౭. సకచిన్తనియవగ్గో
౧. సకచిన్తనియత్థేరఅపదానం
౧. ‘‘పవనం కాననం దిస్వా, అప్పసద్దమన్నావిలం;
ఇసీనం అనుచిణ్ణంవ, ఆహుతీనం పటిగ్గహం.
౨. ‘‘థూపం కత్వాన పులినం [వేళునా (అట్ఠ.), వేళినం (స్యా.)], నానాపుప్ఫం సమోకిరిం;
సమ్ముఖా వియ సమ్బుద్ధం, నిమ్మితం అభివన్దహం.
౩. ‘‘సత్తరతనసమ్పన్నో, రాజా రట్ఠమ్హి ఇస్సరో;
సకకమ్మాభిరద్ధోహం, పుప్ఫపూజాయిదం [థూపపూజాయిదం (సీ.)] ఫలం.
౪. ‘‘ఏకనవుతితో కప్పే, యం పుప్ఫమభిరోపయిం;
దుగ్గతిం నాభిజానామి, పుప్ఫపూజాయిదం [థూపపూజాయిదం (సీ.)] ఫలం.
౫. ‘‘అసీతికప్పేనన్తయసో, చక్కవత్తీ అహోసహం;
సత్తరతనసమ్పన్నో, చతుదీపమ్హి ఇస్సరో.
౬. ‘‘పటిసమ్భిదా చతస్సో, విమోక్ఖాపి చ అట్ఠిమే;
ఛళభిఞ్ఞా సచ్ఛికతా, కతం బుద్ధస్స సాసనం’’.
ఇత్థం సుదం ఆయస్మా సకచిన్తనియో థేరో ఇమా గాథాయో అభాసిత్థాతి.
సకచిన్తనియత్థేరస్సాపదానం పఠమం.
౨. అవోపుప్ఫియత్థేరఅపదానం
౭. ‘‘విహారా అభినిక్ఖమ్మ, అబ్భుట్ఠహియ [అబ్భుట్ఠాసి చ (స్యా. క.)] చఙ్కమే;
చతుసచ్చం పకాసన్తో, దేసేతి [దేసేన్తో (స్యా. క.)] అమతం పదం.
౮. ‘‘సిఖిస్స గిరమఞ్ఞాయ, బుద్ధసేట్ఠస్స తాదినో;
నానాపుప్ఫం గహేత్వాన, ఆకాసమ్హి సమోకిరిం.
౯. ‘‘తేన కమ్మేన ద్విపదిన్ద, లోకజేట్ఠ నరాసభ;
పత్తోమ్హి అచలం ఠానం, హిత్వా జయపరాజయం.
౧౦. ‘‘ఏకత్తింసే ఇతో కప్పే, యం పుప్ఫమభిరోపయిం;
దుగ్గతిం నాభిజానామి, పుప్ఫపూజాయిదం ఫలం.
౧౧. ‘‘ఇతో వీసతికప్పమ్హి, సుమేధో నామ ఖత్తియో;
సత్తరతనసమ్పన్నో, చక్కవత్తీ మహబ్బలో.
౧౨. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా అవోపుప్ఫియో థేరో ఇమా గాథాయో అభాసిత్థాతి.
అవోపుప్ఫియత్థేరస్సాపదానం దుతియం.
౩. పచ్చాగమనియత్థేరఅపదానం
౧౩. ‘‘సిన్ధుయా నదియా తీరే, చక్కవాకో అహం తదా;
సుద్ధసేవాలభక్ఖోహం, పాపేసు చ సుసఞ్ఞతో.
౧౪. ‘‘అద్దసం విరజం బుద్ధం, గచ్ఛన్తం అనిలఞ్జసే;
తుణ్డేన సాలం పగ్గయ్హ, విపస్సిస్సాభిరోపయిం.
౧౫. ‘‘యస్స సద్ధా తథాగతే, అచలా సుపతిట్ఠితా;
తేన చిత్తప్పసాదేన, దుగ్గతిం సో న గచ్ఛతి.
౧౬. ‘‘స్వాగతం వత మే ఆసి, బుద్ధసేట్ఠస్స సన్తికే;
విహఙ్గమేన సన్తేన, సుబీజం రోపితం మయా.
