౫౦౩. సత్తిగుమ్బజాతకం (౭)

౧౫౯. మిగలుద్దో మహారాజా, పఞ్చాలానం రథేసభో;

నిక్ఖన్తో సహ సేనాయ, ఓగణో వనమాగమా.

౧౬౦. తత్థద్దసా అరఞ్ఞస్మిం, తక్కరానం కుటిం కతం;

తస్సా [తస్మా (స్యా. పీ. క.)] కుటియా నిక్ఖమ్మ, సువో లుద్దాని భాసతి.

౧౬౧. సమ్పన్నవాహనో పోసో, యువా సమ్మట్ఠకుణ్డలో [కుణ్డలీ (స్యా. క.)];

సోభతి లోహితుణ్హీసో, దివా సూరియోవ భాసతి.

౧౬౨. మజ్ఝన్హికే [మజ్ఝన్తికే (సబ్బత్థ)] సమ్పతికే, సుత్తో రాజా ససారథి;

హన్దస్సాభరణం సబ్బం, గణ్హామ సాహసా [సహసా (సీ. స్యా. పీ.)] మయం.

౧౬౩. నిసీథేపి రహో దాని, సుత్తో రాజా ససారథి;

ఆదాయ వత్థం మణికుణ్డలఞ్చ, హన్త్వాన సాఖాహి అవత్థరామ.

౧౬౪. కిన్ను ఉమ్మత్తరూపోవ, సత్తిగుమ్బ పభాససి;

దురాసదా హి రాజానో, అగ్గి పజ్జలితో యథా.

౧౬౫. అథ త్వం పతికోలమ్బ, మత్తో థుల్లాని గజ్జసి;

మాతరి మయ్హం నగ్గాయ, కిన్ను త్వం విజిగుచ్ఛసే.

౧౬౬. ఉట్ఠేహి సమ్మ తరమానో, రథం యోజేహి సారథి;

సకుణో మే న రుచ్చతి, అఞ్ఞం గచ్ఛామ అస్సమం.

౧౬౭. యుత్తో రథో మహారాజ, యుత్తో చ బలవాహనో;

అధితిట్ఠ మహారాజ, అఞ్ఞం గచ్ఛామ అస్సమం.

౧౬౮. కో నుమేవ గతా [క్వ ను’మే’పగతా (?)] సబ్బే, యే అస్మిం పరిచారకా;

ఏస గచ్ఛతి పఞ్చాలో, ముత్తో తేసం అదస్సనా.

౧౬౯. కోదణ్డకాని గణ్హథ, సత్తియో తోమరాని చ;

ఏస గచ్ఛతి పఞ్చాలో, మా వో ముఞ్చిత్థ జీవతం [జీవితం (బహూసు)].

౧౭౦. అథాపరో పటినన్దిత్థ, సువో లోహితతుణ్డకో;

స్వాగతం తే మహారాజ, అథో తే అదురాగతం;

ఇస్సరోసి అనుప్పత్తో, యం ఇధత్థి పవేదయ.

౧౭౧. తిన్దుకాని పియాలాని, మధుకే కాసుమారియో;

ఫలాని ఖుద్దకప్పాని, భుఞ్జ రాజ వరం వరం.

౧౭౨. ఇదమ్పి పానీయం సీతం, ఆభతం గిరిగబ్భరా;

తతో పివ మహారాజ, సచే త్వం అభికఙ్ఖసి.

౧౭౩. అరఞ్ఞం ఉఞ్ఛాయ గతా, యే అస్మిం పరిచారకా;

సయం ఉట్ఠాయ గణ్హవ్హో, హత్థా మే నత్థి దాతవే.

౧౭౪. భద్దకో వతయం పక్ఖీ, దిజో పరమధమ్మికో;

అథేసో ఇతరో పక్ఖీ, సువో లుద్దాని భాసతి.

౧౭౫. ‘‘ఏతం హనథ బన్ధథ, మా వో ముఞ్చిత్థ జీవతం’’;

ఇచ్చేవం విలపన్తస్స, సోత్థిం [సోత్థీ (స్యా.)] పత్తోస్మి అస్సమం.

౧౭౬. భాతరోస్మ మహారాజ, సోదరియా ఏకమాతుకా;

ఏకరుక్ఖస్మిం సంవడ్ఢా, నానాఖేత్తగతా ఉభో.

౧౭౭. సత్తిగుమ్బో చ చోరానం, అహఞ్చ ఇసీనం ఇధ;

అసతం సో, సతం అహం, తేన ధమ్మేన నో వినా.

౧౭౮. తత్థ వధో చ బన్ధో చ, నికతీ వఞ్చనాని చ;

ఆలోపా సాహసాకారా, తాని సో తత్థ సిక్ఖతి.

౧౭౯. ఇధ సచ్చఞ్చ ధమ్మో చ, అహింసా సంయమో దమో;

ఆసనూదకదాయీనం, అఙ్కే వద్ధోస్మి భారధ [భారత (సీ. స్యా. పీ.)].

౧౮౦. యం యఞ్హి రాజ భజతి, సన్తం వా యది వా అసం;

సీలవన్తం విసీలం వా, వసం తస్సేవ గచ్ఛతి.

౧౮౧. యాదిసం కురుతే మిత్తం, యాదిసం చూపసేవతి;

సోపి తాదిసకో హోతి, సహవాసో హి [సహవాసోపి (స్యా. క.)] తాదిసో.

౧౮౨. సేవమానో సేవమానం, సమ్ఫుట్ఠో సమ్ఫుసం పరం;

సరో దిద్ధో కలాపంవ, అలిత్తముపలిమ్పతి;

ఉపలేపభయా [ఉపలిమ్పభయా (స్యా. క.)] ధీరో, నేవ పాపసఖా సియా.

౧౮౩. పూతిమచ్ఛం కుసగ్గేన, యో నరో ఉపనయ్హతి;

కుసాపి పూతి [పూతీ (సీ. పీ.)] వాయన్తి, ఏవం బాలూపసేవనా.

౧౮౪. తగరఞ్చ పలాసేన, యో నరో ఉపనయ్హతి;

పత్తాపి సురభి [సురభీ (సీ. స్యా. పీ.)] వాయన్తి, ఏవం ధీరూపసేవనా.

౧౮౫. తస్మా పత్తపుటస్సేవ [ఫలపుటస్సేవ (సీ. పీ.), పలపుటస్సేవ (క. అట్ఠ.), పలాసపుటస్సేవ (స్యా. క.)], ఞత్వా సమ్పాకమత్తనో;

అసన్తే నోపసేవేయ్య, సన్తే సేవేయ్య పణ్డితో;

అసన్తో నిరయం నేన్తి, సన్తో పాపేన్తి సుగ్గతిన్తి.

సత్తిగుమ్బజాతకం సత్తమం.