౯. సుమనత్థేరఅపదానం

౬౨. ‘‘సుమనో నామ నామేన, మాలాకారో అహం తదా;

అద్దసం విరజం బుద్ధం, లోకాహుతిపటిగ్గహం.

౬౩. ‘‘ఉభో హత్థేహి పగ్గయ్హ, సుమనం పుప్ఫముత్తమం;

బుద్ధస్స అభిరోపేసిం, సిఖినో లోకబన్ధునో.

౬౪. ‘‘ఇమాయ పుప్ఫపూజాయ, చేతనాపణిధీహి చ;

దుగ్గతిం నాభిజానామి, బుద్ధపూజాయిదం ఫలం.

౬౫. ‘‘ఏకత్తింసే ఇతో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం [పుప్ఫపూజాయిదం (సీ.)] ఫలం.

౬౬. ‘‘ఛబ్బీసతిమ్హి కప్పమ్హి, చత్తారోసుం మహాయసా;

సత్తరతనసమ్పన్నా, రాజానో చక్కవత్తినో.

౬౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సుమనో థేరో ఇమా గాథాయో అభాసిత్థాతి.

సుమనత్థేరస్సాపదానం నవమం.