౪౬౨. సంవరజాతకం (౮)

౯౭. జానన్తో నో మహారాజ, తవ సీలం జనాధిపో;

ఇమే కుమారే పూజేన్తో, న తం కేనచి మఞ్ఞథ.

౯౮. తిట్ఠన్తే నో మహారాజే, అదు [ఆదు (సీ. పీ.), ఆదూ (స్యా.)] దేవే దివఙ్గతే;

ఞాతీ తం సమనుఞ్ఞింసు, సమ్పస్సం అత్థమత్తనో.

౯౯. కేన సంవరవత్తేన, సఞ్జాతే అభితిట్ఠసి;

కేన తం నాతివత్తన్తి, ఞాతిసఙ్ఘా సమాగతా.

౧౦౦. న రాజపుత్త ఉసూయామి [రాజపుత్త నుస్సుయ్యామి (క.)], సమణానం మహేసినం;

సక్కచ్చం తే నమస్సామి, పాదే వన్దామి తాదినం.

౧౦౧. తే మం ధమ్మగుణే యుత్తం, సుస్సూసమనుసూయకం;

సమణా మనుసాసన్తి [సమనుసాసన్తి (సీ. స్యా. పీ.)], ఇసీ ధమ్మగుణే రతా.

౧౦౨. తేసాహం వచనం సుత్వా, సమణానం మహేసినం;

న కిఞ్చి అతిమఞ్ఞామి, ధమ్మే మే నిరతో మనో.

౧౦౩. హత్థారోహా అనీకట్ఠా, రథికా పత్తికారకా;

తేసం [తేసు (పీ.)] నప్పటిబన్ధామి, నివిట్ఠం [నిబద్ధం (సీ. పీ.)] భత్తవేతనం.

౧౦౪. మహామత్తా చ మే అత్థి, మన్తినో పరిచారకా;

బారాణసిం వోహరన్తి, బహుమంససురోదకం.

౧౦౫. అథోపి వాణిజా ఫీతా, నానారట్ఠేహి ఆగతా;

తేసు మే విహితా రక్ఖా, ఏవం జానాహుపోసథ.

౧౦౬. ధమ్మేన కిర ఞాతీనం, రజ్జం కారేహి సంవర;

మేధావీ పణ్డితో చాసి [చాపి (సీ. పీ.)], అథోపి ఞాతినం హితో.

౧౦౭. తం తం ఞాతిపరిబ్యూళ్హం, నానారతనమోచితం;

అమిత్తా నప్పసహన్తి, ఇన్దంవ అసురాధిపోతి.

సంవరజాతకం అట్ఠమం.