౯. వేస్సన్తరచరియా

౬౭. ‘‘యా మే అహోసి జనికా, ఫుస్సతీ [ఫుసతీ (సీ.)] నామ ఖత్తియా;

సా అతీతాసు జాతీసు, సక్కస్స మహేసీ పియా.

౬౮. ‘‘తస్సా ఆయుక్ఖయం ఞత్వా, దేవిన్దో ఏతదబ్రవి;

‘దదామి తే దస వరే, వరభద్దే యదిచ్ఛసి’.

౬౯. ‘‘ఏవం వుత్తా చ సా దేవీ, సక్కం పునిదమబ్రవి;

‘కిం ను మే అపరాధత్థి, కిం ను దేస్సా అహం తవ;

రమ్మా చావేసి మం ఠానా, వాతోవ ధరణీరుహం’.

౭౦. ‘‘ఏవం వుత్తో చ సో సక్కో, పున తస్సిదమబ్రవి;

‘న చేవ తే కతం పాపం, న చ మే త్వంసి అప్పియా.

౭౧. ‘‘‘ఏత్తకంయేవ తే ఆయు, చవనకాలో భవిస్సతి;

పటిగ్గణ్హ మయా దిన్నే, వరే దస వరుత్తమే’.

౭౨. ‘‘సక్కేన సా దిన్నవరా, తుట్ఠహట్ఠా పమోదితా;

మమం అబ్భన్తరం కత్వా, ఫుస్సతీ దస వరే వరీ.

౭౩. ‘‘తతో చుతా సా ఫుస్సతీ, ఖత్తియే ఉపపజ్జథ;

జేతుత్తరమ్హి నగరే, సఞ్జయేన సమాగమి.

౭౪. ‘‘యదాహం ఫుస్సతియా కుచ్ఛిం, ఓక్కన్తో పియమాతుయా;

మమ తేజేన మే మాతా, సదా దానరతా అహు.

౭౫. ‘‘అధనే ఆతురే జిణ్ణే, యాచకే అద్ధికే [పథికే (క.)] జనే;

సమణే బ్రాహ్మణే ఖీణే, దేతి దానం అకిఞ్చనే.

౭౬. ‘‘దస మాసే ధారయిత్వాన, కరోన్తే పురం పదక్ఖిణం;

వేస్సానం వీథియా మజ్ఝే, జనేసి ఫుస్సతీ మమం.

౭౭. ‘‘న మయ్హం మత్తికం నామం, నపి పేత్తికసమ్భవం;

జాతేత్థ వేస్సవీథియా, తస్మా వేస్సన్తరో అహు.

౭౮. ‘‘యదాహం దారకో హోమి, జాతియా అట్ఠవస్సికో;

తదా నిసజ్జ పాసాదే, దానం దాతుం విచిన్తయిం.

౭౯. ‘‘‘హదయం దదేయ్యం చక్ఖుం, మంసమ్పి రుధిరమ్పి చ;

దదేయ్యం కాయం సావేత్వా, యది కోచి యాచయే మమం’.

౮౦. ‘‘సభావం చిన్తయన్తస్స, అకమ్పితమసణ్ఠితం;

అకమ్పి తత్థ పథవీ, సినేరువనవటంసకా.

౮౧. ‘‘అన్వద్ధమాసే పన్నరసే, పుణ్ణమాసే ఉపోసథే;

పచ్చయం నాగమారుయ్హ, దానం దాతుం ఉపాగమిం.

౮౨. ‘‘కలిఙ్గరట్ఠవిసయా, బ్రాహ్మణా ఉపగఞ్ఛు మం;

అయాచుం మం హత్థినాగం, ధఞ్ఞం మఙ్గలసమ్మతం.

౮౩. ‘‘అవుట్ఠికో జనపదో, దుబ్భిక్ఖో ఛాతకో మహా;

దదాహి పవరం నాగం, సబ్బసేతం గజుత్తమం.

౮౪. ‘‘దదామి న వికమ్పామి, యం మం యాచన్తి బ్రాహ్మణా;

సన్తం నప్పతిగూహామి [నప్పతిగుయ్హామి (సీ. క.)], దానే మే రమతే మనో.

౮౫. ‘‘న మే యాచకమనుప్పత్తే, పటిక్ఖేపో అనుచ్ఛవో;

‘మా మే భిజ్జి సమాదానం, దస్సామి విపులం గజం’.

