౬. దుతియఏసనాసుత్తం

౫౫. వుత్తఞ్హేతం భగవతా, వుత్తమరహతాతి మే సుతం –

‘‘తిస్సో ఇమా, భిక్ఖవే, ఏసనా. కతమా తిస్సో? కామేసనా, భవేసనా, బ్రహ్మచరియేసనా – ఇమా ఖో, భిక్ఖవే, తిస్సో ఏసనా’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘కామేసనా భవేసనా, బ్రహ్మచరియేసనా సహ;

ఇతి సచ్చపరామాసో, దిట్ఠిట్ఠానా సముస్సయా.

‘‘సబ్బరాగవిరత్తస్స, తణ్హక్ఖయవిముత్తినో;

ఏసనా పటినిస్సట్ఠా, దిట్ఠిట్ఠానా సమూహతా;

ఏసనానం ఖయా భిక్ఖు, నిరాసో అకథంకథీ’’తి.

అయమ్పి అత్థో వుత్తో భగవతా, ఇతి మే సుతన్తి. ఛట్ఠం.