౧౨. మహాపరివారవగ్గో

౧. మహాపరివారకత్థేరఅపదానం

౧. ‘‘విపస్సీ నామ భగవా, లోకజేట్ఠో నరాసభో;

అట్ఠసట్ఠిసహస్సేహి, పావిసి బన్ధుమం తదా.

౨. ‘‘నగరా అభినిక్ఖమ్మ, అగమం దీపచేతియం;

అద్దసం విరజం బుద్ధం, ఆహుతీనం పటిగ్గహం.

౩. ‘‘చుల్లాసీతిసహస్సాని, యక్ఖా మయ్హం ఉపన్తికే;

ఉపట్ఠహన్తి సక్కచ్చం [మం నిచ్చం (క.)], ఇన్దంవ తిదసా గణా.

౪. ‘‘భవనా అభినిక్ఖమ్మ, దుస్సం పగ్గయ్హహం తదా;

సిరసా అభివాదేసిం, తఞ్చాదాసిం మహేసినో.

౫. ‘‘అహో బుద్ధో అహో ధమ్మో, అహో నో సత్థు సమ్పదా;

బుద్ధస్స ఆనుభావేన, వసుధాయం పకమ్పథ.

౬. ‘‘తఞ్చ అచ్ఛరియం దిస్వా, అబ్భుతం లోమహంసనం;

బుద్ధే చిత్తం పసాదేమి, ద్విపదిన్దమ్హి తాదినే.

౭. ‘‘సోహం చిత్తం పసాదేత్వా, దుస్సం దత్వాన సత్థునో;

సరణఞ్చ ఉపాగచ్ఛిం, సామచ్చో సపరిజ్జనో.

౮. ‘‘ఏకనవుతితో కప్పే, యం కమ్మమకరిం తదా;

దుగ్గతిం నాభిజానామి, బుద్ధపూజాయిదం ఫలం.

౯. ‘‘ఇతో పన్నరసే కప్పే, సోళసాసుం సువాహనా [సోళసాసింసు వాహనో (స్యా.)];

సత్తరతనసమ్పన్నా, చక్కవత్తీ మహబ్బలా.

౧౦. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా మహాపరివారకో థేరో ఇమా గాథాయో అభాసిత్థాతి.

మహాపరివారకత్థేరస్సాపదానం పఠమం.

౨. సుమఙ్గలత్థేరఅపదానం

౧౧. ‘‘అత్థదస్సీ జినవరో, లోకజేట్ఠో నరాసభో;

విహారా అభినిక్ఖమ్మ, తళాకం ఉపసఙ్కమి.

౧౨. ‘‘న్హత్వా పిత్వా చ సమ్బుద్ధో, ఉత్తరిత్వేకచీవరో;

అట్ఠాసి భగవా తత్థ, విలోకేన్తో దిసోదిసం.

౧౩. ‘‘భవనే ఉపవిట్ఠోహం, అద్దసం లోకనాయకం;

హట్ఠో హట్ఠేన చిత్తేన, అప్ఫోటేసిం అహం తదా.

౧౪. ‘‘సతరంసింవ జోతన్తం, పభాసన్తంవ కఞ్చనం [ఇమినా పాదద్వయేన పురిమపాదద్వయస్స పురతో భవితబ్బం];

నచ్చగీతే పయుత్తోహం, పఞ్చఙ్గతూరియమ్హి చ.

౧౫. ‘‘యం యం యోనుపపజ్జామి, దేవత్తం అథ మానుసం;

సబ్బే సత్తే అభిభోమి, విపులో హోతి మే యసో [అయఞ్చ గాథా పరిగ్గహేతిగాథాయ అనన్తరమేవ ఠాతుం యుత్తా].

౧౬. ‘‘నమో తే పురిసాజఞ్ఞ, నమో తే పురిసుత్తమ;

అత్తానం తోసయిత్వాన, పరే తోసేసి త్వం ముని.

