౫౦౪. భల్లాతియజాతకం (౮)

౧౮౬. భల్లాతియో [భల్లాటియో (సీ. పీ.)] నామ అహోసి రాజా, రట్ఠం పహాయ మిగవం అచారి సో;

అగమా గిరివరం గన్ధమాదనం, సుపుప్ఫితం [సమ్పుప్ఫితం (సీ. పీ.)] కిమ్పురిసానుచిణ్ణం.

౧౮౭. సాళూరసఙ్ఘఞ్చ నిసేధయిత్వా, ధనుం [ధను (సీ. స్యా. పీ.)] కలాపఞ్చ సో నిక్ఖిపిత్వా;

ఉపాగమి వచనం వత్తుకామో, యత్థట్ఠితా కిమ్పురిసా అహేసుం.

౧౮౮. హిమచ్చయే హేమవతాయ తీరే, కిమిధట్ఠితా మన్తయవ్హో అభిణ్హం;

పుచ్ఛామి వో మానుసదేహవణ్ణే, కథం ను [కథం వో (సీ. స్యా. పీ.)] జానన్తి మనుస్సలోకే.

౧౮౯. మల్లం గిరిం పణ్డరకం తికూటం, సీతోదకా [సీతోదియా (సీ. పీ.), సీతోదికా (?)] అనువిచరామ నజ్జో;

మిగా మనుస్సావ నిభాసవణ్ణా, జానన్తి నో కిమ్పురిసాతి లుద్ద.

౧౯౦. సుకిచ్ఛరూపం పరిదేవయవ్హో [పరిదేవథవ్హో (?) మోగ్గల్లానబ్యాకరణే ౬.౩౮ సుత్తం], ఆలిఙ్గితో చాసి పియో పియాయ;

పుచ్ఛామి వో మానుసదేహవణ్ణే, కిమిధ వనే రోదథ అప్పతీతా.

౧౯౧. సుకిచ్ఛరూపం పరిదేవయవ్హో, ఆలిఙ్గితో చాసి పియో పియాయ;

పుచ్ఛామి వో మానుసదేహవణ్ణే, కిమిధ వనే విలపథ అప్పతీతా.

౧౯౨. సుకిచ్ఛరూపం పరిదేవయవ్హో, ఆలిఙ్గితో చాసి పియో పియాయ;

పుచ్ఛామి వో మానుసదేహవణ్ణే, కిమిధ వనే సోచథ అప్పతీతా.

౧౯౩. మయేకరత్తం [రత్తిం (పీ.)] విప్పవసిమ్హ లుద్ద, అకామకా అఞ్ఞమఞ్ఞం సరన్తా;

తమేకరత్తం అనుతప్పమానా, సోచామ ‘‘సా రత్తి పునం న హేస్సతి’’.

౧౯౪. యమేకరత్తం అనుతప్పథేతం, ధనం వ నట్ఠం పితరం వ పేతం;

పుచ్ఛామి వో మానుసదేహవణ్ణే, కథం వినా వాసమకప్పయిత్థ.

౧౯౫. యమిమం [యయిమం (క. సీ.)] నదిం పస్ససి సీఘసోతం, నానాదుమచ్ఛాదనం సేలకూలం [దుమచ్ఛదనం సేలకూటం (సీ. పీ.), దుమసఞ్ఛన్నం సేలకూలం (క.)];

తం మే పియో ఉత్తరి వస్సకాలే, మమఞ్చ మఞ్ఞం అనుబన్ధతీతి.

౧౯౬. అహఞ్చ అఙ్కోలకమోచినామి, అతిముత్తకం సత్తలియోథికఞ్చ;

‘‘పియో చ మే హేహితి మాలభారీ, అహఞ్చ నం మాలినీ అజ్ఝుపేస్సం’’.

౧౯౭. అహఞ్చిదం కురవకమోచినామి, ఉద్దాలకా పాటలిసిన్ధువారకా [సిన్ధువారితా (స్యా. పీ. క.)];

‘‘పియో చ మే హేహితి మాలభారీ, అహఞ్చ నం మాలినీ అజ్ఝుపేస్సం’’.