౮౬. ‘‘నాగం గహేత్వా సోణ్డాయ, భిఙ్గారే రతనామయే;

జలం హత్థే ఆకిరిత్వా, బ్రాహ్మణానం అదం గజం.

౮౭. ‘‘పునాపరం దదన్తస్స, సబ్బసేతం గజుత్తమం;

తదాపి పథవీ కమ్పి, సినేరువనవటంసకా.

౮౮. ‘‘తస్స నాగస్స దానేన, సివయో కుద్ధా సమాగతా;

పబ్బాజేసుం సకా రట్ఠా, ‘వఙ్కం గచ్ఛతు పబ్బతం’.

౮౯. ‘‘తేసం నిచ్ఛుభమానానం, అకమ్పిత్థమసణ్ఠితం;

మహాదానం పవత్తేతుం, ఏకం వరమయాచిసం.

౯౦. ‘‘యాచితా సివయో సబ్బే, ఏకం వరమదంసు మే;

సావయిత్వా కణ్ణభేరిం, మహాదానం దదామహం.

౯౧. ‘‘అథేత్థ వత్తతీ సద్దో, తుములో భేరవో మహా;

దానేనిమం నీహరన్తి, పున దానం దదాతయం.

౯౨. ‘‘హత్థిం అస్సే రథే దత్వా, దాసిం దాసం గవం ధనం;

మహాదానం దదిత్వాన, నగరా నిక్ఖమిం తదా.

౯౩. ‘‘నిక్ఖమిత్వాన నగరా, నివత్తిత్వా విలోకితే;

తదాపి పథవీ కమ్పి, సినేరువనవటంసకా.

౯౪. ‘‘చతువాహిం రథం దత్వా, ఠత్వా చాతుమ్మహాపథే;

ఏకాకియో అదుతియో, మద్దిదేవిం ఇదమబ్రవిం.

౯౫. ‘‘‘త్వం మద్ది కణ్హం గణ్హాహి, లహుకా ఏసా కనిట్ఠికా;

అహం జాలిం గహేస్సామి, గరుకో భాతికో హి సో’.

౯౬. ‘‘పదుమం పుణ్డరీకంవ, మద్దీ కణ్హాజినగ్గహీ;

అహం సువణ్ణబిమ్బంవ, జాలిం ఖత్తియమగ్గహిం.

౯౭. ‘‘అభిజాతా సుఖుమాలా, ఖత్తియా చతురో జనా;

విసమం సమం అక్కమన్తా, వఙ్కం గచ్ఛామ పబ్బతం.

౯౮. ‘‘యే కేచి మనుజా ఏన్తి, అనుమగ్గే పటిప్పథే;

మగ్గన్తే పటిపుచ్ఛామ, ‘కుహిం వఙ్కన్త [వఙ్కత (సీ.)] పబ్బతో’.

౯౯. ‘‘తే తత్థ అమ్హే పస్సిత్వా, కరుణం గిరముదీరయుం;

దుక్ఖం తే పటివేదేన్తి, దూరే వఙ్కన్తపబ్బతో.

౧౦౦. ‘‘యది పస్సన్తి పవనే, దారకా ఫలినే దుమే;

తేసం ఫలానం హేతుమ్హి, ఉపరోదన్తి దారకా.

౧౦౧. ‘‘రోదన్తే దారకే దిస్వా, ఉబ్బిద్ధా [ఉబ్బిగ్గా (స్యా. కం.)] విపులా దుమా;

సయమేవోణమిత్వాన, ఉపగచ్ఛన్తి దారకే.

౧౦౨. ‘‘ఇదం అచ్ఛరియం దిస్వా, అబ్భుతం లోమహంసనం;

సాహుకారం [సాధుకారం (సబ్బత్థ)] పవత్తేసి, మద్దీ సబ్బఙ్గసోభనా.

౧౦౩. ‘‘అచ్ఛేరం వత లోకస్మిం, అబ్భుతం లోమహంసనం;

వేస్సన్తరస్స తేజేన, సయమేవోణతా దుమా.

౧౦౪. ‘‘సఙ్ఖిపింసు పథం యక్ఖా, అనుకమ్పాయ దారకే;

నిక్ఖన్తదివసేనేవ [నిక్ఖన్తదివసేయేవ (సీ.)], చేతరట్ఠముపాగముం.

౧౦౫. ‘‘సట్ఠిరాజసహస్సాని, తదా వసన్తి మాతులే;

సబ్బే పఞ్జలికా హుత్వా, రోదమానా ఉపాగముం.