౧౭. ‘‘పరిగ్గహే [పరిగ్గయ్హ (సీ.), పరిగ్గహిత్వా (స్యా.), పరిగ్గహేన (క.)] నిసీదిత్వా, హాసం కత్వాన సుబ్బతే;

ఉపట్ఠహిత్వా సమ్బుద్ధం, తుసితం ఉపపజ్జహం.

౧౮. ‘‘సోళసేతో కప్పసతే, ద్వినవఏకచిన్తితా;

సత్తరతనసమ్పన్నా, చక్కవత్తీ మహబ్బలా.

౧౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సుమఙ్గలో థేరో ఇమా గాథాయో అభాసిత్థాతి.

సుమఙ్గలత్థేరస్సాపదానం దుతియం.

౩. సరణగమనియత్థేరఅపదానం

౨౦. ‘‘ఉభిన్నం దేవరాజూనం, సఙ్గామో సముపట్ఠితో;

అహోసి సముపబ్యూళ్హో [సముపబ్బూళ్హో (సీ.)], మహాఘోసో అవత్తథ [పవత్తథ (సీ.)].

౨౧. ‘‘పదుముత్తరో లోకవిదూ, ఆహుతీనం పటిగ్గహో;

అన్తలిక్ఖే ఠితో సత్థా, సంవేజేసి మహాజనం.

౨౨. ‘‘సబ్బే దేవా అత్తమనా, నిక్ఖిత్తకవచావుధా;

సమ్బుద్ధం అభివాదేత్వా, ఏకగ్గాసింసు తావదే.

౨౩. ‘‘మయ్హం [అమ్హం (సీ.)] సఙ్కప్పమఞ్ఞాయ, వాచాసభిముదీరయి;

అనుకమ్పకో లోకవిదూ, నిబ్బాపేసి మహాజనం.

౨౪. ‘‘పదుట్ఠచిత్తో మనుజో, ఏకపాణం విహేఠయం;

తేన చిత్తప్పదోసేన, అపాయం ఉపపజ్జతి.

౨౫. ‘‘సఙ్గామసీసే నాగోవ, బహూ పాణే విహేఠయం;

నిబ్బాపేథ సకం చిత్తం, మా హఞ్ఞిత్థో పునప్పునం.

౨౬. ‘‘ద్విన్నమ్పి యక్ఖరాజూనం, సేనా సా విమ్హితా అహు [సేనాయో విమ్హితా అహూ (సీ.), సేనాపి సమితా అహు (స్యా.)];

సరణఞ్చ ఉపాగచ్ఛుం, లోకజేట్ఠం సుతాదినం.

౨౭. ‘‘సఞ్ఞాపేత్వాన జనతం, పదముద్ధరి [ఉద్ధరి పన (సీ. స్యా.)] చక్ఖుమా;

పేక్ఖమానోవ దేవేహి, పక్కామి ఉత్తరాముఖో.

౨౮. ‘‘పఠమం సరణం గచ్ఛిం, ద్విపదిన్దస్స తాదినో;

కప్పానం సతసహస్సం, దుగ్గతిం నుపపజ్జహం.

౨౯. ‘‘మహాదున్దుభినామా చ, సోళసాసుం రథేసభా;

తింసకప్పసహస్సమ్హి, రాజానో చక్కవత్తినో.

౩౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సరణగమనియో థేరో ఇమా గాథాయో అభాసిత్థాతి.

సరణగమనియత్థేరస్సాపదానం తతియం.

౪. ఏకాసనియత్థేరఅపదానం

౩౧. ‘‘వరుణో నామ నామేన, దేవరాజా అహం తదా;

ఉపట్ఠహేసిం సమ్బుద్ధం, సయోగ్గబలవాహనో.

౩౨. ‘‘నిబ్బుతే లోకనాథమ్హి, అత్థదస్సీనరుత్తమే;

తూరియం సబ్బమాదాయ, అగమం బోధిముత్తమం.