౧౭. ‘‘ఏకనవుతితో కప్పే, యం పుప్ఫమభిరోపయిం;
దుగ్గతిం నాభిజానామి, బుద్ధపూజాయిదం [పుప్ఫపూజాయిదం (సీ.)] ఫలం.
౧౮. ‘‘సుచారుదస్సనా నామ, అట్ఠేతే ఏకనామకా;
కప్పే సత్తరసే ఆసుం, చక్కవత్తీ మహబ్బలా.
౧౯. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా పచ్చాగమనియో థేరో ఇమా గాథాయో అభాసిత్థాతి.
పచ్చాగమనియత్థేరస్సాపదానం తతియం.
౪. పరప్పసాదకత్థేరఅపదానం
౨౦. ‘‘ఉసభం పవరం వీరం, మహేసిం విజితావినం;
సువణ్ణవణ్ణం సమ్బుద్ధం, కో దిస్వా నప్పసీదతి.
౨౧. ‘‘హిమవావాపరిమేయ్యో, సాగరోవ దురుత్తరో;
తథేవ ఝానం బుద్ధస్స, కో దిస్వా నప్పసీదతి.
౨౨. ‘‘వసుధా యథాప్పమేయ్యా, చిత్తా వనవటంసకా;
తథేవ సీలం బుద్ధస్స, కో దిస్వా నప్పసీదతి.
౨౩. ‘‘అనిలఞ్జసాసఙ్ఖుబ్భో [అనిలజోవ అసఙ్ఖోభో (సీ.)], యథాకాసో అసఙ్ఖియో;
తథేవ ఞాణం బుద్ధస్స, కో దిస్వా నప్పసీదతి.
౨౪. ‘‘ఇమాహి చతుగాథాహి, బ్రాహ్మణో సేనసవ్హయో;
బుద్ధసేట్ఠం థవిత్వాన, సిద్ధత్థం అపరాజితం.
౨౫. ‘‘చతున్నవుతికప్పాని, దుగ్గతిం నుపపజ్జథ;
సుగతిం సుఖసమ్పత్తిం [సుగతీసు సుసుమ్పత్తిం (సీ. స్యా.)], అనుభోసిమనప్పకం.
౨౬. ‘‘చతున్నవుతితో కప్పే, థవిత్వా లోకనాయకం;
దుగ్గతిం నాభిజానామి, థోమనాయ [థోమనస్స (స్యా.)] ఇదం ఫలం.
౨౭. ‘‘చాతుద్దసమ్హి కప్పమ్హి, చతురో ఆసుముగ్గతా;
సత్తరతనసమ్పన్నా, చక్కవత్తీ మహబ్బలా.
౨౮. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా పరప్పసాదకో థేరో ఇమా గాథాయో అభాసిత్థాతి.
పరప్పసాదకత్థేరస్సాపదానం చతుత్థం.
౫. భిసదాయకత్థేరఅపదానం
౨౯. ‘‘వేస్సభూ నామ నామేన, ఇసీనం తతియో అహు;
కాననం వనమోగయ్హ, విహాసి పురిసుత్తమో.
౩౦. ‘‘భిసముళాలం గణ్హిత్వా, అగమం బుద్ధసన్తికం;
తఞ్చ బుద్ధస్స పాదాసిం, పసన్నో సేహి పాణిభి.
౩౧. ‘‘కరేన చ పరామట్ఠో, వేస్సభూవరబుద్ధినా;
సుఖాహం నాభిజానామి, సమం తేన కుతోత్తరిం.
౩౨. ‘‘చరిమో వత్తతే మయ్హం, భవా సబ్బే సమూహతా;
హత్థినాగేన సన్తేన, కుసలం రోపితం మయా [నాగోవ బన్ధనం ఛేత్వా, విహరామి అనాసవో (స్యా.)].
౩౩. ‘‘ఏకత్తింసే ఇతో కప్పే, యం కమ్మమకరిం తదా;
దుగ్గతిం నాభిజానామి, భిసదానస్సిదం ఫలం.
౩౪. ‘‘సమోధానా చ రాజానో, సోళస మనుజాధిపా;
కప్పమ్హి చుద్దసే [తేరసే (సీ. స్యా.)] ఆసుం, చక్కవత్తీ మహబ్బలా.
౩౫. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా భిసదాయకో థేరో ఇమా గాథాయో అభాసిత్థాతి.
