౩. నిపన్నఞ్జలికత్థేరఅపదానం

౧౬. ‘‘రుక్ఖమూలే నిసిన్నోహం, బ్యాధితో పరమేన చ;

పరమకారుఞ్ఞపత్తోమ్హి, అరఞ్ఞే కాననే అహం.

౧౭. ‘‘అనుకమ్పం ఉపాదాయ, తిస్సో సత్థా ఉపేసి మం;

సోహం నిపన్నకో సన్తో, సిరే కత్వాన అఞ్జలిం.

౧౮. ‘‘పసన్నచిత్తో సుమనో, సబ్బసత్తానముత్తమం;

సమ్బుద్ధం అభివాదేత్వా, తత్థ కాలఙ్కతో అహం.

౧౯. ‘‘ద్వేనవుతే ఇతో కప్పే, యం వన్దిం పురిసుత్తమం;

దుగ్గతిం నాభిజానామి, వన్దనాయ ఇదం ఫలం.

౨౦. ‘‘ఇతో పఞ్చమకే కప్పే, పఞ్చేవాసుం మహాసిఖా;

సత్తరతనసమ్పన్నా, చక్కవత్తీ మహబ్బలా.

౨౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా నిపన్నఞ్జలికో థేరో ఇమా గాథాయో అభాసిత్థాతి.

నిపన్నఞ్జలికత్థేరస్సాపదానం తతియం.