౧౦. ససపణ్డితచరియా

౧౨౫. ‘‘పునాపరం యదా హోమి, ససకో పవనచారకో;

తిణపణ్ణసాకఫలభక్ఖో, పరహేఠనవివజ్జితో.

౧౨౬. ‘‘మక్కటో చ సిఙ్గాలో చ, సుత్తపోతో చహం తదా;

వసామ ఏకసామన్తా, సాయం పాతో చ దిస్సరే [సాయం పాతో పదిస్సరే (క.)].

౧౨౭. ‘‘అహం తే అనుసాసామి, కిరియే కల్యాణపాపకే;

‘పాపాని పరివజ్జేథ, కల్యాణే అభినివిస్సథ’.

౧౨౮. ‘‘ఉపోసథమ్హి దివసే, చన్దం దిస్వాన పూరితం;

ఏతేసం తత్థ ఆచిక్ఖిం, దివసో అజ్జుపోసథో.

౧౨౯. ‘‘దానాని పటియాదేథ, దక్ఖిణేయ్యస్స దాతవే;

దత్వా దానం దక్ఖిణేయ్యే, ఉపవస్సథుపోసథం.

౧౩౦. ‘‘తే మే సాధూతి వత్వాన, యథాసత్తి యథాబలం;

దానాని పటియాదేత్వా, దక్ఖిణేయ్యం గవేసిసుం [గవేసయ్యుం (క.)].

౧౩౧. ‘‘అహం నిసజ్జ చిన్తేసిం, దానం దక్ఖిణనుచ్ఛవం;

‘యదిహం లభే దక్ఖిణేయ్యం, కిం మే దానం భవిస్సతి.

౧౩౨. ‘‘‘న మే అత్థి తిలా ముగ్గా, మాసా వా తణ్డులా ఘతం;

అహం తిణేన యాపేమి, న సక్కా తిణ దాతవే.

౧౩౩. ‘‘‘యది కోచి ఏతి దక్ఖిణేయ్యో, భిక్ఖాయ మమ సన్తికే;

దజ్జాహం సకమత్తానం, న సో తుచ్ఛో గమిస్సతి’.

౧౩౪. ‘‘మమ సఙ్కప్పమఞ్ఞాయ, సక్కో బ్రాహ్మణవణ్ణినా;

ఆసయం మే ఉపాగచ్ఛి, దానవీమంసనాయ మే.

౧౩౫. ‘‘తమహం దిస్వాన సన్తుట్ఠో, ఇదం వచనమబ్రవిం;

‘సాధు ఖోసి అనుప్పత్తో, ఘాసహేతు మమన్తికే.

౧౩౬. ‘‘‘అదిన్నపుబ్బం దానవరం, అజ్జ దస్సామి తే అహం;

తువం సీలగుణూపేతో, అయుత్తం తే పరహేఠనం.

౧౩౭. ‘‘‘ఏహి అగ్గిం పదీపేహి, నానాకట్ఠే సమానయ;

అహం పచిస్సమత్తానం, పక్కం త్వం భక్ఖయిస్ససి’.

౧౩౮. ‘‘‘సాధూ’తి సో హట్ఠమనో, నానాకట్ఠే సమానయి;

మహన్తం అకాసి చితకం, కత్వా అఙ్గారగబ్భకం.

౧౩౯. ‘‘అగ్గిం తత్థ పదీపేసి, యథా సో ఖిప్పం మహా భవే;

ఫోటేత్వా రజగతే గత్తే, ఏకమన్తం ఉపావిసిం.

౧౪౦. ‘‘యదా మహాకట్ఠపుఞ్జో, ఆదిత్తో ధమధమాయతి [ధుమధుమాయతి (సీ.), ధమమాయతి (క.)];

తదుప్పతిత్వా పపతిం, మజ్ఝే జాలసిఖన్తరే.

౧౪౧. ‘‘యథా సీతోదకం నామ, పవిట్ఠం యస్స కస్సచి;

సమేతి దరథపరిళాహం, అస్సాదం దేతి పీతి చ.

౧౪౨. ‘‘తథేవ జలితం అగ్గిం, పవిట్ఠస్స మమం తదా;

సబ్బం సమేతి దరథం, యథా సీతోదకం వియ.

౧౪౩. ‘‘ఛవిం చమ్మం మంసం న్హారుం, అట్ఠిం హదయబన్ధనం;

కేవలం సకలం కాయం, బ్రాహ్మణస్స అదాసహ’’న్తి.

ససపణ్డితచరియం దసమం.

అకిత్తివగ్గో పఠమో.

తస్సుద్దానం –

అకిత్తిబ్రాహ్మణో సఙ్ఖో, కురురాజా ధనఞ్చయో;

మహాసుదస్సనో రాజా, మహాగోవిన్దబ్రాహ్మణో.

నిమి చన్దకుమారో చ, సివి వేస్సన్తరో ససో;

అహమేవ తదా ఆసిం, యో తే దానవరే అదా.

ఏతే దానపరిక్ఖారా, ఏతే దానస్స పారమీ;

జీవితం యాచకే దత్వా, ఇమం పారమి పూరయిం.

భిక్ఖాయ ఉపగతం దిస్వా, సకత్తానం పరిచ్చజిం;

దానేన మే సమో నత్థి, ఏసా మే దానపారమీతి.

దానపారమినిద్దేసో నిట్ఠితో.