౧౦. సుధావగ్గో

౧. సుధాపిణ్డియత్థేరఅపదానం

౧. ‘‘పూజారహే పూజయతో, బుద్ధే యది వ సావకే;

పపఞ్చసమతిక్కన్తే, తిణ్ణసోకపరిద్దవే.

౨. ‘‘తే తాదిసే పూజయతో, నిబ్బుతే అకుతోభయే;

న సక్కా పుఞ్ఞం సఙ్ఖాతుం, ఇమేత్తమపి [ఇదమ్మత్తన్తి (సీ.), ఇమేత్థమపి (క.)] కేనచి.

౩. ‘‘చతున్నమపి దీపానం, ఇస్సరం యోధ కారయే;

ఏకిస్సా పూజనాయేతం, కలం నాగ్ఘతి సోళసిం.

౪. ‘‘సిద్ధత్థస్స నరగ్గస్స, చేతియే ఫలితన్తరే;

సుధాపిణ్డో మయా దిన్నో, విప్పసన్నేన చేతసా.

౫. ‘‘చతున్నవుతితో కప్పే, యం కమ్మమకరిం తదా;

దుగ్గతిం నాభిజానామి, పటిసఙ్ఖారస్సిదం ఫలం.

౬. ‘‘ఇతో తింసతికప్పమ్హి, పటిసఙ్ఖారసవ్హయా;

సత్తరతనసమ్పన్నా, తేరస చక్కవత్తినో.

౭. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా సుధాపిణ్డియో థేరో ఇమా గాథాయో అభాసిత్థాతి.

సుధాపిణ్డియత్థేరస్సాపదానం పఠమం.

౨. సుచిన్తికత్థేరఅపదానం

౮. ‘‘తిస్సస్స లోకనాథస్స, సుద్ధపీఠమదాసహం;

హట్ఠో హట్ఠేన చిత్తేన, బుద్ధస్సాదిచ్చబన్ధునో.

౯. ‘‘అట్ఠారసే [అట్ఠతింసే (సీ. స్యా.)] ఇతో కప్పే, రాజా ఆసిం మహారుచి;

భోగో చ విపులో ఆసి, సయనఞ్చ అనప్పకం.

౧౦. ‘‘పీఠం బుద్ధస్స దత్వాన, విప్పసన్నేన చేతసా;

అనుభోమి సకం కమ్మం, పుబ్బే సుకతమత్తనో.

౧౧. ‘‘ద్వేనవుతే ఇతో కప్పే, యం పీఠమదదిం తదా;

దుగ్గతిం నాభిజానామి, పీఠదానస్సిదం ఫలం.

౧౨. ‘‘అట్ఠతింసే ఇతో కప్పే, తయో తే చక్కవత్తినో;

రుచి ఉపరుచి చేవ, మహారుచి తతియకో.

౧౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సుచిన్తికో థేరో ఇమా గాథాయో అభాసిత్థాతి.

సుచిన్తికత్థేరస్సాపదానం దుతియం.

౩. అడ్ఢచేళకత్థేరఅపదానం

౧౪. ‘‘తిస్సస్సాహం భగవతో, ఉపడ్ఢదుస్సమదాసహం;

పరమకాపఞ్ఞపత్తోమ్హి [పరమకారుఞ్ఞపత్తోమ్హి (స్యా. క.)], దుగ్గతేన [దుగ్గన్ధేన (సీ.)] సమప్పితో.

౧౫. ‘‘ఉపడ్ఢదుస్సం దత్వాన, కప్పం సగ్గమ్హి మోదహం;

అవసేసేసు కప్పేసు, కుసలం కారితం మయా.

౧౬. ‘‘ద్వేనవుతే ఇతో కప్పే, యం దుస్సమదదిం తదా;

దుగ్గతిం నాభిజానామి, దుస్సదానస్సిదం ఫలం.

౧౭. ‘‘ఏకూనపఞ్ఞాసకప్పమ్హి [ఏకపఞ్ఞాసకప్పమ్హి (స్యా.)], రాజానో చక్కవత్తినో;

సమన్తచ్ఛదనా నామ, బాత్తింసాసుం [ఖత్తియాసుం (స్యా. క.)] జనాధిపా.

౧౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అడ్ఢచేళకో థేరో ఇమా గాథాయో అభాసిత్థాతి.

అడ్ఢచేళకత్థేరస్సాపదానం తతియం.

౪. సూచిదాయకత్థేరఅపదానం

౧౯. ‘‘కమ్మారోహం పురే ఆసిం, బన్ధుమాయం పురుత్తమే;

సూచిదానం మయా దిన్నం, విపస్సిస్స మహేసినో.

౨౦. ‘‘వజిరగ్గసమం ఞాణం, హోతి కమ్మేన తాదిసం;

విరాగోమ్హి విముత్తోమ్హి [విభవోమ్హి విభత్తోమ్హి (క.)], పత్తోమ్హి ఆసవక్ఖయం.