౧౯౮. అహఞ్చ సాలస్స సుపుప్ఫితస్స, ఓచేయ్య పుప్ఫాని కరోమి మాలం;

‘‘పియో చ మే హేహితి మాలభారీ, అహఞ్చ నం మాలినీ అజ్ఝుపేస్సం’’.

౧౯౯. అహఞ్చ సాలస్స సుపుప్ఫితస్స, ఓచేయ్య పుప్ఫాని కరోమి భారం;

ఇదఞ్చ నో హేహితి సన్థరత్థం, యత్థజ్జిమం [యత్థజ్జమం (సీ. పీ.)] విహరిస్సామ [విహరిస్సాము (పీ.)] రత్తిం.

౨౦౦. అహఞ్చ ఖో అగళుం [అగ్గలు (స్యా. క.), అకలుం (పీ.)] చన్దనఞ్చ, సిలాయ పింసామి పమత్తరూపా;

‘‘పియో చ మే హేహితి రోసితఙ్గో, అహఞ్చ నం రోసితా అజ్ఝుపేస్సం’’.

౨౦౧. అథాగమా సలిలం సీఘసోతం, నుదం సాలే సలళే కణ్ణికారే;

ఆపూరథ [అపూరథ (సీ. పీ.), ఆపూరథే (స్యా.)] తేన ముహుత్తకేన, సాయం నదీ ఆసి మయా సుదుత్తరా.

౨౦౨. ఉభోసు తీరేసు మయం తదా ఠితా, సమ్పస్సన్తా ఉభయో అఞ్ఞమఞ్ఞం;

సకిమ్పి రోదామ సకిం హసామ, కిచ్ఛేన నో ఆగమా [అగమా (సీ. స్యా. పీ.)] సంవరీ సా.

౨౦౩. పాతోవ [పాతో చ (సీ. స్యా. పీ.)] ఖో ఉగ్గతే సూరియమ్హి, చతుక్కం నదిం ఉత్తరియాన లుద్ద;

ఆలిఙ్గియా అఞ్ఞమఞ్ఞం మయం ఉభో, సకిమ్పి రోదామ సకిం హసామ.

౨౦౪. తీహూనకం సత్తసతాని లుద్ద, యమిధ మయం విప్పవసిమ్హ పుబ్బే;

వస్సేకిమం [వాసేకిమం (సీ. పీ.)] జీవితం భూమిపాల, కో నీధ కన్తాయ వినా వసేయ్య.

౨౦౫. ఆయుఞ్చ వో కీవతకో ను సమ్మ, సచేపి జానాథ వదేథ ఆయుం;

అనుస్సవా వుడ్ఢతో ఆగమా వా, అక్ఖాథ మే తం అవికమ్పమానా.

౨౦౬. ఆయుఞ్చ నో వస్ససహస్సం లుద్ద, న చన్తరా పాపకో అత్థి రోగో;

అప్పఞ్చ [అప్పంవ (స్యా. క.)] దుక్ఖం సుఖమేవ భియ్యో, అవీతరాగా విజహామ జీవితం.

౨౦౭. ఇదఞ్చ సుత్వాన అమానుసానం, భల్లాతియో ఇత్తర జీవితన్తి;

నివత్తథ న మిగవం అచరి, అదాసి దానాని అభుఞ్జి భోగే.

౨౦౮. ఇదఞ్చ సుత్వాన అమానుసానం, సమ్మోదథ మా కలహం అకత్థ;

మా వో తపీ అత్తకమ్మాపరాధో, యథాపి తే కిమ్పురిసేకరత్తం.

౨౦౯. ఇదఞ్చ సుత్వాన అమానుసానం, సమ్మోదథ మా వివాదం అకత్థ;

మా వో తపీ అత్తకమ్మాపరాధో, యథాపి తే కిమ్పురిసేకరత్తం.

౨౧౦. వివిధం [వివిధ (సీ. స్యా.)] అధిమనా సుణోమహం, వచనపథం తవ అత్థసంహితం;

ముఞ్చం [ముఞ్చ (సీ. పీ.)] గిరం నుదసేవ మే దరం, సమణ సుఖావహ జీవ మే చిరన్తి.

భల్లాతియజాతకం అట్ఠమం.