౯. తిమిరవగ్గో

౧. తిమిరపుప్ఫియత్థేరఅపదానం

౧. ‘‘చన్దభాగానదీతీరే, అనుసోతం వజామహం;

నిసిన్నం సమణం దిస్వా, విప్పసన్నమనావిలం.

౨. ‘‘తత్థ చిత్తం పసాదేత్వా [పసాదేసిం (స్యా.)], ఏవం చిన్తేసహం తదా;

తారయిస్సతి తిణ్ణోయం, దన్తోయం దమయిస్సతి.

౩. ‘‘అస్సాసిస్సతి అస్సత్థో, సన్తో చ సమయిస్సతి;

మోచయిస్సతి ముత్తో చ, నిబ్బాపేస్సతి నిబ్బుతో.

౪. ‘‘ఏవాహం చిన్తయిత్వాన, సిద్ధత్థస్స మహేసినో;

గహేత్వా తిమిరపుప్ఫం, మత్థకే ఓకిరిం అహం [తదా (స్యా.)].

౫. ‘‘అఞ్జలిం పగ్గహేత్వాన, కత్వా చ నం పదక్ఖిణం;

వన్దిత్వా సత్థునో పాదే, పక్కామిం అపరం దిసం.

౬. ‘‘అచిరం గతమత్తం మం, మిగరాజా విహేఠయి;

పపాతమనుగచ్ఛన్తో, తత్థేవ పపతిం అహం.

౭. ‘‘చతున్నవుతితో కప్పే, యం పుప్ఫమభిరోపయిం;

దుగ్గతిం నాభిజానామి, పుప్ఫపూజాయిదం [బుద్ధపూజాయిదం (సీ. స్యా.)] ఫలం.

౮. ‘‘ఛప్పఞ్ఞాసమ్హి కప్పమ్హి, సత్తేవాసుం మహాయసా [మహారహా (స్యా. క.)];

సత్తరతనసమ్పన్నా, చక్కవత్తీ మహబ్బలా.

౯. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా తిమిరపుప్ఫియో థేరో ఇమా గాథాయో అభాసిత్థాతి.

తిమిరపుప్ఫియత్థేరస్సాపదానం పఠమం.

౨. గతసఞ్ఞకత్థేరఅపదానం

౧౦. ‘‘జాతియా సత్తవస్సోహం, పబ్బజిం అనగారియం;

అవన్దిం సత్థునో పాదే, విప్పసన్నేన చేతసా.

౧౧. ‘‘సత్తనఙ్గలకీపుప్ఫే, ఆకాసే ఉక్ఖిపిం అహం;

తిస్సం బుద్ధం సముద్దిస్స, అనన్తగుణసాగరం.

౧౨. ‘‘సుగతానుగతం మగ్గం, పూజేత్వా హట్ఠమానసో;

అఞ్జలిఞ్చ [అఞ్జలిస్స (క.)] తదాకాసిం, పసన్నో సేహి పాణిభి.

౧౩. ‘‘ద్వేనవుతే ఇతో కప్పే, యం కమ్మమకరిం తదా;

దుగ్గతిం నాభిజానామి, బుద్ధపూజాయిదం ఫలం.

౧౪. ‘‘ఇతో అట్ఠమకే కప్పే, తయో అగ్గిసిఖా అహు;

సత్తరతనసమ్పన్నా, చక్కవత్తీ మహబ్బలా.

౧౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా గతసఞ్ఞకో థేరో ఇమా గాథాయో అభాసిత్థాతి.

గతసఞ్ఞకత్థేరస్సాపదానం దుతియం.

౩. నిపన్నఞ్జలికత్థేరఅపదానం

౧౬. ‘‘రుక్ఖమూలే నిసిన్నోహం, బ్యాధితో పరమేన చ;

పరమకారుఞ్ఞపత్తోమ్హి, అరఞ్ఞే కాననే అహం.

౧౭. ‘‘అనుకమ్పం ఉపాదాయ, తిస్సో సత్థా ఉపేసి మం;

సోహం నిపన్నకో సన్తో, సిరే కత్వాన అఞ్జలిం.

౧౮. ‘‘పసన్నచిత్తో సుమనో, సబ్బసత్తానముత్తమం;

సమ్బుద్ధం అభివాదేత్వా, తత్థ కాలఙ్కతో అహం.

౧౯. ‘‘ద్వేనవుతే ఇతో కప్పే, యం వన్దిం పురిసుత్తమం;

దుగ్గతిం నాభిజానామి, వన్దనాయ ఇదం ఫలం.