౨౧. ‘‘అతీతే చ భవే సబ్బే, వత్తమానే చనాగతే [అతీతా చ భవా సబ్బే, వత్తమానా చ’నాగతా (స్యా. క.)];

ఞాణేన విచినిం సబ్బం, సూచిదానస్సిదం ఫలం.

౨౨. ‘‘ఏకనవుతితో కప్పే, సత్తాసుం వజిరవ్హయా;

సత్తరతనసమ్పన్నా, చక్కవత్తీ మహబ్బలా.

౨౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సూచిదాయకో థేరో ఇమా గాథాయో అభాసిత్థాతి.

సూచిదాయకత్థేరస్సాపదానం చతుత్థం.

౫. గన్ధమాలియత్థేరఅపదానం

౨౪. ‘‘సిద్ధత్థస్స భగవతో, గన్ధథూపం అకాసహం;

సుమనేహి పటిచ్ఛన్నం, బుద్ధానుచ్ఛవికం కతం.

౨౫. ‘‘కఞ్చనగ్ఘియసఙ్కాసం, బుద్ధం లోకగ్గనాయకం;

ఇన్దీవరంవ జలితం, ఆదిత్తంవ హుతాసనం.

౨౬. ‘‘బ్యగ్ఘూసభంవ పవరం, అభిజాతంవ కేసరిం;

నిసిన్నం సమణానగ్గం, భిక్ఖుసఙ్ఘపురక్ఖతం.

౨౭. ‘‘వన్దిత్వా సత్థునో పాదే, పక్కామిం ఉత్తరాముఖో;

చతున్నవుతితో కప్పే, గన్ధమాలం యతో అదం.

౨౮. ‘‘బుద్ధే కతస్స కారస్స, ఫలేనాహం విసేసతో;

దుగ్గతిం నాభిజానామి, బుద్ధపూజాయిదం ఫలం.

౨౯. ‘‘చత్తారీసమ్హి ఏకూనే, కప్పే ఆసింసు సోళస;

దేవగన్ధసనామా తే, రాజానో చక్కవత్తినో.

౩౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా గన్ధమాలియో థేరో ఇమా గాథాయో అభాసిత్థాతి.

గన్ధమాలియత్థేరస్సాపదానం పఞ్చమం.

౬. తిపుప్ఫియత్థేరఅపదానం

౩౧. ‘‘మిగలుద్దో పురే ఆసిం, అరఞ్ఞే కాననే అహం [బ్రహా (స్యా.)];

పాటలిం హరితం దిస్వా, తీణి పుప్ఫాని ఓకిరిం.

౩౨. ‘‘పతితపత్తాని [సత్తపత్తాని (సీ.), సతపత్తాని (క.), సుక్ఖపణ్ణాని (స్యా.)] గణ్హిత్వా, బహి ఛడ్డేసహం తదా;

అన్తోసుద్ధం బహిసుద్ధం, సువిముత్తం అనాసవం.

౩౩. ‘‘సమ్ముఖా వియ సమ్బుద్ధం, విపస్సిం లోకనాయకం;

పాటలిం అభివాదేత్వా, తత్థ కాలఙ్కతో అహం.

౩౪. ‘‘ఏకనవుతితో కప్పే, యం బోధిమభిపూజయిం;

దుగ్గతిం నాభిజానామి, బోధిపూజాయిదం ఫలం.

౩౫. ‘‘సమన్తపాసాదికా నామ, తేరసాసింసు రాజినో;

ఇతో తేత్తింసకప్పమ్హి [తింసతికప్పమ్హి (స్యా.)], చక్కవత్తీ మహబ్బలా.

౩౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తిపుప్ఫియో థేరో ఇమా గాథాయో అభాసిత్థాతి.

తిపుప్ఫియత్థేరస్సాపదానం ఛట్ఠం.

౭. మధుపిణ్డికత్థేరఅపదానం

౩౭. ‘‘విపినే [వివనే (స్యా. అట్ఠ.)] కాననే దిస్వా, అప్పసద్దే నిరాకులే;

సిద్ధత్థం ఇసినం సేట్ఠం, ఆహుతీనం పటిగ్గహం.

౩౮. ‘‘నిబ్బుతత్తం [నిబ్బుతగ్గం (క.), నిబ్బూతికం (స్యా.)] మహానాగం, నిసభాజానియం యథా;

ఓసధింవ విరోచన్తం, దేవసఙ్ఘనమస్సితం.

౩౯. ‘‘విత్తి మమాహు తావదే [విత్తి మే పాహునా తావ (సీ. స్యా.)], ఞాణం ఉప్పజ్జి తావదే;

వుట్ఠితస్స సమాధిమ్హా, మధుం దత్వాన సత్థునో.

౪౦. ‘‘వన్దిత్వా సత్థునో పాదే, పక్కామిం పాచినాముఖో;

చతుత్తింసమ్హి కప్పమ్హి, రాజా ఆసిం సుదస్సనో.

౪౧. ‘‘మధు భిసేహి సవతి, భోజనమ్హి చ తావదే;

మధువస్సం పవస్సిత్థ, పుబ్బకమ్మస్సిదం ఫలం.

