౯. తణ్హాసుత్తం

౫౮. వుత్తఞ్హేతం భగవతా, వుత్తమరహతాతి మే సుతం –

‘‘తిస్సో ఇమా, భిక్ఖవే, తణ్హా. కతమా తిస్సో? కామతణ్హా, భవతణ్హా, విభవతణ్హా – ఇమా ఖో, భిక్ఖవే, తిస్సో తణ్హా’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘తణ్హాయోగేన సంయుత్తా, రత్తచిత్తా భవాభవే;

తే యోగయుత్తా మారస్స, అయోగక్ఖేమినో జనా;

సత్తా గచ్ఛన్తి సంసారం, జాతీమరణగామినో.

‘‘యే చ తణ్హం పహన్త్వాన, వీతతణ్హా [నిక్కణ్హా చ (సీ. క.)] భవాభవే;

తే వే [తే చ (సీ. పీ. క.)] పారఙ్గతా [పారగతా (క. సీ. స్యా.)] లోకే, యే పత్తా ఆసవక్ఖయ’’న్తి.

అయమ్పి అత్థో వుత్తో భగవతా, ఇతి మే సుతన్తి. నవమం.