౪౭౩. మిత్తామిత్తజాతకం (౧౦)

౧౨౧. కాని కమ్మాని కుబ్బానం, కథం విఞ్ఞూ పరక్కమే;

అమిత్తం జానేయ్య మేధావీ, దిస్వా సుత్వా చ పణ్డితో.

౧౨౨. న నం ఉమ్హయతే దిస్వా, న చ నం పటినన్దతి;

చక్ఖూని చస్స [చక్ఖూనిస్స (స్యా. క.)] న దదాతి, పటిలోమఞ్చ వత్తతి.

౧౨౩. అమిత్తే తస్స భజతి, మిత్తే తస్స న సేవతి;

వణ్ణకామే నివారేతి, అక్కోసన్తే పసంసతి.

౧౨౪. గుయ్హఞ్చ తస్స నక్ఖాతి, తస్స గుయ్హం న గూహతి;

కమ్మం తస్స న వణ్ణేతి, పఞ్ఞస్స నప్పసంసతి.

౧౨౫. అభవే నన్దతి తస్స, భవే తస్స న నన్దతి;

అచ్ఛేరం [అచ్ఛరియం (సీ. స్యా. పీ.)] భోజనం లద్ధా, తస్స నుప్పజ్జతే సతి;

తతో నం నానుకమ్పతి, అహో సోపి [అహాసోపి (క. సీ. స్యా. క.)] లభేయ్యితో.

౧౨౬. ఇచ్చేతే సోళసాకారా, అమిత్తస్మిం పతిట్ఠితా;

యేహి అమిత్తం జానేయ్య, దిస్వా సుత్వా చ పణ్డితో.

౧౨౭. కాని కమ్మాని కుబ్బానం, కథం విఞ్ఞూ పరక్కమే;

మిత్తం జానేయ్య మేధావీ, దిస్వా సుత్వా చ పణ్డితో.

౧౨౮. పవుత్థం తస్స సరతి, ఆగతం అభినన్దతి;

తతో కేలాయితో హోతి, వాచాయ పటినన్దతి.

౧౨౯. మిత్తే తస్సేవ భజతి, అమిత్తే తస్స న సేవతి;

అక్కోసన్తే నివారేతి, వణ్ణకామే పసంసతి.

౧౩౦. గుయ్హఞ్చ తస్స అక్ఖాతి, తస్స గుయ్హఞ్చ గూహతి;

కమ్మఞ్చ తస్స వణ్ణేతి, పఞ్ఞం తస్స [పఞ్ఞమస్స (స్యా. క.)] పసంసతి.

౧౩౧. భవే చ నన్దతి తస్స [భవే నన్దతి తస్స చ (క.)], అభవే తస్స న నన్దతి;

అచ్ఛేరం [అచ్ఛరియం (సీ. స్యా. పీ.)] భోజనం లద్ధా, తస్స ఉప్పజ్జతే సతి;

తతో నం అనుకమ్పతి, అహో సోపి [పహాసోపి (క. సీ. స్యా. క.)] లభేయ్యితో.

౧౩౨. ఇచ్చేతే సోళసాకారా, మిత్తస్మిం సుప్పతిట్ఠితా;

యేహి మిత్తఞ్చ జానేయ్య [మిత్తం సుజానేయ్య (పీ. క.)], దిస్వా సుత్వా చ పణ్డితోతి.

మిత్తామిత్తజాతకం దసమం.

ద్వాదసకనిపాతం నిట్ఠితం.