౧౦. సఙ్ఖపాలచరియా

౮౫. ‘‘పునాపరం యదా హోమి, సఙ్ఖపాలో మహిద్ధికో;

దాఠావుధో ఘోరవిసో, ద్విజివ్హో ఉరగాధిభూ.

౮౬. ‘‘చతుప్పథే మహామగ్గే, నానాజనసమాకులే;

చతురో అఙ్గే అధిట్ఠాయ, తత్థ వాసమకప్పయిం.

౮౭. ‘‘ఛవియా చమ్మేన మంసేన, నహారుఅట్ఠికేహి వా;

యస్స ఏతేన కరణీయం, దిన్నంయేవ హరాతు సో.

౮౮. ‘‘అద్దసంసు భోజపుత్తా, ఖరా లుద్దా అకారుణా;

ఉపగఞ్ఛుం మమం తత్థ, దణ్డముగ్గరపాణినో.

౮౯. ‘‘నాసాయ వినివిజ్ఝిత్వా, నఙ్గుట్ఠే పిట్ఠికణ్టకే;

కాజే ఆరోపయిత్వాన, భోజపుత్తా హరింసు మం.

౯౦. ‘‘ససాగరన్తం పథవిం, సకాననం సపబ్బతం;

ఇచ్ఛమానో చహం తత్థ, నాసావాతేన ఝాపయే.

౯౧. ‘‘సూలేహి వినివిజ్ఝన్తే, కోట్టయన్తేపి సత్తిభి;

భోజపుత్తే న కుప్పామి, ఏసా మే సీలపారమీ’’తి.

సఙ్ఖపాలచరియం దసమం.

హత్థినాగవగ్గో దుతియో.

తస్సుద్దానం –

హత్థినాగో భూరిదత్తో, చమ్పేయ్యో బోధి మహింసో;

రురు మాతఙ్గో ధమ్మో చ, అత్రజో చ జయద్దిసో.

ఏతే నవ సీలబలా, పరిక్ఖారా పదేసికా;

జీవితం పరిరక్ఖిత్వా, సీలాని అనురక్ఖిసం.

సఙ్ఖపాలస్స మే సతో, సబ్బకాలమ్పి జీవితం;

యస్స కస్సచి నియ్యత్తం, తస్మా సా సీలపారమీతి.

సీలపారమినిద్దేసో నిట్ఠితో.