౧౦. తిపదుమియత్థేరఅపదానం

౪౮. ‘‘పదుముత్తరో నామ జినో, సబ్బధమ్మాన పారగూ;

దన్తో దన్తపరివుతో, నగరా నిక్ఖమీ తదా.

౪౯. ‘‘నగరే హంసవతియం, అహోసిం మాలికో తదా;

యం తత్థ ఉత్తమం తోణి, పద్మపుప్ఫాని [ఉత్తమం పుప్ఫం, తీణి పుప్ఫాని (సీ.)] అగ్గహిం.

౫౦. ‘‘అద్దసం విరజం బుద్ధం, పటిమగ్గన్తరాపణే;

సహ [సోహం (సీ.)] దిస్వాన సమ్బుద్ధం, ఏవం చిన్తేసహం తదా.

౫౧. ‘‘కిం మే ఇమేహి పుప్ఫేహి, రఞ్ఞో ఉపనితేహి మే;

గామం వా గామఖేత్తం వా, సహస్సం వా లభేయ్యహం.

౫౨. ‘‘అదన్తదమనం వీరం, సబ్బసత్తసుఖావహం;

లోకనాథం పూజయిత్వా, లచ్ఛామి అమతం ధనం.

౫౩. ‘‘ఏవాహం చిన్తయిత్వాన, సకం చిత్తం పసాదయిం;

తీణి లోహితకే గయ్హ, ఆకాసే ఉక్ఖిపిం తదా.

౫౪. ‘‘మయా ఉక్ఖిత్తమత్తమ్హి, ఆకాసే పత్థరింసు తే;

ధారింసు మత్థకే తత్థ, ఉద్ధంవణ్టా అధోముఖా.

౫౫. ‘‘యే కేచి మనుజా దిస్వా, ఉక్కుట్ఠిం సమ్పవత్తయుం;

దేవతా అన్తలిక్ఖమ్హి, సాధుకారం పవత్తయుం.

౫౬. ‘‘అచ్ఛేరం లోకే ఉప్పన్నం, బుద్ధసేట్ఠస్స వాహసా;

సబ్బే ధమ్మం సుణిస్సామ, పుప్ఫానం వాహసా మయం.

౫౭. ‘‘పదుముత్తరో లోకవిదూ, ఆహుతీనం పటిగ్గహో;

వీథియఞ్హి ఠితో సన్తో, ఇమా గాథా అభాసథ.

౫౮. ‘‘‘యో సో బుద్ధం అపూజేసి, రత్తపద్మేహి [రత్తపదుమేహి (సీ. స్యా.)] మాణవో;

తమహం కిత్తయిస్సామి, సుణాథ మమ భాసతో.

౫౯. ‘‘‘తింసకప్పసహస్సాని, దేవలోకే రమిస్సతి;

తింసకప్పాని [తింసక్ఖత్తుఞ్చ (స్యా.)] దేవిన్దో, దేవరజ్జం కరిస్సతి.

౬౦. ‘‘‘మహావిత్థారికం నామ, బ్యమ్హం హేస్సతి తావదే;

తియోజనసతుబ్బిద్ధం, దియడ్ఢసతవిత్థతం.

౬౧. ‘‘‘చత్తారిసతసహస్సాని, నియ్యూహా చ సుమాపితా;

కూటాగారవరూపేతా, మహాసయనమణ్డితా.

౬౨. ‘‘‘కోటిసతసహస్సియో, పరివారేస్సన్తి అచ్ఛరా;

కుసలా నచ్చగీతస్స, వాదితేపి పదక్ఖిణా.

౬౩. ‘‘‘ఏతాదిసే బ్యమ్హవరే, నారీగణసమాకులే;

వస్సిస్సతి పుప్ఫవస్సో, దిబ్బో [పద (క.)] లోహితకో సదా.

౬౪. ‘‘‘భిత్తిఖీలే నాగదన్తే, ద్వారబాహాయ తోరణే;

చక్కమత్తా లోహితకా, ఓలమ్బిస్సన్తి తావదే.

౬౫. ‘‘‘పత్తేన పత్తసఞ్ఛన్నే, అన్తోబ్యమ్హవరే ఇమం;

అత్థరిత్వా పారుపిత్వా, తువట్టిస్సన్తి తావదే.

౬౬. ‘‘‘భవనం పరివారేత్వా, సమన్తా సతయోజనే;

తేపి పద్మా [తే విసుద్ధా (సీ. స్యా.)] లోహితకా, దిబ్బగన్ధం పవాయరే.

౬౭. ‘‘‘పఞ్చసత్తతిక్ఖత్తుఞ్చ, చక్కవత్తీ భవిస్సతి;

పదేసరజ్జం విపులం, గణనాతో అసఙ్ఖియం.

౬౮. ‘‘‘సమ్పత్తియో దువే భుత్వా, అనీతి అనుపద్దవో;

సమ్పత్తే పరియోసానే, నిబ్బానం పాపుణిస్సతి’ [ఫస్సయిస్సతి (సీ.), పస్సయిస్సతి (క.)].

౬౯. ‘‘సుదిట్ఠో వత మే బుద్ధో, వాణిజ్జం సుపయోజితం;

పద్మాని తీణి పూజేత్వా, అనుభోసిం తిసమ్పదా [అనుభూయన్తి సమ్పదా (క.)].

౭౦. ‘‘అజ్జ మే ధమ్మప్పత్తస్స, విప్పముత్తస్స సబ్బసో;

సుపుప్ఫితం లోహితకం, ధారయిస్సతి మత్థకే.

౭౧. ‘‘మమ కమ్మం కథేన్తస్స, పదుముత్తరసత్థునో;

సతపాణసహస్సానం, ధమ్మాభిసమయో అహు.

౭౨. ‘‘సతసహస్సితో కప్పే, యం బుద్ధమభిపూజయిం;

దుగ్గతిం నాభిజానామి, తిపదుమానిదం ఫలం.

౭౩. ‘‘కిలేసా ఝాపితా మయ్హం, భవా సబ్బే సమూహతా;

సబ్బాసవా పరిక్ఖీణా, నత్థి దాని పునబ్భవో.

౭౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తిపదుమియో థేరో ఇమా గాథాయో అభాసిత్థాతి.

తిపదుమియత్థేరస్సాపదానం దసమం.

నాగసమాలవగ్గో అట్ఠమో.