౯. అలీనసత్తుచరియా

౭౪. ‘‘పఞ్చాలరట్ఠే నగరవరే, కపిలాయం [కమ్పిలాయం (సీ.), కప్పిలాయం (స్యా.)] పురుత్తమే;

రాజా జయద్దిసో నామ, సీలగుణముపాగతో.

౭౫. ‘‘తస్స రఞ్ఞో అహం పుత్తో, సుతధమ్మో సుసీలవా;

అలీనసత్తో గుణవా, అనురక్ఖపరిజనో సదా.

౭౬. ‘‘పితా మే మిగవం గన్త్వా, పోరిసాదం ఉపాగమి;

సో మే పితుమగ్గహేసి, ‘భక్ఖోసి మమ మా చలి’.

౭౭. ‘‘తస్స తం వచనం సుత్వా, భీతో తసితవేధితో;

ఊరుక్ఖమ్భో అహు తస్స, దిస్వాన పోరిసాదకం.

౭౮. ‘‘మిగవం గహేత్వా ముఞ్చస్సు, కత్వా ఆగమనం పున;

బ్రాహ్మణస్స ధనం దత్వా, పితా ఆమన్తయీ మమం.

౭౯. ‘‘‘రజ్జం పుత్త పటిపజ్జ, మా పమజ్జి పురం ఇదం;

కతం మే పోరిసాదేన, మమ ఆగమనం పున’.

౮౦. ‘‘మాతాపితూ చ వన్దిత్వా, నిమ్మినిత్వాన అత్తనా;

నిక్ఖిపిత్వా ధనుం ఖగ్గం, పోరిసాదం ఉపాగమిం.

౮౧. ‘‘ససత్థహత్థూపగతం, కదాచి సో తసిస్సతి;

తేన భిజ్జిస్సతి సీలం, పరిత్తాసం [పరితాసం (సీ.)] కతే మయి.

౮౨. ‘‘సీలఖణ్డభయా మయ్హం, తస్స దేస్సం న బ్యాహరిం;

మేత్తచిత్తో హితవాదీ, ఇదం వచనమబ్రవిం.

౮౩. ‘‘‘ఉజ్జాలేహి మహాఅగ్గిం, పపతిస్సామి రుక్ఖతో;

త్వం పక్కకాలమఞ్ఞాయ [సుపక్కకాలమఞ్ఞాయ (పీ.)], భక్ఖయ మం పితామహ’.

౮౪. ‘‘ఇతి సీలవతం హేతు, నారక్ఖిం మమ జీవితం;

పబ్బాజేసిం చహం తస్స, సదా పాణాతిపాతిక’’న్తి.

అలీనసత్తుచరియం నవమం.