౫. మహింసరాజచరియా

౩౭. ‘‘పునాపరం యదా హోమి, మహింసో పవనచారకో;

పవడ్ఢకాయో బలవా, మహన్తో భీమదస్సనో.

౩౮. ‘‘పబ్భారే గిరిదుగ్గే [వనదుగ్గే (సీ.)] చ, రుక్ఖమూలే దకాసయే;

హోతేత్థ ఠానం మహింసానం, కోచి కోచి తహిం తహిం.

౩౯. ‘‘విచరన్తో బ్రహారఞ్ఞే, ఠానం అద్దస భద్దకం;

తం ఠానం ఉపగన్త్వాన, తిట్ఠామి చ సయామి చ.

౪౦. ‘‘అథేత్థ కపిమాగన్త్వా, పాపో అనరియో లహు;

ఖన్ధే నలాటే భముకే, ముత్తేతి ఓహనేతితం.

౪౧. ‘‘సకిమ్పి దివసం దుతియం, తతియం చతుత్థమ్పి చ;

దూసేతి మం సబ్బకాలం, తేన హోమి ఉపద్దుతో.

౪౨. ‘‘మమం ఉపద్దుతం దిస్వా, యక్ఖో మం ఇదమబ్రవి;

‘నాసేహేతం ఛవం పాపం, సిఙ్గేహి చ ఖురేహి చ’.

౪౩. ‘‘ఏవం వుత్తే తదా యక్ఖే, అహం తం ఇదమబ్రవిం;

‘కిం త్వం మక్ఖేసి కుణపేన, పాపేన అనరియేన మం.

౪౪. ‘‘‘యదిహం తస్స పకుప్పేయ్యం, తతో హీనతరో భవే;

సీలఞ్చ మే పభిజ్జేయ్య, విఞ్ఞూ చ గరహేయ్యు మం.

౪౫. ‘‘‘హీళితా జీవితా వాపి, పరిసుద్ధేన మతం వరం;

క్యాహం జీవితహేతూపి, కాహామిం పరహేఠనం’.

౪౬. ‘‘మమేవాయం మఞ్ఞమానో, అఞ్ఞేపేవం కరిస్సతి;

తేవ తస్స వధిస్సన్తి, సా మే ముత్తి భవిస్సతి.

౪౭. ‘‘హీనమజ్ఝిమఉక్కట్ఠే, సహన్తో అవమానితం;

ఏవం లభతి సప్పఞ్ఞో, మనసా యథా పత్థిత’’న్తి.

మహింసరాజచరియం పఞ్చమం.