౪౫౪. ఘటపణ్డితజాతకం (౧౬)

౧౬౫. ఉట్ఠేహి కణ్హ కిం సేసి, కో అత్థో సుపనేన తే;

యోపి తుయ్హం [తాయం (పీ.)] సకో భాతా, హదయం చక్ఖు చ [చక్ఖుంవ (పీ.)] దక్ఖిణం;

తస్స వాతా బలీయన్తి, ఘటో జప్పతి [ససం జప్పతి (?)] కేసవ.

౧౬౬. తస్స తం వచనం సుత్వా, రోహిణేయ్యస్స కేసవో;

తరమానరూపో వుట్ఠాసి, భాతుసోకేన అట్టితో.

౧౬౭. కిం ను ఉమ్మత్తరూపోవ, కేవలం ద్వారకం ఇమం;

ససో ససోతి లపసి, కో ను తే ససమాహరి.

౧౬౮. సోవణ్ణమయం మణీమయం, లోహమయం అథ రూపియామయం;

సఙ్ఖసిలాపవాళమయం, కారయిస్సామి తే ససం.

౧౬౯. సన్తి అఞ్ఞేపి ససకా, అరఞ్ఞే వనగోచరా;

తేపి తే ఆనయిస్సామి, కీదిసం ససమిచ్ఛసి.

౧౭౦. న చాహమేతే [న చాహమేతం (సీ.), న వాహమేతే (స్యా.), న వాహమేతం (పీ.)] ఇచ్ఛామి, యే ససా పథవిస్సితా [పఠవింసితా (సీ. స్యా. పీ.)];

చన్దతో ససమిచ్ఛామి, తం మే ఓహర కేసవ.

౧౭౧. సో నూన మధురం ఞాతి, జీవితం విజహిస్ససి;

అపత్థియం యో పత్థయసి, చన్దతో ససమిచ్ఛసి.

౧౭౨. ఏవం చే కణ్హ జానాసి, యదఞ్ఞమనుసాససి;

కస్మా పురే మతం పుత్తం, అజ్జాపి మనుసోచసి.

౧౭౩. యం న లబ్భా మనుస్సేన, అమనుస్సేన వా పున [పన (పే. వ. ౨౧౫)];

జాతో మే మా మరీ పుత్తో, కుతో లబ్భా అలబ్భియం.

౧౭౪. న మన్తా మూలభేసజ్జా, ఓసధేహి ధనేన వా;

సక్కా ఆనయితుం కణ్హ, యం పేతమనుసోచసి.

౧౭౫. యస్స ఏతాదిసా అస్సు, అమచ్చా పురిసపణ్డితా;

యథా నిజ్ఝాపయే అజ్జ, ఘటో పురిసపణ్డితో.

౧౭౬. ఆదిత్తం వత మం సన్తం, ఘతసిత్తంవ పావకం;

వారినా వియ ఓసిఞ్చం, సబ్బం నిబ్బాపయే దరం.

౧౭౭. అబ్బహీ వత మే సల్లం, యమాసి హదయస్సితం;

యో మే సోకపరేతస్స, పుత్తసోకం అపానుది.

౧౭౮. సోహం అబ్బూళ్హసల్లోస్మి, వీతసోకో అనావిలో;

న సోచామి న రోదామి, తవ సుత్వాన మాణవ [భాతిక (పే. వ. ౨౨౪)].

౧౭౯. ఏవం కరోన్తి సప్పఞ్ఞా, యే హోన్తి అనుకమ్పకా;

నివత్తయన్తి సోకమ్హా, ఘటో జేట్ఠంవ భాతరన్తి.

ఘటపణ్డితజాతకం సోళసమం.

దసకనిపాతం నిట్ఠితం.