౧౧. భిక్ఖదాయివగ్గో
౧. భిక్ఖదాయకత్థేరఅపదానం
౧. ‘‘సువణ్ణవణ్ణం సమ్బుద్ధం, ఆహుతీనం పటిగ్గహం;
పవరా [పవనా (స్యా.)] అభినిక్ఖన్తం, వనా నిబ్బనమాగతం [వానా నిబ్బానమాగతం (స్యా.)].
౨. ‘‘కటచ్ఛుభిక్ఖం పాదాసిం, సిద్ధత్థస్స మహేసినో;
పఞ్ఞాయ ఉపసన్తస్స, మహావీరస్స తాదినో.
౩. ‘‘పదేనానుపదాయన్తం [పదేనానుపదాయన్తో (సీ. స్యా.)], నిబ్బాపేన్తే మహాజనం;
ఉళారా విత్తి మే జాతా, బుద్ధే ఆదిచ్చబన్ధునే [విత్తి మే పాహునా తావ, బుద్ధస్సాదిచ్చబన్ధునో (స్యా.)].
౪. ‘‘చతున్నవుతితో కప్పే, యం దానమదదిం తదా;
దుగ్గతిం నాభిజానామి, భిక్ఖాదానస్సిదం ఫలం.
౫. ‘‘సత్తాసీతిమ్హితో కప్పే, మహారేణు సనామకా;
సత్తరతనసమ్పన్నా, సత్తేతే చక్కవత్తినో.
౬. ‘‘పటిసమ్భిదా చతస్సో, విమోక్ఖాపి చ అట్ఠిమే;
ఛళభిఞ్ఞా సచ్ఛికతా, కతం బుద్ధస్స సాసనం’’.
ఇత్థం సుదం ఆయస్మా భిక్ఖదాయకో థేరో ఇమా గాథాయో అభాసిత్థాతి.
భిక్ఖదాయకత్థేరస్సాపదానం పఠమం.
౨. ఞాణసఞ్ఞికత్థేరఅపదానం
౭. ‘‘సువణ్ణవణ్ణం సమ్బుద్ధం, నిసభాజానియం యథా;
తిధాపభిన్నం మాతఙ్గం, కుఞ్జరంవ మహేసినం.
౮. ‘‘ఓభాసేన్తం దిసా సబ్బా, ఉళురాజంవ పూరితం;
రథియం పటిపజ్జన్తం, లోకజేట్ఠం అపస్సహం.
౯. ‘‘ఞాణే చిత్తం పసాదేత్వా, పగ్గహేత్వాన అఞ్జలిం;
పసన్నచిత్తో సుమనో, సిద్ధత్థమభివాదయిం.
౧౦. ‘‘చతున్నవుతితో కప్పే, యం కమ్మమకరిం తదా;
దుగ్గతిం నాభిజానామి, ఞాణసఞ్ఞాయిదం ఫలం.
౧౧. ‘‘తేసత్తతిమ్హితో కప్పే, సోళసాసుం నరుత్తమా;
సత్తరతనసమ్పన్నా, చక్కవత్తీ మహబ్బలా.
౧౨. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఞాణసఞ్ఞికో థేరో ఇమా గాథాయో అభాసిత్థాతి.
ఞాణసఞ్ఞికత్థేరస్సాపదానం దుతియం.
౩. ఉప్పలహత్థియత్థేరఅపదానం
౧౩. ‘‘తివరాయం నివాసీహం, అహోసిం మాలికో తదా;
అద్దసం విరజం బుద్ధం, సిద్ధత్థం లోకపూజితం [లోకనాయకం (సీ.)].
౧౪. ‘‘పసన్నచిత్తో సుమనో, పుప్ఫహత్థమదాసహం;
యత్థ యత్థుపపజ్జామి, తస్స కమ్మస్స వాహసా.
౧౫. ‘‘అనుభోమి ఫలం ఇట్ఠం, పుబ్బే సుకతమత్తనో;
పరిక్ఖిత్తో సుమల్లేహి, పుప్ఫదానస్సిదం ఫలం.
౧౬. ‘‘చతున్నవుతితో కప్పే, యం పుప్ఫమభిరోపయిం;
దుగ్గతిం నాభిజానామి, పుప్ఫపూజాయిదం [బుద్ధపూజాయిదం (సీ.)] ఫలం.
౧౭. ‘‘చతున్నవుతుపాదాయ, ఠపేత్వా వత్తమానకం;
పఞ్చరాజసతా తత్థ, నజ్జసమసనామకా [నజ్జుపమసనామకా (సీ. స్యా.)].
౧౮. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఉప్పలహత్థియో థేరో ఇమా గాథాయో అభాసిత్థాతి.
ఉప్పలహత్థియత్థేరస్సాపదానం తతియం.
౪. పదపూజకత్థేరఅపదానం
౧౯. ‘‘సిద్ధత్థస్స భగవతో, జాతిపుప్ఫమదాసహం;
పాదేసు సత్త పుప్ఫాని, హాసేనోకిరితాని మే.
