౫౧౦. అయోఘరజాతకం (౧౪)

౩౬౩. యమేకరత్తిం పఠమం, గబ్భే వసతి మాణవో;

అబ్భుట్ఠితోవ సో యాతి [సయతి (సీ. పీ.), స యాతి (కత్థచి)], సగచ్ఛం న నివత్తతి.

౩౬౪. న యుజ్ఝమానా న బలేనవస్సితా, నరా న జీరన్తి న చాపి మియ్యరే;

సబ్బం హిదం [హి తం (సీ. పీ.)] జాతిజరాయుపద్దుతం, తం మే మతీ హోతి చరామి ధమ్మం.

౩౬౫. చతురఙ్గినిం సేనం సుభింసరూపం, జయన్తి రట్ఠాధిపతీ పసయ్హ;

న మచ్చునో జయితుముస్సహన్తి, తం మే మతీ హోతి చరామి ధమ్మం.

౩౬౬. హత్థీహి అస్సేహి రథేహి పత్తిభి, పరివారితా ముచ్చరే ఏకచ్చేయ్యా [ఏకచేయ్యా (సీ. పీ.)];

న మచ్చునో [న మచ్చుతో (సీ.)] ముచ్చితుముస్సహన్తి, తం మే మతీ హోతి చరామి ధమ్మం.

౩౬౭. హత్థీహి అస్సేహి రథేహి పత్తిభి, సూరా [పురా (క.)] పభఞ్జన్తి పధంసయన్తి;

న మచ్చునో భఞ్జితుముస్సహన్తి, తం మే మతీ హోతి చరామి ధమ్మం.

౩౬౮. మత్తా గజా భిన్నగళా [పభిన్నగలా (సీ.)] పభిన్నా, నగరాని మద్దన్తి జనం హనన్తి;

న మచ్చునో మద్దితుముస్సహన్తి, తం మే మతీ హోతి చరామి ధమ్మం.

౩౬౯. ఇస్సాసినో కతహత్థాపి వీరా [వీరా (సీ. పీ.)], దూరేపాతీ [పతీ (క.)] అక్ఖణవేధినోపి;

న మచ్చునో విజ్ఝితుముస్సహన్తి, తం మే మతీ హోతి చరామి ధమ్మం.

౩౭౦. సరాని ఖీయన్తి ససేలకాననా, సబ్బం హిదం [హి తం (సీ. పీ.), పితం (స్యా.)] ఖీయతి దీఘమన్తరం;

సబ్బం హిదం [హి తం (సీ. పీ.), పితం (స్యా.)] భఞ్జరే కాలపరియాయం, తం మే మతీ హోతి చరామి ధమ్మం.

౩౭౧. సబ్బే సమేవం హి నరాననారినం [నరానరీనం (పీ.), నారీ నరానం (స్యా.), నరనారీనం (క.)], చలాచలం పాణభునోధ జీవితం;

పటోవ ధుత్తస్స దుమోవ కూలజో, తం మే మతీ హోతి చరామి ధమ్మం.

౩౭౨. దుమప్ఫలానేవ పతన్తి మాణవా, దహరా చ వుద్ధా చ సరీరభేదా;

నారియో నరా మజ్ఝిమపోరిసా చ, తం మే మతీ హోతి చరామి ధమ్మం.

౩౭౩. నాయం వయో తారకరాజసన్నిభో, యదబ్భతీతం గతమేవ దాని తం;

జిణ్ణస్స హీ నత్థి రతీ కుతో సుఖం, తం మే మతీ హోతి చరామి ధమ్మం.

౩౭౪. యక్ఖా పిసాచా అథవాపి పేతా, కుపితాతే [కుపితాపి తే (సీ. పీ.)] అస్ససన్తి మనుస్సే;

న మచ్చునో అస్ససితుస్సహన్తి, తం మే మతీ హోతి చరామి ధమ్మం.