౨౦. ‘‘ఇతో పఞ్చమకే కప్పే, పఞ్చేవాసుం మహాసిఖా;

సత్తరతనసమ్పన్నా, చక్కవత్తీ మహబ్బలా.

౨౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా నిపన్నఞ్జలికో థేరో ఇమా గాథాయో అభాసిత్థాతి.

నిపన్నఞ్జలికత్థేరస్సాపదానం తతియం.

౪. అధోపుప్ఫియత్థేరఅపదానం

౨౨. ‘‘అభిభూ నామ సో భిక్ఖు, సిఖినో అగ్గసావకో;

మహానుభావో తేవిజ్జో, హిమవన్తం ఉపాగమి.

౨౩. ‘‘అహమ్పి హిమవన్తమ్హి, రమణీయస్సమే ఇసి;

వసామి అప్పమఞ్ఞాసు, ఇద్ధీసు చ తదా వసీ.

౨౪. ‘‘పక్ఖిజాతో వియాకాసే, పబ్బతం అధివత్తయిం [అభిపత్థయిం (స్యా.), అభిమత్థయిం (క.), అధివత్థయిన్తి పబ్బతస్స ఉపరి గచ్ఛిన్తిఅత్థో];

అధోపుప్ఫం గహేత్వాన, ఆగచ్ఛిం [అగచ్ఛిం (క.)] పబ్బతం అహం.

౨౫. ‘‘సత్త పుప్ఫాని గణ్హిత్వా, మత్థకే ఓకిరిం అహం;

ఆలోకితే [ఆలోకితో (స్యా.)] చ వీరేన, పక్కామిం పాచినాముఖో.

౨౬. ‘‘ఆవాసం అభిసమ్భోసిం, పత్వాన అస్సమం అహం;

ఖారిభారం గహేత్వాన, పాయాసిం [పావిసిం (సీ.)] పబ్బతన్తరం.

౨౭. ‘‘అజగరో మం పీళేసి, ఘోరరూపో మహబ్బలో;

పుబ్బకమ్మం సరిత్వాన, తత్థ కాలఙ్కతో అహం.

౨౮. ‘‘ఏకత్తింసే ఇతో కప్పే, యం పుప్ఫమభిరోపయిం;

దుగ్గతిం నాభిజానామి, పుప్ఫపూజాయిదం ఫలం.

౨౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అధోపుప్ఫియో థేరో ఇమా గాథాయో అభాసిత్థాతి.

అధోపుప్ఫియత్థేరస్సాపదానం చతుత్థం.

౫. రంసిసఞ్ఞకత్థేరఅపదానం

౩౦. ‘‘పబ్బతే హిమవన్తమ్హి, వాసం కప్పేసహం పురే;

అజినుత్తరవాసోహం, వసామి పబ్బతన్తరే.

౩౧. ‘‘సువణ్ణవణ్ణం సమ్బుద్ధం, సతరంసింవ భాణుమం;

వనన్తరగతం దిస్వా, సాలరాజంవ పుప్ఫితం.

౩౨. ‘‘రంస్యా [రంసే (స్యా. క.)] చిత్తం పసాదేత్వా, విపస్సిస్స మహేసినో;

పగ్గయ్హ అఞ్జలిం వన్దిం, సిరసా ఉక్కుటీ [సిరసా ఉక్కుటికో (స్యా.), సిరసుక్కుటికో (క.)] అహం.

౩౩. ‘‘ఏకనవుతితో కప్పే, యం కమ్మమకరిం తదా;

దుగ్గతిం నాభిజానామి, రంసిసఞ్ఞాయిదం ఫలం.

౩౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా రంసిసఞ్ఞకో థేరో ఇమా గాథాయో అభాసిత్థాతి.

రంసిసఞ్ఞకత్థేరస్సాపదానం పఞ్చమం.

౬. దుతియరంసిసఞ్ఞకత్థేరఅపదానం

౩౫. ‘‘పబ్బతే హిమవన్తమ్హి, వాకచీరధరో అహం;

చఙ్కమఞ్చ సమారూళ్హో, నిసీదిం పాచినాముఖో.

౩౬. ‘‘పబ్బతే సుగతం దిస్వా, ఫుస్సం ఝానరతం తదా;

అఞ్జలిం పగ్గహేత్వాన, రంస్యా చిత్తం పసాదయిం.