౨౦. ‘‘తేన కమ్మేనహం అజ్జ, అభిభోమి నరామరే;
ధారేమి అన్తిమం దేహం, సమ్మాసమ్బుద్ధసాసనే.
౨౧. ‘‘చతున్నవుతితో కప్పే, యం పుప్ఫమభిరోపయిం;
దుగ్గతిం నాభిజానామి, పుప్ఫపూజాయిదం ఫలం.
౨౨. ‘‘సమన్తగన్ధనామాసుం, తేరస చక్కవత్తినో;
ఇతో పఞ్చమకే కప్పే, చాతురన్తా జనాధిపా.
౨౩. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా పదపూజకో థేరో ఇమా గాథాయో అభాసిత్థాతి.
పదపూజకత్థేరస్సాపదానం చతుత్థం.
౫. ముట్ఠిపుప్ఫియత్థేరఅపదానం
౨౪. ‘‘సుదస్సనోతి నామేన, మాలాకారో అహం తదా;
అద్దసం విరజం బుద్ధం, లోకజేట్ఠం నరాసభం.
౨౫. ‘‘జాతిపుప్ఫం గహేత్వాన, పూజయిం పదుముత్తరం;
విసుద్ధచక్ఖు సుమనో, దిబ్బచక్ఖుం సమజ్ఝగం.
౨౬. ‘‘ఏతిస్సా పుప్ఫపూజాయ, చిత్తస్స పణిధీహి చ;
కప్పానం సతసహస్సం, దుగ్గతిం నుపపజ్జహం.
౨౭. ‘‘సోళసాసింసు రాజానో, దేవుత్తరసనామకా;
ఛత్తింసమ్హి ఇతో కప్పే, చక్కవత్తీ మహబ్బలా.
౨౮. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ముట్ఠిపుప్ఫియో థేరో ఇమా గాథాయో అభాసిత్థాతి.
ముట్ఠిపుప్ఫియత్థేరస్సాపదానం పఞ్చమం.
౬. ఉదకపూజకత్థేరఅపదానం
౨౯. ‘‘సువణ్ణవణ్ణం సమ్బుద్ధం, గచ్ఛన్తం అనిలఞ్జసే;
ఘతాసనంవ జలితం, ఆదిత్తంవ హుతాసనం.
౩౦. ‘‘పాణినా ఉదకం గయ్హ, ఆకాసే ఉక్ఖిపిం అహం;
సమ్పటిచ్ఛి మహావీరో, బుద్ధో కారుణికో ఇసి [మయి (స్యా.)].
౩౧. ‘‘అన్తలిక్ఖే ఠితో సత్థా, పదుముత్తరనామకో;
మమ సఙ్కప్పమఞ్ఞాయ, ఇమం గాథం అభాసథ.
౩౨. ‘‘‘ఇమినా దకదానేన, పీతిఉప్పాదనేన చ;
కప్పసతసహస్సమ్పి, దుగ్గతిం నుపపజ్జతి’ [నుపపజ్జసి (క.)].
౩౩. ‘‘తేన కమ్మేన ద్విపదిన్ద, లోకజేట్ఠ నరాసభ;
పత్తోమ్హి అచలం ఠానం, హిత్వా జయపరాజయం.
౩౪. ‘‘సహస్సరాజనామేన, తయో తే చక్కవత్తినో;
పఞ్చసట్ఠికప్పసతే, చాతురన్తా జనాధిపా.
౩౫. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఉదకపూజకో థేరో ఇమా గాథాయో అభాసిత్థాతి.
ఉదకపూజకత్థేరస్సాపదానం ఛట్ఠం.
౭. నళమాలియత్థేరఅపదానం
౩౬. ‘‘పదుముత్తరబుద్ధస్స, లోకజేట్ఠస్స తాదినో;
తిణత్థరే నిసిన్నస్స, ఉపసన్తస్స తాదినో.
౩౭. ‘‘నళమాలం గహేత్వాన, బన్ధిత్వా [బీజిత్వా (క.)] బీజనిం అహం;
బుద్ధస్స ఉపనామేసిం, ద్విపదిన్దస్స తాదినో.
౩౮. ‘‘పటిగ్గహేత్వా సబ్బఞ్ఞూ, బీజనిం లోకనాయకో;
మమ సఙ్కప్పమఞ్ఞాయ, ఇమం గాథం అభాసథ.
౩౯. ‘‘‘యథా మే కాయో నిబ్బాతి, పరిళాహో న విజ్జతి;
తథేవ తివిధగ్గీహి, చిత్తం తవ విముచ్చతు’.
౪౦. ‘‘సబ్బే దేవా సమాగచ్ఛుం, యే కేచి వననిస్సితా;
సోస్సామ బుద్ధవచనం, హాసయన్తఞ్చ దాయకం.
౪౧. ‘‘నిసిన్నో భగవా తత్థ, దేవసఙ్ఘపురక్ఖతో;
దాయకం సమ్పహంసేన్తో, ఇమా గాథా అభాసథ.
౪౨. ‘‘‘ఇమినా బీజనిదానేన, చిత్తస్స పణిధీహి చ;
సుబ్బతో నామ నామేన, చక్కవత్తీ భవిస్సతి.
