౪౬౧. దసరథజాతకం (౭)

౮౪. ఏథ లక్ఖణ సీతా చ, ఉభో ఓతరథోదకం;

ఏవాయం భరతో ఆహ, ‘‘రాజా దసరథో మతో’’.

౮౫. కేన రామప్పభావేన, సోచితబ్బం న సోచసి;

పితరం కాలకతం [కాలఙ్కతం (క.)] సుత్వా, న తం పసహతే దుఖం.

౮౬. యం న సక్కా నిపాలేతుం, పోసేన లపతం బహుం;

స కిస్స విఞ్ఞూ మేధావీ, అత్తానముపతాపయే.

౮౭. దహరా చ హి వుద్ధా చ [యే వుద్ధా (సీ. అట్ఠ.), యే వుడ్ఢా (స్యా.)], యే బాలా యే చ పణ్డితా;

అడ్ఢా చేవ దలిద్దా చ, సబ్బే మచ్చుపరాయణా.

౮౮. ఫలానమివ పక్కానం, నిచ్చం పతనతో భయం;

ఏవం జాతాన మచ్చానం, నిచ్చ మరణతో భయం.

౮౯. సాయమేకే న దిస్సన్తి, పాతో దిట్ఠా బహుజ్జనా;

పాతో ఏకే న దిస్సన్తి, సాయం దిట్ఠా బహుజ్జనా.

౯౦. పరిదేవయమానో చే, కిఞ్చిదత్థం ఉదబ్బహే;

సమ్మూళ్హో హింసమత్తానం, కయిరా తం విచక్ఖణో.

౯౧. కిసో వివణ్ణో భవతి, హింసమత్తానమత్తనో [మత్తనా (సీ. అట్ఠ. సు. ని. ౫౯౦)];

న తేన పేతా పాలేన్తి, నిరత్థా పరిదేవనా.

౯౨. యథా సరణమాదిత్తం, వారినా పరినిబ్బయే [వారినావనిబ్బాపయే (స్యా. క.)];

ఏవమ్పి ధీరో సుతవా, మేధావీ పణ్డితో నరో;

ఖిప్పముప్పతితం సోకం, వాతో తూలంవ ధంసయే.

౯౩. మచ్చో ఏకోవ [ఏకోవ మచ్చో (సీ. స్యా. పీ.)] అచ్చేతి, ఏకోవ జాయతే కులే;

సంయోగపరమాత్వేవ, సమ్భోగా సబ్బపాణినం.

౯౪. తస్మా హి ధీరస్స బహుస్సుతస్స, సమ్పస్సతో లోకమిమం పరఞ్చ;

అఞ్ఞాయ ధమ్మం హదయం మనఞ్చ, సోకా మహన్తాపి న తాపయన్తి.

౯౫. సోహం దస్సఞ్చ భోక్ఖఞ్చ, భరిస్సామి చ [సోహం యసఞ్చ భోగఞ్చ, భరియాపి చ (స్యా. క.)] ఞాతకే;

సేసఞ్చ పాలయిస్సామి, కిచ్చమేతం [కిచ్చమేవం (పీ.)] విజానతో.

౯౬. దస వస్ససహస్సాని, సట్ఠి వస్ససతాని చ;

కమ్బుగీవో మహాబాహు, రామో రజ్జమకారయీతి.

దసరథజాతకం సత్తమం.