౩౩. ‘‘వాదితేన చ నచ్చేన, సమ్మతాళసమాహితో;

సమ్ముఖా వియ సమ్బుద్ధం, ఉపట్ఠిం బోధిముత్తమం.

౩౪. ‘‘ఉపట్ఠహిత్వా తం బోధిం, ధరణీరుహపాదపం;

పల్లఙ్కం ఆభుజిత్వాన, తత్థ కాలఙ్కతో అహం.

౩౫. ‘‘సకకమ్మాభిరద్ధోహం, పసన్నో బోధిముత్తమే;

తేన చిత్తప్పసాదేన, నిమ్మానం ఉపపజ్జహం.

౩౬. ‘‘సట్ఠితూరియసహస్సాని, పరివారేన్తి మం సదా;

మనుస్సేసు చ దేవేసు, వత్తమానం భవాభవే.

౩౭. ‘‘తివిధగ్గీ నిబ్బుతా మయ్హం, భవా సబ్బే సమూహతా;

ధారేమి అన్తిమం దేహం, సమ్మాసమ్బుద్ధసాసనే [అయఞ్చ గాథా పటిసమ్భిదా చతస్సేతిగాథాయ ఏకసమ్బన్ధా భవితం యుత్తా].

౩౮. ‘‘సుబాహూ నామ నామేన, చతుత్తింసాసు ఖత్తియా;

సత్తరతనసమ్పన్నా, పఞ్చకప్పసతే ఇతో.

౩౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఏకాసనియో థేరో ఇమా గాథాయో అభాసిత్థాతి.

ఏకాసనియత్థేరస్సాపదానం చతుత్థం.

౫. సువణ్ణపుప్ఫియత్థేరఅపదానం

౪౦. ‘‘విపస్సీ నామ భగవా, లోకజేట్ఠో నరాసభో;

నిసిన్నో జనకాయస్స, దేసేసి అమతం పదం.

౪౧. ‘‘తస్సాహం ధమ్మం సుత్వాన, ద్విపదిన్దస్స తాదినో;

సోణ్ణపుప్ఫాని చత్తారి, బుద్ధస్స అభిరోపయిం.

౪౨. ‘‘సువణ్ణచ్ఛదనం ఆసి, యావతా పరిసా తదా;

బుద్ధాభా చ సువణ్ణాభా, ఆలోకో విపులో అహు.

౪౩. ‘‘ఉదగ్గచిత్తో సుమనో, వేదజాతో కతఞ్జలీ;

విత్తిసఞ్జననో తేసం, దిట్ఠధమ్మసుఖావహో.

౪౪. ‘‘ఆయాచిత్వాన సమ్బుద్ధం, వన్దిత్వాన చ సుబ్బతం;

పామోజ్జం జనయిత్వాన, సకం భవనుపాగమిం.

౪౫. ‘‘భవనే ఉపవిట్ఠోహం, బుద్ధసేట్ఠం అనుస్సరిం;

తేన చిత్తప్పసాదేన, తుసితం ఉపపజ్జహం.

౪౬. ‘‘ఏకనవుతితో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౪౭. ‘‘సోళసాసింసు రాజానో, నేమిసమ్మతనామకా;

తేతాలీసే ఇతో కప్పే, చక్కవత్తీ మహబ్బలా.

౪౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సువణ్ణపుప్ఫియో థేరో ఇమా గాథాయో అభాసిత్థాతి.

సువణ్ణపుప్ఫియత్థేరస్సాపదానం పఞ్చమం.

౬. చితకపూజకత్థేరఅపదానం

౪౯. ‘‘వసామి రాజాయతనే, సామచ్చో సపరిజ్జనో;

పరినిబ్బుతే భగవతి, సిఖినో లోకబన్ధునో.

౫౦. ‘‘పసన్నచిత్తో సుమనో, చితకం అగమాసహం;

తూరియం తత్థ వాదేత్వా, గన్ధమాలం సమోకిరిం.

౫౧. ‘‘చితమ్హి పూజం కత్వాన, వన్దిత్వా చితకం అహం;

పసన్నచిత్తో సుమనో, సకం భవనుపాగమిం.