౩౭. ‘‘ద్వేనవుతే ఇతో కప్పే, యం సఞ్ఞమలభిం తదా;

దుగ్గతిం నాభిజానామి, రంసిసఞ్ఞాయిదం ఫలం.

౩౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా రంసిసఞ్ఞకో థేరో ఇమా గాథాయో అభాసిత్థాతి.

దుతియరంసిసఞ్ఞకత్థేరస్సాపదానం ఛట్ఠం.

౭. ఫలదాయకత్థేరఅపదానం

౩౯. ‘‘పబ్బతే హిమవన్తమ్హి, ఖరాజినధరో అహం;

ఫుస్సం జినవరం దిస్వా, ఫలహత్థో ఫలం అదం.

౪౦. ‘‘యమహం ఫలమదాసిం, విప్పసన్నేన చేతసా;

భవే నిబ్బత్తమానమ్హి, ఫలం నిబ్బత్తతే మమ.

౪౧. ‘‘ద్వేనవుతే ఇతో కప్పే, యం ఫలం అదదిం అహం;

దుగ్గతిం నాభిజానామి, ఫలదానస్సిదం ఫలం.

౪౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఫలదాయకో థేరో ఇమా గాథాయో అభాసిత్థాతి.

ఫలదాయకత్థేరస్సాపదానం సత్తమం.

౮. సద్దసఞ్ఞకత్థేరఅపదానం

౪౩. ‘‘పబ్బతే హిమవన్తమ్హి, వసామి పణ్ణసన్థరే;

ఫుస్సస్స ధమ్మం భణతో, సద్దే చిత్తం పసాదయిం.

౪౪. ‘‘ద్వేనవుతే ఇతో కప్పే, యం కమ్మమకరిం తదా;

దుగ్గతిం నాభిజానామి, పుఞ్ఞకమ్మస్సిదం ఫలం.

౪౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సద్దసఞ్ఞకో థేరో ఇమా గాథాయో అభాసిత్థాతి.

సద్దసఞ్ఞకత్థేరస్సాపదానం అట్ఠమం.

౯. బోధిసిఞ్చకత్థేరఅపదానం

౪౬. ‘‘విపస్సిస్స భగవతో, మహాబోధిమహో అహు;

పబ్బజ్జుపగతో సన్తో, ఉపగచ్ఛిం అహం తదా.

౪౭. ‘‘కుసుమోదకమాదాయ, బోధియా ఓకిరిం అహం;

మోచయిస్సతి నో ముత్తో, నిబ్బాపేస్సతి నిబ్బుతో.

౪౮. ‘‘ఏకనవుతితో కప్పే, యం బోధిమభిసిఞ్చయిం;

దుగ్గతిం నాభిజానామి, బోధిసిఞ్చాయిదం ఫలం.

౪౯. ‘‘తేత్తింసే వత్తమానమ్హి, కప్పే ఆసుం జనాధిపా;

ఉదకసేచనా నామ, అట్ఠేతే చక్కవత్తినో.

౫౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా బోధిసిఞ్చకో థేరో ఇమా గాథాయో అభాసిత్థాతి.

బోధిసిఞ్చకత్థేరస్సాపదానం నవమం.

౧౦. పదుమపుప్ఫియత్థేరఅపదానం

౫౧. ‘‘పోక్ఖరవనం పవిట్ఠో, భఞ్జన్తో పదుమానిహం;

తత్థద్దసం ఫుస్సం బుద్ధం [అద్దసం ఫుస్ససమ్బుద్ధం (సీ. స్యా.)], బాత్తింసవరలక్ఖణం.

౫౨. ‘‘పదుమపుప్ఫం గహేత్వాన, ఆకాసే ఉక్ఖిపిం అహం;

పాపకమ్మం సరిత్వాన, పబ్బజిం అనగారియం.

౫౩. ‘‘పబ్బజిత్వాన కాయేన, మనసా సంవుతేన చ;

వచీదుచ్చరితం హిత్వా, ఆజీవం పరిసోధయిం.

౫౪. ‘‘ద్వేనవుతే ఇతో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౫౫. ‘‘పదుమాభాసనామా చ, అట్ఠారస మహీపతీ;

అట్ఠారసేసు కప్పేసు, అట్ఠతాలీసమాసిసుం.

౫౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పదుమపుప్ఫియో థేరో ఇమా గాథాయో అభాసిత్థాతి;

పదుమపుప్ఫియత్థేరస్సాపదానం దసమం.

తిమిరవగ్గో నవమో.