౧. యుధఞ్జయచరియా

౧. ‘‘యదాహం అమితయసో, రాజపుత్తో యుధఞ్జయో;

ఉస్సావబిన్దుం సూరియాతపే, పతితం దిస్వాన సంవిజిం.

౨. ‘‘తఞ్ఞేవాధిపతిం కత్వా, సంవేగమనుబ్రూహయిం;

మాతాపితూ చ వన్దిత్వా, పబ్బజ్జమనుయాచహం.

౩. ‘‘యాచన్తి మం పఞ్జలికా, సనేగమా సరట్ఠకా;

‘అజ్జేవ పుత్త పటిపజ్జ, ఇద్ధం ఫీతం మహామహిం’.

౪. ‘‘సరాజకే సహోరోధే, సనేగమే సరట్ఠకే;

కరుణం పరిదేవన్తే, అనపేక్ఖోవ పరిచ్చజిం.

౫. ‘‘కేవలం పథవిం రజ్జం, ఞాతిపరిజనం యసం;

చజమానో న చిన్తేసిం, బోధియాయేవ కారణా.

౬. ‘‘మాతాపితా న మే దేస్సా, నపి మే దేస్సం మహాయసం;

సబ్బఞ్ఞుతం పియం మయ్హం, తస్మా రజ్జం పరిచ్చజి’’న్తి.

యుధఞ్జయచరియం పఠమం.