౮. ధమ్మదేవపుత్తచరియా

౬౬. ‘‘పునాపరం యదా హోమి, మహాపక్ఖో మహిద్ధికో;

ధమ్మో నామ మహాయక్ఖో, సబ్బలోకానుకమ్పకో.

౬౭. ‘‘దసకుసలకమ్మపథే, సమాదపేన్తో మహాజనం;

చరామి గామనిగమం, సమిత్తో సపరిజ్జనో.

౬౮. ‘‘పాపో కదరియో యక్ఖో, దీపేన్తో దస పాపకే;

సోపేత్థ మహియా చరతి, సమిత్తో సపరిజ్జనో.

౬౯. ‘‘ధమ్మవాదీ అధమ్మో చ, ఉభో పచ్చనికా మయం;

ధురే ధురం ఘట్టయన్తా, సమిమ్హా పటిపథే ఉభో.

౭౦. ‘‘కలహో వత్తతీ భేస్మా, కల్యాణపాపకస్స చ;

మగ్గా ఓక్కమనత్థాయ, మహాయుద్ధో ఉపట్ఠితో.

౭౧. ‘‘యదిహం తస్స కుప్పేయ్యం, యది భిన్దే తపోగుణం;

సహపరిజనం తస్స, రజభూతం కరేయ్యహం.

౭౨. ‘‘అపిచాహం సీలరక్ఖాయ, నిబ్బాపేత్వాన మానసం;

సహ జనేనోక్కమిత్వా, పథం పాపస్స దాసహం.

౭౩. ‘‘సహ పథతో ఓక్కన్తే, కత్వా చిత్తస్స నిబ్బుతిం;

వివరం అదాసి పథవీ, పాపయక్ఖస్స తావదే’’తి.

ధమ్మదేవపుత్తచరియం అట్ఠమం.