౩. అయోఘరచరియా

౨౪. ‘‘పునాపరం యదా హోమి, కాసిరాజస్స అత్రజో;

అయోఘరమ్హి సంవడ్ఢో, నామేనాసి అయోఘరో.

౨౫. ‘‘దుక్ఖేన జీవితో లద్ధో, సంపీళే పతిపోసితో;

అజ్జేవ పుత్త పటిపజ్జ, కేవలం వసుధం ఇమం.

౨౬. ‘‘సరట్ఠకం సనిగమం, సజనం వన్దిత్వ ఖత్తియం;

అఞ్జలిం పగ్గహేత్వాన, ఇదం వచనమబ్రవిం.

౨౭. ‘‘‘యే కేచి మహియా సత్తా, హీనముక్కట్ఠమజ్ఝిమా;

నిరారక్ఖా సకే గేహే, వడ్ఢన్తి సకఞాతిభి.

౨౮. ‘‘‘ఇదం లోకే ఉత్తరియం, సంపీళే మమ పోసనం;

అయోఘరమ్హి సంవడ్ఢో, అప్పభే చన్దసూరియే.

౨౯. ‘‘‘పూతికుణపసమ్పుణ్ణా, ముచ్చిత్వా మాతు కుచ్ఛితో;

తతో ఘోరతరే దుక్ఖే, పున పక్ఖిత్తయోఘరే.

౩౦. ‘‘‘యదిహం తాదిసం పత్వా, దుక్ఖం పరమదారుణం;

రజ్జేసు యది రజ్జామి [రఞ్జామి (సీ.)], పాపానం ఉత్తమో సియం.

౩౧. ‘‘‘ఉక్కణ్ఠితోమ్హి కాయేన, రజ్జేనమ్హి అనత్థికో;

నిబ్బుతిం పరియేసిస్సం, యత్థ మం మచ్చు న మద్దియే’.

౩౨. ‘‘ఏవాహం చిన్తయిత్వాన, విరవన్తే మహాజనే;

నాగోవ బన్ధనం ఛేత్వా, పావిసిం కాననం వనం.

౩౩. ‘‘మాతాపితా న మే దేస్సా, నపి మే దేస్సం మహాయసం;

సబ్బఞ్ఞుతం పియం మయ్హం, తస్మా రజ్జం పరిచ్చజి’’న్తి.

అయోఘరచరియం తతియం.