౪౨. ‘‘చతున్నవుతితో కప్పే, యం మధుం అదదిం తదా;

దుగ్గతిం నాభిజానామి, మధుదానస్సిదం ఫలం.

౪౩. ‘‘చతుత్తింసే ఇతో కప్పే, చత్తారో తే సుదస్సనా;

సత్తరతనసమ్పన్నా, చక్కవత్తీ మహబ్బలా.

౪౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా మధుపిణ్డికో థేరో ఇమా గాథాయో అభాసిత్థాతి.

మధుపిణ్డికత్థేరస్సాపదానం సత్తమం.

౮. సేనాసనదాయకత్థేరఅపదానం

౪౫. ‘‘సిద్ధత్థస్స భగవతో, అదాసిం పణ్ణసన్థరం;

సమన్తా ఉపహారఞ్చ, కుసుమం ఓకిరిం అహం.

౪౬. ‘‘పాసాదేవం గుణం రమ్మం [పాసాదే చ గుహం రమ్మం (స్యా.)], అనుభోమి మహారహం;

మహగ్ఘాని చ పుప్ఫాని, సయనేభిసవన్తి మే.

౪౭. ‘‘సయనేహం తువట్టామి, విచిత్తే పుప్ఫసన్థతే;

పుప్ఫవుట్ఠి చ సయనే, అభివస్సతి తావదే.

౪౮. ‘‘చతున్నవుతితో కప్పే, అదాసిం పణ్ణసన్థరం;

దుగ్గతిం నాభిజానామి, సన్థరస్స ఇదం ఫలం.

౪౯. ‘‘తిణసన్థరకా నామ, సత్తేతే చక్కవత్తినో;

ఇతో తే పఞ్చమే కప్పే, ఉప్పజ్జింసు జనాధిపా.

౫౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సేనాసనదాయకో థేరో ఇమా గాథాయో అభాసిత్థాతి.

సేనాసనదాయకత్థేరస్సాపదానం అట్ఠమం.

౯. వేయ్యావచ్చకత్థేరఅపదానం

౫౧. ‘‘విపస్సిస్స భగవతో, మహాపూగగణో అహు;

వేయ్యావచ్చకరో ఆసిం, సబ్బకిచ్చేసు వావటో [బ్యావటో (సీ. స్యా.)].

౫౨. ‘‘దేయ్యధమ్మో చ మే నత్థి, సుగతస్స మహేసినో;

అవన్దిం సత్థునో పాదే, విప్పసన్నేన చేతసా.

౫౩. ‘‘ఏకనవుతితో కప్పే, వేయ్యావచ్చం అకాసహం;

దుగ్గతిం నాభిజానామి, వేయ్యావచ్చస్సిదం ఫలం.

౫౪. ‘‘ఇతో చ అట్ఠమే కప్పే, రాజా ఆసిం సుచిన్తితో;

సత్తరతనసమ్పన్నో, చక్కవత్తీ మహబ్బలో.

౫౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా వేయ్యావచ్చకో థేరో ఇమా గాథాయో అభాసిత్థాతి.

వేయ్యావచ్చకత్థేరస్సాపదానం నవమం.

౧౦. బుద్ధుపట్ఠాకత్థేరఅపదానం

౫౬. ‘‘విపస్సిస్స భగవతో, అహోసిం సఙ్ఖధమ్మకో;

నిచ్చుపట్ఠానయుత్తోమ్హి, సుగతస్స మహేసినో.

౫౭. ‘‘ఉపట్ఠానఫలం పస్స, లోకనాథస్స తాదినో;

సట్ఠితూరియసహస్సాని, పరివారేన్తి మం సదా.

౫౮. ‘‘ఏకనవుతితో కప్పే, ఉపట్ఠహిం మహాఇసిం;

దుగ్గతిం నాభిజానామి, ఉపట్ఠానస్సిదం ఫలం.

౫౯. ‘‘చతువీసే [చతునవుతే (స్యా.)] ఇతో కప్పే, మహానిగ్ఘోసనామకా;

సోళసాసింసు రాజానో, చక్కవత్తీ మహబ్బలా.

౬౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా బుద్ధుపట్ఠాకో థేరో ఇమా గాథాయో అభాసిత్థాతి.

బుద్ధుపట్ఠాకత్థేరస్సాపదానం దసమం.

సుధావగ్గో దసమో.

తస్సుద్దానం –

సుధా సుచిన్తి చేళఞ్చ, సూచీ చ గన్ధమాలియో;

తిపుప్ఫియో మధుసేనా, వేయ్యావచ్చో చుపట్ఠకో;

సమసట్ఠి చ గాథాయో, అస్మిం వగ్గే పకిత్తితా.

అథ వగ్గుద్దానం –

బుద్ధవగ్గో హి పఠమో, సీహాసని సుభూతి చ;

కుణ్డధానో ఉపాలి చ, బీజనిసకచిన్తి చ.