౫౨. ‘‘భవనే ఉపవిట్ఠోహం, చితపూజం అనుస్సరిం;

తేన కమ్మేన ద్విపదిన్ద, లోకజేట్ఠ నరాసభ.

౫౩. ‘‘అనుభోత్వాన సమ్పత్తిం, దేవేసు మానుసేసు చ;

పత్తోమ్హి అచలం ఠానం, హిత్వా జయపరాజయం.

౫౪. ‘‘ఏకత్తింసే ఇతో కప్పే, యం పుప్ఫమభిరోపయిం;

దుగ్గతిం నాభిజానామి, చితపూజాయిదం ఫలం.

౫౫. ‘‘ఏకూనతింసకప్పమ్హి, ఇతో సోళస రాజానో;

ఉగ్గతా నామ నామేన, చక్కవత్తీ మహబ్బలా.

౫౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా చితకపూజకో థేరో ఇమా గాథాయో అభాసిత్థాతి.

చితకపూజకత్థేరస్సాపదానం ఛట్ఠం.

౭. బుద్ధసఞ్ఞకత్థేరఅపదానం

౫౭. ‘‘యదా విపస్సీ లోకగ్గో, ఆయుసఙ్ఖారమోస్సజి;

పథవీ సమ్పకమ్పిత్థ, మేదనీ జలమేఖలా.

౫౮. ‘‘ఓతతం విత్థతం [ఓతతం వితతం (స్యా.)] మయ్హం, సువిచిత్తవటంసకం [సుచిచిత్తం పపఞ్చకం (స్యా.)];

భవనమ్పి పకమ్పిత్థ, బుద్ధస్స ఆయుసఙ్ఖయే.

౫౯. ‘‘తాసో మయ్హం సముప్పన్నో, భవనే సమ్పకమ్పితే;

ఉప్పాదో [ఉప్పాతో (?)] ను కిమత్థాయ, ఆలోకో విపులో అహు.

౬౦. ‘‘వేస్సవణో ఇధాగమ్మ, నిబ్బాపేసి మహాజనం;

పాణభూతే [పాణభుతం (స్యా.), పాణభూనం (సీ. క.)] భయం నత్థి, ఏకగ్గా హోథ సంవుతా [సగారవా (స్యా.)].

౬౧. ‘‘అహో బుద్ధో అహో ధమ్మో, అహో నో సత్థు సమ్పదా;

యస్మిం ఉప్పజ్జమానమ్హి, పథవీ [పఠవీ (సీ. స్యా.)] సమ్పకమ్పతి.

౬౨. ‘‘బుద్ధానుభావం కిత్తేత్వా, కప్పం సగ్గమ్హి మోదహం;

అవసేసేసు కప్పేసు, కుసలం చరితం [కరితం (సీ. స్యా.), కారితం (క.)] మయా.

౬౩. ‘‘ఏకనవుతితో కప్పే, యం సఞ్ఞమలభిం తదా;

దుగ్గతిం నాభిజానామి, బుద్ధసఞ్ఞాయిదం ఫలం.

౬౪. ‘‘ఇతో చుద్దసకప్పమ్హి, రాజా ఆసిం పతాపవా;

సమితో నామ నామేన, చక్కవత్తీ మహబ్బలో.

౬౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా బుద్ధసఞ్ఞకో థేరో ఇమా గాథాయో అభాసిత్థాతి.

బుద్ధసఞ్ఞకత్థేరస్సాపదానం సత్తమం.

౮. మగ్గసఞ్ఞకత్థేరఅపదానం

౬౬. ‘‘పదుముత్తరబుద్ధస్స, సావకా వనచారినో;

విప్పనట్ఠా బ్రహారఞ్ఞే, అన్ధావ అనుసుయ్యరే [అనుసుయరే (సీ.)].

౬౭. ‘‘అనుస్సరిత్వా సమ్బుద్ధం, పదుముత్తరనాయకం;