౮. నాగసమాలవగ్గో

౧. నాగసమాలత్థేరఅపదానం

౧. ‘‘అపాటలిం అహం పుప్ఫం, ఉజ్ఝితం సుమహాపథే;

థూపమ్హి అభిరోపేసిం, సిఖినో లోకబన్ధునో.

౨. ‘‘ఏకత్తింసే ఇతో కప్పే, యం కమ్మమకరిం తదా;

దుగ్గతిం నాభిజానామి, థూపపూజాయిదం ఫలం.

౩. ‘‘ఇతో పన్నరసే కప్పే, భూమియో [పుప్ఫియో (స్యా.)] నామ ఖత్తియో;

సత్తరతనసమ్పన్నో, చక్కవత్తీ మహబ్బలో.

౪. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా నాగసమాలో థేరో ఇమా గాథాయో అభాసిత్థాతి.

నాగసమాలత్థేరస్సాపదానం పఠమం.

౨. పదసఞ్ఞకత్థేరఅపదానం

౫. ‘‘అక్కన్తఞ్చ పదం దిస్వా, తిస్సస్సాదిచ్చబన్ధునో;

హట్ఠో హట్ఠేన చిత్తేన, పదే చిత్తం పసాదయిం.

౬. ‘‘ద్వేనవుతే ఇతో కప్పే, యం సఞ్ఞమలభిం తదా;

దుగ్గతిం నాభిజానామి, పదసఞ్ఞాయిదం ఫలం.

౭. ‘‘ఇతో సత్తమకే కప్పే, సుమేధో నామ ఖత్తియో;

సత్తరతనసమ్పన్నో, చక్కవతీ మహబ్బలో.

౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పదసఞ్ఞకో థేరో ఇమా గాథాయో అభాసిత్థాతి.

పదసఞ్ఞకత్థేరస్సాపదానం దుతియం.

౩. బుద్ధసఞ్ఞకత్థేరఅపదానం

౯. ‘‘దుమగ్గే పంసుకూలికం, లగ్గం దిస్వాన సత్థునో;

తతో తమఞ్జలిం కత్వా, పంసుకూలం అవన్దహం.

౧౦. ‘‘ద్వేనవుతే ఇతో కప్పే, యం కమ్మమకరిం తదా;

దుగ్గతిం నాభిజానామి, బుద్ధసఞ్ఞాయిదం ఫలం.

౧౧. ‘‘ఇతో చతుత్థకే కప్పే, దుమసారోసి ఖత్తియో;

చాతురన్తో విజితావీ, చక్కవత్తీ మహబ్బలో.

౧౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా బుద్ధసఞ్ఞకో థేరో ఇమా గాథాయో అభాసిత్థాతి.

బుద్ధసఞ్ఞకత్థేరస్సాపదానం తతియం.

౪. భిసాలువదాయకత్థేరఅపదానం

౧౩. ‘‘కాననం వనమోగయ్హ, వసామి విపినే అహం;

విపస్సిం అద్దసం బుద్ధం, ఆహుతీనం పటిగ్గహం.

౧౪. ‘‘భిసాలువఞ్చ పాదాసిం, ఉదకం హత్థధోవనం;

వన్దిత్వా సిరసా పాదే, పక్కామి ఉత్తరాముఖో.

౧౫. ‘‘ఏకనవుతితో కప్పే, భిసాలువమదం తదా;

దుగ్గతిం నాభిజానామి, పుఞ్ఞకమ్మస్సిదం ఫలం.

౧౬. ‘‘ఇతో తతియకే కప్పే, భిససమ్మతఖత్తియో;

సత్తరతనసమ్పన్నో, చక్కవత్తీ మహబ్బలో.

౧౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా భిసాలువదాయకో థేరో ఇమా గాథాయో అభాసిత్థాతి.

భిసాలువదాయకత్థేరస్సాపదానం చతుత్థం.

ఛట్ఠభాణవారం.

౫. ఏకసఞ్ఞకత్థేరఅపదానం

౧౮. ‘‘ఖణ్డో నామాసి నామేన, విపస్సిస్సగ్గసావకో;

ఏకా భిక్ఖా మయా దిన్నా, లోకాహుతిపటిగ్గహే.

౧౯. ‘‘తేన చిత్తప్పసాదేన, ద్విపదిన్ద నరాసభ;

దుగ్గతిం నాభిజానామి, ఏకభిక్ఖాయిదం ఫలం.

౨౦. ‘‘చత్తాలీసమ్హితో కప్పే, వరుణో నామ ఖత్తియో;

సత్తరతనసమ్పన్నో, చక్కవత్తీ మహబ్బలో.

౨౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఏకసఞ్ఞకో థేరో ఇమా గాథాయో అభాసిత్థాతి.

ఏకసఞ్ఞకత్థేరస్సాపదానం పఞ్చమం.

౬. తిణసన్థరదాయకత్థేరఅపదానం

౨౨. ‘‘హిమవన్తస్సావిదూరే, మహాజాతస్సరో అహు;

సతపత్తేహి సఞ్ఛన్నో, నానాసకుణమాలయో.

