవతానం.

౩౫. వేహాయసం గమ్మమాగమ్మ [కమమాగమ్మ (సీ. స్యా.)] తిట్ఠసి, కుమ్భం కిణాథాతి యమేతమత్థం;

కో వా తువం కిస్స వా తాయ కుమ్భో, అక్ఖాహి మే బ్రాహ్మణ ఏతమత్థం.

౩౬. న సప్పికుమ్భో నపి తేలకుమ్భో, న ఫాణితస్స న మధుస్స కుమ్భో;

కుమ్భస్స వజ్జాని అనప్పకాని, దోసే బహూ కుమ్భగతే సుణాథ.

౩౭. గళేయ్య యం పిత్వా [పీత్వా (సీ. పీ.)] పతే పపాతం, సోబ్భం గుహం చన్దనియోళిగల్లం;

బహుమ్పి భుఞ్జేయ్య అభోజనేయ్యం, తస్సా పుణ్ణం కుమ్భమిమం కిణాథ.

౩౮. యం పిత్వా [యం వే పీత్వా (సీ.)] చిత్తస్మిమనేసమానో, ఆహిణ్డతీ గోరివ భక్ఖసారీ [భక్ఖసాదీ (సీ. స్యా. అట్ఠ.)];

అనాథమానో ఉపగాయతి నచ్చతి చ, తస్సా పుణ్ణం కుమ్భమిమం కిణాథ.

౩౯. యం వే పివిత్వా అచేలోవ నగ్గో, చరేయ్య గామే విసిఖన్తరాని;

సమ్మూళ్హచిత్తో అతివేలసాయీ, తస్సా పుణ్ణం కుమ్భమిమం కిణాథ.

౪౦. యం పిత్వా ఉట్ఠాయ పవేధమానో, సీసఞ్చ బాహుఞ్చ [బాహఞ్చ (పీ.)] పచాలయన్తో;

సో నచ్చతీ దారుకటల్లకోవ, తస్సా పుణ్ణం కుమ్భమిమం కిణాథ.

౪౧. యం వే పివిత్వా అగ్గిదడ్ఢా సయన్తి, అథో సిగాలేహిపి ఖాదితాసే;

బన్ధం వధం భోగజానిఞ్చుపేన్తి, తస్సా పుణ్ణం కుమ్భమిమం కిణాథ.

౪౨. యం పిత్వా భాసేయ్య ఆభాసనేయ్యం, సభాయమాసీనో అపేతవత్థో;

సమ్మక్ఖితో [సమక్ఖితో (సీ.)] వన్తగతో బ్యసన్నో, తస్సా పుణ్ణం కుమ్భమిమం కిణాథ.

౪౩. యం వే పివిత్వా ఉక్కట్ఠో ఆవిలక్ఖో, మమేవ సబ్బా పథవీతి మఞ్ఞే [మఞ్ఞతి (సీ.)];

న మే సమో చాతురన్తోపి రాజా, తస్సా పుణ్ణం కుమ్భమిమం కిణాథ.

౪౪. మానాతిమానా కలహాని పేసుణీ, దుబ్బణ్ణినీ నగ్గయినీ పలాయినీ;

చోరాన ధుత్తాన గతీ నికేతో, తస్సా పుణ్ణం కుమ్భమిమం కిణాథ.

౪౫. ఇద్ధాని ఫీతాని కులాని అస్సు, అనేకసాహస్సధనాని లోకే;

ఉచ్ఛిన్నదాయజ్జకతానిమాయ, తస్సా పుణ్ణం కుమ్భమిమం కిణాథ.

౪౬. ధఞ్ఞం ధనం రజతం జాతరూపం, ఖేత్తం గవం యత్థ వినాసయన్తి;

ఉచ్ఛేదనీ విత్తవతం [ఉచ్ఛేదనీ విత్తగతం (స్యా.), ఉచ్ఛేదనివిత్తగతం (క.)] కులానం, తస్సా పుణ్ణం కుమ్భమిమం కిణాథ.

౪౭. యం వే పిత్వా దిత్తరూపోవ [దుట్ఠరూపోవ (సీ.)] పోసో, అక్కోసతి మాతరం పితరఞ్చ;

సస్సుమ్పి గణ్హేయ్య అథోపి సుణ్హం, తస్సా పుణ్ణం కుమ్భమిమం కిణాథ.

౪౮. యం వే పిత్వా దిత్తరూపావ నారీ, అక్కోసతి ససురం సామికఞ్చ;

దాసమ్పి గణ్హే పరిచారకమ్పి, తస్సా పుణ్ణం కుమ్భమిమం కిణాథ.