౪౩. ‘‘‘తేన కమ్మావసేసేన, సుక్కమూలేన చోదితో;
మాలుతో నామ నామేన, చక్కవత్తీ భవిస్సతి’.
౪౪. ‘‘‘ఇమినా బీజనిదానేన, సమ్మానవిపులేన చ;
కప్పసతసహస్సమ్పి, దుగ్గతిం నుపపజ్జతి.
౪౫. ‘‘తింసకప్పసహస్సమ్హి, సుబ్బతా అట్ఠతింస తే;
ఏకూనతింససహస్సే, అట్ఠ మాలుతనామకా.
౪౬. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా నళమాలియో థేరో ఇమా గాథాయో అభాసిత్థాతి.
నళమాలియత్థేరస్సాపదానం సత్తమం.
సత్తమభాణవారం.
౮. ఆసనుపట్ఠాహకత్థేరఅపదానం
౪౭. ‘‘కాననం వనమోగయ్హ, అప్పసద్దం నిరాకులం;
సీహాసనం మయా దిన్నం, అత్థదస్సిస్స తాదినో.
౪౮. ‘‘మాలాహత్థం గహేత్వాన, కత్వా చ నం పదక్ఖిణం;
సత్థారం పయిరుపాసిత్వా, పక్కామిం ఉత్తరాముఖో.
౪౯. ‘‘తేన కమ్మేన ద్విపదిన్ద, లోకజేట్ఠ నరాసభ;
సన్నిబ్బాపేమి [సన్దిట్ఠాపేమి (క.)] అత్తానం, భవా సబ్బే సమూహతా.
౫౦. ‘‘అట్ఠారసకప్పసతే, యం దానమదదిం తదా;
దుగ్గతిం నాభిజానామి, సీహాసనస్సిదం ఫలం.
౫౧. ‘‘ఇతో సత్తకప్పసతే, సన్నిబ్బాపక [సన్నిట్ఠో నామ (క.)] ఖత్తియో;
సత్తరతనసమ్పన్నో, చక్కవత్తీ మహబ్బలో.
౫౨. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఆసనుపట్ఠాహకో థేరో ఇమా గాథాయో అభాసిత్థాతి.
ఆసనుపట్ఠాహకత్థేరస్సాపదానం అట్ఠమం.
౯. బిళాలిదాయకత్థేరఅపదానం
౫౩. ‘‘హిమవన్తస్సావిదూరే, వసామి పణ్ణసన్థరే;
ఘాసేసు గేధమాపన్నో, సేయ్యసీలో చహం [సేయసీలోవహం (స్యా. క.)] తదా.
౫౪. ‘‘ఖణన్తాలు [ఖణమాలు (స్యా.)] కలమ్బాని, బిళాలితక్కలాని చ;
కోలం భల్లాతకం బిల్లం, ఆహత్వా పటియాదితం.
౫౫. ‘‘పదుముత్తరో లోకవిదూ, ఆహుతీనం పటిగ్గహో;
మమ సఙ్కప్పమఞ్ఞాయ, ఆగచ్ఛి మమ సన్తికం.
౫౬. ‘‘ఉపాగతం మహానాగం, దేవదేవం నరాసభం;
బిళాలిం పగ్గహేత్వాన, పత్తమ్హి ఓకిరిం అహం.
౫౭. ‘‘పరిభుఞ్జి మహావీరో, తోసయన్తో మమం తదా;
పరిభుఞ్జిత్వాన సబ్బఞ్ఞూ, ఇమం గాథం అభాసథ.
౫౮. ‘‘‘సకం చిత్తం పసాదేత్వా, బిళాలిం మే అదా తువం;
కప్పానం సతసహస్సం, దుగ్గతిం నుపపజ్జసి’.
౫౯. ‘‘చరిమం వత్తతే మయ్హం, భవా సబ్బే సమూహతా;
ధారేమి అన్తిమం దేహం, సమ్మాసమ్బుద్ధసాసనే.
౬౦. ‘‘చతుపఞ్ఞాసితో కప్పే, సుమేఖలియసవ్హయో;
సత్తరతనసమ్పన్నో, చక్కవత్తీ మహబ్బలో.
౬౧. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా బిళాలిదాయకో థేరో ఇమా గాథాయో అభాసిత్థాతి.
బిళాలిదాయకత్థేరస్సాపదానం నవమం.
౧౦. రేణుపూజకత్థేరఅపదానం
౬౨. ‘‘సువణ్ణవణ్ణం సమ్బుద్ధం, సతరంసింవ భాణుమం;
ఓభాసేన్తం దిసా సబ్బా, ఉళురాజంవ పూరితం.
౬౩. ‘‘పురక్ఖతం సావకేహి, సాగరేహేవ మేదనిం;
నాగం పగ్గయ్హ రేణూహి, విపస్సిస్సాభిరోపయిం.
౬౪. ‘‘ఏకనవుతితో కప్పే, యం రేణుమభిరోపయిం;
దుగ్గతిం నాభిజానామి, బుద్ధపూజాయిదం ఫలం.