౧౦౬. ‘‘తత్థ వత్తేత్వా సల్లాపం, చేతేహి చేతపుత్తేహి;

తే తతో నిక్ఖమిత్వాన, వఙ్కం అగము పబ్బతం.

౧౦౭. ‘‘ఆమన్తయిత్వా దేవిన్దో, విస్సకమ్మం [విసుకమ్మం (క.)] మహిద్ధికం;

అస్సమం సుకతం రమ్మం, పణ్ణసాలం సుమాపయ.

౧౦౮. ‘‘సక్కస్స వచనం సుత్వా, విస్సకమ్మో మహిద్ధికో;

అస్సమం సుకతం రమ్మం, పణ్ణసాలం సుమాపయి.

౧౦౯. ‘‘అజ్ఝోగాహేత్వా పవనం, అప్పసద్దం నిరాకులం;

చతురో జనా మయం తత్థ, వసామ పబ్బతన్తరే.

౧౧౦. ‘‘అహఞ్చ మద్దిదేవీ చ, జాలీ కణ్హాజినా చుభో;

అఞ్ఞమఞ్ఞం సోకనుదా, వసామ అస్సమే తదా.

౧౧౧. ‘‘దారకే అనురక్ఖన్తో, అసుఞ్ఞో హోమి అస్సమే;

మద్దీ ఫలం ఆహరిత్వా, పోసేతి సా తయో జనే.

౧౧౨. ‘‘పవనే వసమానస్స, అద్ధికో మం ఉపాగమి;

ఆయాచి పుత్తకే మయ్హం, జాలిం కణ్హాజినం చుభో.

౧౧౩. ‘‘యాచకం ఉపగతం దిస్వా, హాసో మే ఉపపజ్జథ;

ఉభో పుత్తే గహేత్వాన, అదాసిం బ్రాహ్మణే తదా.

౧౧౪. ‘‘సకే పుత్తే చజన్తస్స, జూజకే బ్రాహ్మణే యదా;

తదాపి పథవీ కమ్పి, సినేరువనవటంసకా.

౧౧౫. ‘‘పునదేవ సక్కో ఓరుయ్హ, హుత్వా బ్రాహ్మణసన్నిభో;

ఆయాచి మం మద్దిదేవిం, సీలవన్తిం పతిబ్బతం.

౧౧౬. ‘‘మద్దిం హత్థే గహేత్వాన, ఉదకఞ్జలి పూరియ;

పసన్నమనసఙ్కప్పో, తస్స మద్దిం అదాసహం.

౧౧౭. ‘‘మద్దియా దీయమానాయ, గగనే దేవా పమోదితా;

తదాపి పథవీ కమ్పి, సినేరువనవటంసకా.

౧౧౮. ‘‘జాలిం కణ్హాజినం ధీతం, మద్దిదేవిం పతిబ్బతం;

చజమానో న చిన్తేసిం, బోధియాయేవ కారణా.

౧౧౯. ‘‘న మే దేస్సా ఉభో పుత్తా, మద్దిదేవీ న దేస్సియా;

సబ్బఞ్ఞుతం పియం మయ్హం, తస్మా పియే అదాసహం.

౧౨౦. ‘‘పునాపరం బ్రహారఞ్ఞే, మాతాపితుసమాగమే;

కరుణం పరిదేవన్తే, సల్లపన్తే సుఖం దుఖం.

౧౨౧. ‘‘హిరోత్తప్పేన గరునా [గరునం (స్యా. క.)], ఉభిన్నం ఉపసఙ్కమి;

తదాపి పథవీ కమ్పి, సినేరువనవటంసకా.

౧౨౨. ‘‘పునాపరం బ్రహారఞ్ఞా, నిక్ఖమిత్వా సఞాతిభి;

పవిసామి పురం రమ్మం, జేతుత్తరం పురుత్తమం.

౧౨౩. ‘‘రతనాని సత్త వస్సింసు, మహామేఘో పవస్సథ;

తదాపి పథవీ కమ్పి, సినేరువనవటంసకా.

౧౨౪. ‘‘అచేతనాయం పథవీ, అవిఞ్ఞాయ సుఖం దుఖం;

సాపి దానబలా మయ్హం, సత్తక్ఖత్తుం పకమ్పథా’’తి.

వేస్సన్తరచరియం నవమం.