౬. రురురాజచరియా

౪౮. ‘‘పునాపరం యదా హోమి, సుతత్తకనకసన్నిభో;

మిగరాజా రురునామ, పరమసీలసమాహితో.

౪౯. ‘‘రమ్మే పదేసే రమణీయే, వివిత్తే అమనుస్సకే;

తత్థ వాసం ఉపగఞ్ఛిం, గఙ్గాకూలే మనోరమే.

౫౦. ‘‘అథ ఉపరి గఙ్గాయ, ధనికేహి పరిపీళితో;

పురిసో గఙ్గాయ పపతి, ‘జీవామి వా మరామి వా’.

౫౧. ‘‘రత్తిన్దివం సో గఙ్గాయ, వుయ్హమానో మహోదకే;

రవన్తో కరుణం రవం, మజ్ఝే గఙ్గాయ గచ్ఛతి.

౫౨. ‘‘తస్సాహం సద్దం సుత్వాన, కరుణం పరిదేవతో;

గఙ్గాయ తీరే ఠత్వాన, అపుచ్ఛిం ‘కోసి త్వం నరో’.

౫౩. ‘‘సో మే పుట్ఠో చ బ్యాకాసి, అత్తనో కరణం తదా;

‘ధనికేహి భీతో తసితో, పక్ఖన్దోహం మహానదిం’.

౫౪. ‘‘తస్స కత్వాన కారుఞ్ఞం, చజిత్వా మమ జీవితం;

పవిసిత్వా నీహరిం తస్స, అన్ధకారమ్హి రత్తియా.

౫౫. ‘‘అస్సత్థకాలమఞ్ఞాయ, తస్సాహం ఇదమబ్రవిం;

‘ఏకం తం వరం యాచామి, మా మం కస్సచి పావద’.

౫౬. ‘‘నగరం గన్త్వాన ఆచిక్ఖి, పుచ్ఛితో ధనహేతుకో;

రాజానం సో గహేత్వాన, ఉపగఞ్ఛి మమన్తికం.

౫౭. ‘‘యావతా కరణం సబ్బం, రఞ్ఞో ఆరోచితం మయా;

రాజా సుత్వాన వచనం, ఉసుం తస్స పకప్పయి;

‘ఇధేవ ఘాతయిస్సామి, మిత్తదుబ్భిం [మిత్తదూభిం (సీ.)] అనారియం’.

౫౮. ‘‘తమహం అనురక్ఖన్తో, నిమ్మినిం మమ అత్తనా;

‘తిట్ఠతేసో మహారాజ, కామకారో భవామి తే’.

౫౯. ‘‘అనురక్ఖిం మమ సీలం, నారక్ఖిం మమ జీవితం;

సీలవా హి తదా ఆసిం, బోధియాయేవ కారణా’’తి.

రురురాజచరియం ఛట్ఠం.