౨౩. ‘‘తమ్హి న్హత్వా చ పిత్వా [పీత్వా (సీ. స్యా.)] చ, అవిదూరే వసామహం;

అద్దసం సమణానగ్గం, గచ్ఛన్తం అనిలఞ్జసే.

౨౪. ‘‘మమ సఙ్కప్పమఞ్ఞాయ, సత్థా లోకే అనుత్తరో;

అబ్భతో ఓరుహిత్వాన, భూమియంఠాసి తావదే.

౨౫. ‘‘విసాణేన [లాయనేన (స్యా.)] తిణం గయ్హ, నిసీదనమదాసహం;

నిసీది భగవా తత్థ, తిస్సో లోకగ్గనాయకో.

౨౬. ‘‘సకం చిత్తం పసాదేత్వా, అవన్ది లోకనాయకం;

పటికుటికో [ఉక్కుటికో (స్యా. క.)] అపసక్కిం, నిజ్ఝాయన్తో మహామునిం.

౨౭. ‘‘తేన చిత్తప్పసాదేన, నిమ్మానం ఉపపజ్జహం;

దుగ్గతిం నాభిజానామి, సన్థరస్స ఇదం ఫలం.

౨౮. ‘‘ఇతో దుతియకే కప్పే, మిగ [మిత్త (స్యా.)] సమ్మతఖత్తియో;

సత్తరతనసమ్పన్నో, చక్కవత్తీ మహబ్బలో.

౨౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తిణసన్థరదాయకో థేరో ఇమా గాథాయో అభాసిత్థాతి.

తిణసన్థరదాయకత్థేరస్సాపదానం ఛట్ఠం.

౭. సూచిదాయకత్థేరఅపదానం

౩౦. ‘‘తింసకప్పసహస్సమ్హి, సమ్బుద్ధో లోకనాయకో;

సుమేధో నామ నామేన, బాత్తింసవరలక్ఖణో.

౩౧. ‘‘తస్స కఞ్చనవణ్ణస్స, ద్విపదిన్దస్స తాదినో;

పఞ్చ సూచీ మయా దిన్నా, సిబ్బనత్థాయ చీవరం.

౩౨. ‘‘తేనేవ సూచిదానేన, నిపుణత్థవిపస్సకం;

తిక్ఖం లహుఞ్చ ఫాసుఞ్చ, ఞాణం మే ఉదపజ్జథ.

౩౩. ‘‘కిలేసా ఝాపితా మయ్హం, భవా సబ్బే సమూహతా;

ధారేమి అన్తిమం దేహం, సమ్మాసమ్బుద్ధసాసనే.

౩౪. ‘‘ద్విపదాధిపతీ నామ, రాజానో చతురో అహుం;

సత్తరతనసమ్పన్నా, చక్కవత్తీ మహబ్బలా.

౩౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సూచిదాయకో థేరో ఇమా గాథాయో అభాసిత్థాతి.

సూచిదాయకత్థేరస్సాపదానం సత్తమం.

౮. పాటలిపుప్ఫియత్థేరఅపదానం

౩౬. ‘‘సువణ్ణవణ్ణం సమ్బుద్ధం, గచ్ఛన్తం అన్తరాపణే;

కఞ్చనగ్ఘియసఙ్కాసం, బాత్తింసవరలక్ఖణం.

౩౭. ‘‘సేట్ఠిపుత్తో తదా ఆసిం, సుఖుమాలో సుఖేధితో;

ఉచ్ఛఙ్గే పాటలిపుప్ఫం, కత్వాన [కత్వా తం (సీ. స్యా.)] అభిసంహరిం.

౩౮. ‘‘హట్ఠో హట్ఠేన చిత్తేన, పుప్ఫేహి అభిపూజయిం;

తిస్సం లోకవిదుం నాథం, నరదేవం నమస్సహం.

౩౯. ‘‘ద్వేనవుతే ఇతో కప్పే, యం కమ్మమకరిం తదా;

దుగ్గతిం నాభిజానామి, పుప్ఫపూజాయిదం ఫలం.

౪౦. ‘‘ఇతో తేసట్ఠికప్పమ్హి, అభిసమ్మతనామకో;

సత్తరతనసమ్పన్నో, చక్కవత్తీ మహబ్బలో.

౪౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పాటలిపుప్ఫియో థేరో ఇమా గాథాయో అభాసిత్థాతి.

పాటలిపుప్ఫియత్థేరస్సాపదానం అట్ఠమం.

౯. ఠితఞ్జలియత్థేరఅపదానం

౪౨. ‘‘మిగలుద్దో పురే ఆసిం, అరఞ్ఞే కాననే అహం;

తత్థ అద్దసం [తత్థద్దసాసిం (సీ. స్యా.)] సమ్బుద్ధం, బాత్తింసవరలక్ఖణం.

