౪. అధోపుప్ఫియత్థేరఅపదానం

౨౨. ‘‘అభిభూ నామ సో భిక్ఖు, సిఖినో అగ్గసావకో;

మహానుభావో తేవిజ్జో, హిమవన్తం ఉపాగమి.

౨౩. ‘‘అహమ్పి హిమవన్తమ్హి, రమణీయస్సమే ఇసి;

వసామి అప్పమఞ్ఞాసు, ఇద్ధీసు చ తదా వసీ.

౨౪. ‘‘పక్ఖిజాతో వియాకాసే, పబ్బతం అధివత్తయిం [అభిపత్థయిం (స్యా.), అభిమత్థయిం (క.), అధివత్థయిన్తి పబ్బతస్స ఉపరి గచ్ఛిన్తిఅత్థో];

అధోపుప్ఫం గహేత్వాన, ఆగచ్ఛిం [అగచ్ఛిం (క.)] పబ్బతం అహం.

౨౫. ‘‘సత్త పుప్ఫాని గణ్హిత్వా, మత్థకే ఓకిరిం అహం;

ఆలోకితే [ఆలోకితో (స్యా.)] చ వీరేన, పక్కామిం పాచినాముఖో.

౨౬. ‘‘ఆవాసం అభిసమ్భోసిం, పత్వాన అస్సమం అహం;

ఖారిభారం గహేత్వాన, పాయాసిం [పావిసిం (సీ.)] పబ్బతన్తరం.

౨౭. ‘‘అజగరో మం పీళేసి, ఘోరరూపో మహబ్బలో;

పుబ్బకమ్మం సరిత్వాన, తత్థ కాలఙ్కతో అహం.

౨౮. ‘‘ఏకత్తింసే ఇతో కప్పే, యం పుప్ఫమభిరోపయిం;

దుగ్గతిం నాభిజానామి, పుప్ఫపూజాయిదం ఫలం.

౨౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అధోపుప్ఫియో థేరో ఇమా గాథాయో అభాసిత్థాతి.

అధోపుప్ఫియత్థేరస్సాపదానం చతుత్థం.