౩౭౫. యక్ఖే పిసాచే అథవాపి పేతే, కుపితేపి తే నిజ్ఝపనం కరోన్తి;

న మచ్చునో నిజ్ఝపనం కరోన్తి, తం మే మతీ హోతి చరామి ధమ్మం.

౩౭౬. అపరాధకే దూసకే హేఠకే చ, రాజానో దణ్డేన్తి విదిత్వాన దోసం;

న మచ్చునో దణ్డయితుస్సహన్తి, తం మే మతీ హోతి చరామి ధమ్మం.

౩౭౭. అపరాధకా దూసకా హేట్ఠకా చ, లభన్తి తే రాజినో నిజ్ఝపేతుం;

న మచ్చునో నిజ్ఝపనం కరోన్తి, తం మే మతీ హోతి చరామి ధమ్మం.

౩౭౮. న ఖత్తియోతి న చ బ్రాహ్మణోతి, న అడ్ఢకా బలవా తేజవాపి;

న మచ్చురాజస్స అపేక్ఖమత్థి, తం మే మతీ హోతి చరామి ధమ్మం.

౩౭౯. సీహా చ బ్యగ్ఘా చ అథోపి దీపియో, పసయ్హ ఖాదన్తి విప్ఫన్దమానం;

న మచ్చునో ఖాదితుముస్సహన్తి, తం మే మతీ హోతి చరామి ధమ్మం.

౩౮౦. మాయాకారా రఙ్గమజ్ఝే కరోన్తా, మోహేన్తి చక్ఖూని జనస్స తావదే;

న మచ్చునో మోహయితుస్సహన్తి, తం మే మతీ హోతి చరామి ధమ్మం.

౩౮౧. ఆసీవిసా కుపితా ఉగ్గతేజా, డంసన్తి మారేన్తిపి తే మనుస్సే;

న మచ్చునో డంసితుముస్సహన్తి, తం మే మతీ హోతి చరామి ధమ్మం.

౩౮౨. ఆసీవిసా కుపితా యం డంసన్తి, తికిచ్ఛకా తేస విసం హనన్తి;

న మచ్చునో దట్ఠవిసం [దట్ఠస్స విసం (క.)] హనన్తి, తం మే మతీ హోతి చరామి ధమ్మం.

౩౮౩. ధమ్మన్తరీ వేత్తరణీ [వేతరణీ (సీ. పీ.)] చ భోజో, విసాని హన్త్వాన భుజఙ్గమానం;

సుయ్యన్తి తే కాలకతా తథేవ, తం మే మతీ హోతి చరామి ధమ్మం.

౩౮౪. విజ్జాధరా ఘోరమధీయమానా, అదస్సనం ఓసధేహి వజన్తి;

న మచ్చురాజస్స వజన్తదస్సనం [వజన్తి అదస్సనం (స్యా. క.)], తం మే మతీ హోతి చరామి ధమ్మం.

౩౮౫. ధమ్మో హవే రక్ఖతి ధమ్మచారిం, ధమ్మో సుచిణ్ణో సుఖమావహాతి;

ఏసానిసంసో ధమ్మే సుచిణ్ణే, న దుగ్గతిం గచ్ఛతి ధమ్మచారీ.

౩౮౬. న హి ధమ్మో అధమ్మో చ, ఉభో సమవిపాకినో;

అధమ్మో నిరయం నేతి, ధమ్మో పాపేతి సుగ్గతిన్తి.

అయోఘరజాతకం చుద్దసమం.

తస్సుద్దానం –

మాతఙ్గ సమ్భూత సివి సిరిమన్తో, రోహణ హంస సత్తిగుమ్బో భల్లాతియ;

సోమనస్స చమ్పేయ్య బ్రహ్మ పఞ్చ-పణ్డిత చిరస్సంవత అయోఘరాతి.

వీసతినిపాతం నిట్ఠితం.