౪౩. ‘‘తత్థాహం అఞ్జలిం కత్వా, పక్కామిం పాచినాముఖో;

అవిదూరే నిసిన్నస్స, నియకే పణ్ణసన్థరే.

౪౪. ‘‘తతో మే అసనీపాతో, మత్థకే నిపతీ తదా;

సోహం మరణకాలమ్హి, అకాసిం పునరఞ్జలిం.

౪౫. ‘‘ద్వేనవుతే ఇతో కప్పే, అఞ్జలిం అకరిం తదా;

దుగ్గతిం నాభిజానామి, అఞ్జలిస్స ఇదం ఫలం.

౪౬. ‘‘చతుపణ్ణాసకప్పమ్హి, మిగకేతుసనామకో;

సత్తరతనసమ్పన్నో, చక్కవత్తీ మహబ్బలో.

౪౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఠితఞ్జలియో థేరో ఇమా గాథాయో అభాసిత్థాతి.

ఠితఞ్జలియత్థేరస్సాపదానం నవమం.

౧౦. తిపదుమియత్థేరఅపదానం

౪౮. ‘‘పదుముత్తరో నామ జినో, సబ్బధమ్మాన పారగూ;

దన్తో దన్తపరివుతో, నగరా నిక్ఖమీ తదా.

౪౯. ‘‘నగరే హంసవతియం, అహోసిం మాలికో తదా;

యం తత్థ ఉత్తమం తోణి, పద్మపుప్ఫాని [ఉత్తమం పుప్ఫం, తీణి పుప్ఫాని (సీ.)] అగ్గహిం.

౫౦. ‘‘అద్దసం విరజం బుద్ధం, పటిమగ్గన్తరాపణే;

సహ [సోహం (సీ.)] దిస్వాన సమ్బుద్ధం, ఏవం చిన్తేసహం తదా.

౫౧. ‘‘కిం మే ఇమేహి పుప్ఫేహి, రఞ్ఞో ఉపనితేహి మే;

గామం వా గామఖేత్తం వా, సహస్సం వా లభేయ్యహం.

౫౨. ‘‘అదన్తదమనం వీరం, సబ్బసత్తసుఖావహం;

లోకనాథం పూజయిత్వా, లచ్ఛామి అమతం ధనం.

౫౩. ‘‘ఏవాహం చిన్తయిత్వాన, సకం చిత్తం పసాదయిం;

తీణి లోహితకే గయ్హ, ఆకాసే ఉక్ఖిపిం తదా.

౫౪. ‘‘మయా ఉక్ఖిత్తమత్తమ్హి, ఆకాసే పత్థరింసు తే;

ధారింసు మత్థకే తత్థ, ఉద్ధంవణ్టా అధోముఖా.

౫౫. ‘‘యే కేచి మనుజా దిస్వా, ఉక్కుట్ఠిం సమ్పవత్తయుం;

దేవతా అన్తలిక్ఖమ్హి, సాధుకారం పవత్తయుం.

౫౬. ‘‘అచ్ఛేరం లోకే ఉప్పన్నం, బుద్ధసేట్ఠస్స వాహసా;

సబ్బే ధమ్మం సుణిస్సామ, పుప్ఫానం వాహసా మయం.

౫౭. ‘‘పదుముత్తరో లోకవిదూ, ఆహుతీనం పటిగ్గహో;

వీథియఞ్హి ఠితో సన్తో, ఇమా గాథా అభాసథ.

౫౮. ‘‘‘యో సో బుద్ధం అపూజేసి, రత్తపద్మేహి [రత్తపదుమేహి (సీ. స్యా.)] మాణవో;

తమహం కిత్తయిస్సామి, సుణాథ మమ భాసతో.

౫౯. ‘‘‘తింసకప్పసహస్సాని, దేవలోకే రమిస్సతి;

తింసకప్పాని [తింసక్ఖత్తుఞ్చ (స్యా.)] దేవిన్దో, దేవరజ్జం కరిస్సతి.

౬౦. ‘‘‘మహావిత్థారికం నామ, బ్యమ్హం హేస్సతి తావదే;

తియోజనసతుబ్బిద్ధం, దియడ్ఢసతవిత్థతం.

౬౧. ‘‘‘చత్తారిసతసహస్సాని, నియ్యూహా చ సుమాపితా;

కూటాగారవరూపేతా, మహాసయనమణ్డితా.

౬౨. ‘‘‘కోటిసతసహస్సియో, పరివారేస్సన్తి అచ్ఛరా;

కుసలా నచ్చగీతస్స, వాదితేపి పదక్ఖిణా.

౬౩. ‘‘‘ఏతాదిసే బ్యమ్హవరే, నారీగణసమాకులే;

వస్సిస్సతి పుప్ఫవస్సో, దిబ్బో [పద (క.)] లోహితకో సదా.

౬౪. ‘‘‘భిత్తిఖీలే నాగదన్తే, ద్వారబాహాయ తోరణే;

చక్కమత్తా లోహితకా, ఓలమ్బిస్సన్తి తావదే.