౪౯. యం వే పివిత్వాన [యఞ్చే పీత్వాన (పీ.)] హనేయ్య పోసో, ధమ్మే ఠితం సమణం బ్రాహ్మణం వా;

గచ్ఛే అపాయమ్పి తతోనిదానం, తస్సా పుణ్ణం కుమ్భమిమం కిణాథ.

౫౦. యం వే పివిత్వా దుచ్చరితం చరన్తి, కాయేన వాచాయ చ చేతసా చ;

నిరయం వజన్తి దుచ్చరితం చరిత్వా, తస్సా పుణ్ణం కుమ్భమిమం కిణాథ.

౫౧. యం యాచమానా న లభన్తి పుబ్బే, బహుం హిరఞ్ఞమ్పి పరిచ్చజన్తా;

సో తం పివిత్వా అలికం భణాతి, తస్సా పుణ్ణం కుమ్భమిమం కిణాథ.

౫౨. యం వే పిత్వా పేసనే పేసియన్తో, అచ్చాయికే కరణీయమ్హి జాతే;

అత్థమ్పి సో నప్పజానాతి వుత్తో, తస్సా పుణ్ణం కుమ్భమిమం కిణాథ.

౫౩. హిరీమనాపి అహిరీకభావం, పాతుం కరోన్తి మదనాయ [మదిరాయ (పీ.)] మత్తా;

ధీరాపి సన్తా బహుకం భణన్తి, తస్సా పుణ్ణం కుమ్భమిమం కిణాథ.

౫౪. యం వే పిత్వా ఏకథూపా సయన్తి, అనాసకా థణ్డిలదుక్ఖసేయ్యం;

దుబ్బణ్ణియం ఆయసక్యఞ్చుపేన్తి, తస్సా పుణ్ణం కుమ్భమిమం కిణాథ.

౫౫. యం వే పిత్వా పత్తఖన్ధా సయన్తి, గావో కుటహతావ న హి వారుణియా;

[యం వే పిత్వా పత్తక్ఖన్ధా, సయన్తి గావో కూటహతారివ; న హి వారుణియా వేగో, నరేన సుస్సహోరివ; (సీ.)] వేగో నరేన సుసహోరివ [యం వే పిత్వా పత్తక్ఖన్ధా, సయన్తి గావో కూటహతారివ; న హి వారుణియా వేగో, నరేన సుస్సహోరివ; (సీ.)], తస్సా పుణ్ణం కుమ్భమిమం కిణాథ.

౫౬. యం మనుస్సా వివజ్జేన్తి, సప్పం ఘోరవిసం మివ [విసమివ (స్యా.), విసం ఇవ (క.), విసామివ (?)];

తం లోకే విససమానం, కో నరో పాతుమరహతి.

౫౭. యం వే పిత్వా అన్ధకవేణ్డపుత్తా, సముద్దతీరే పరిచారయన్తా [అన్ధకవేణ్హుపుత్తా (సీ. పీ.), అణ్డకవేణ్డపుత్తా (క.)];

ఉపక్కముం ముసలేహఞ్ఞమఞ్ఞం, తస్సా పుణ్ణం కుమ్భమిమం కిణాథ.

౫౮. యం వే పిత్వా పుబ్బదేవా పమత్తా, తిదివా చుతా సస్సతియా సమాయ;

తం తాదిసం మజ్జమిమం నిరత్థకం, జానం మహారాజ కథం పివేయ్య.

౫౯. నయిమస్మిం కుమ్భస్మిం దధి వా మధు వా, ఏవం అభిఞ్ఞాయ కిణాహి రాజ;

ఏవఞ్హిమం కుమ్భగతా మయా తే, అక్ఖాతరూపం తవ సబ్బమిత్త.

౬౦. న మే పితా వా అథవాపి మాతా, ఏతాదిసా యాదిసకో తువంసి;

హితానుకమ్పీ పరమత్థకామో, సోహం కరిస్సం వచనం తవజ్జ.

౬౧. దదామి తే గామవరాని పఞ్చ, దాసీసతం సత్త గవం సతాని;

ఆజఞ్ఞయుత్తే చ రథే దస ఇమే, ఆచరియో హోసి మమత్థకామో.

౬౨. తవేవ దాసీసతమత్థు రాజ, గామా చ గావో చ తవేవ హోన్తు;

ఆజఞ్ఞయుత్తా చ రథా తవేవ, సక్కోహమస్మీ తిదసానమిన్దో.

౬౩. మంసోదనం సప్పిపాయాసం [సప్పిపాయఞ్చ (సీ.)] భుఞ్జ, ఖాదస్సు చ త్వం మధుమాసపూవే;

ఏవం తువం ధమ్మరతో జనిన్ద, అనిన్దితో సగ్గముపేహి ఠానన్తి.

కుమ్భజాతకం దుతియం.