భిసదాయకత్థేరస్సాపదానం పఞ్చమం.
౬. సుచిన్తితత్థేరఅపదానం
౩౬. ‘‘గిరిదుగ్గచరో ఆసిం, అభిజాతోవ కేసరీ;
మిగసఙ్ఘం వధిత్వాన, జీవామి పబ్బతన్తరే.
౩౭. ‘‘అత్థదస్సీ తు భగవా, సబ్బఞ్ఞూ వదతం వరో;
మముద్ధరితుకామో సో, ఆగచ్ఛి పబ్బతుత్తమం.
౩౮. ‘‘పసదఞ్చ మిగం హన్త్వా, భక్ఖితుం సముపాగమిం;
భగవా తమ్హి సమయే, భిక్ఖమానో [సిక్ఖాచారో (స్యా.)] ఉపాగమి.
౩౯. ‘‘వరమంసాని పగ్గయ్హ, అదాసిం తస్స సత్థునో;
అనుమోది మహావీరో, నిబ్బాపేన్తో మమం తదా.
౪౦. ‘‘తేన చిత్తప్పసాదేన, గిరిదుగ్గం పవిసిం అహం;
పీతిం ఉప్పాదయిత్వాన, తత్థ కాలఙ్కతో అహం.
౪౧. ‘‘ఏతేన మంసదానేన, చిత్తస్స పణిధీహి చ;
పన్నరసే కప్పసతే, దేవలోకే రమిం అహం.
౪౨. ‘‘అవసేసేసు కప్పేసు, కుసలం చిన్తితం [నిచితం (సీ.), కరితం (స్యా.)] మయా;
తేనేవ మంసదానేన, బుద్ధానుస్సరణేన చ.
౪౩. ‘‘అట్ఠత్తింసమ్హి కప్పమ్హి, అట్ఠ దీఘాయునామకా;
సట్ఠిమ్హితో కప్పసతే, దువే వరుణనామకా [సరణనామకా (స్యా.)].
౪౪. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా సుచిన్తితో థేరో ఇమా గాథాయో అభాసిత్థాతి.
సుచిన్తితత్థేరస్సాపదానం ఛట్ఠం.
౭. వత్థదాయకత్థేరఅపదానం
౪౫. ‘‘పక్ఖిజాతో తదా ఆసిం, సుపణ్ణో గరుళాధిపో;
అద్దసం విరజం బుద్ధం, గచ్ఛన్తం గన్ధమాదనం.
౪౬. ‘‘జహిత్వా గరుళవణ్ణం, మాణవకం అధారయిం;
ఏకం వత్థం మయా దిన్నం, ద్విపదిన్దస్స తాదినో.
౪౭. ‘‘తఞ్చ దుస్సం పటిగ్గయ్హ, బుద్ధో లోకగ్గనాయకో;
అన్తలిక్ఖే ఠితో సత్థా, ఇమా గాథా అభాసథ.
౪౮. ‘‘‘ఇమినా వత్థదానేన, చిత్తస్స పణిధీహి చ;
పహాయ గరుళం యోనిం, దేవలోకే రమిస్సతి’.
౪౯. ‘‘అత్థదస్సీ తు భగవా, లోకజేట్ఠో నరాసభో;
వత్థదానం పసంసిత్వా, పక్కామి ఉత్తరాముఖో.
౫౦. ‘‘భవే నిబ్బత్తమానమ్హి, హోన్తి మే వత్థసమ్పదా;
ఆకాసే ఛదనం హోతి, వత్థదానస్సిదం ఫలం.
౫౧. ‘‘అరుణవా [అరుణకా (సీ.), అరుణసా (స్యా.)] సత్త జనా, చక్కవత్తీ మహబ్బలా;
ఛత్తింసతిమ్హి ఆసింసు, కప్పమ్హి మనుజాధిపా.
౫౨. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా వత్థదాయకో థేరో ఇమా గాథాయో అభాసిత్థాతి.
వత్థదాయకత్థేరస్సాపదానం సత్తమం.
౮. అమ్బదాయకత్థేరఅపదానం
౫౩. ‘‘అనోమదస్సీ భగవా, నిసిన్నో పబ్బతన్తరే;
మేత్తాయ అఫరి లోకే, అప్పమాణే నిరూపధి.
౫౪. ‘‘కపి అహం తదా ఆసిం, హిమవన్తే నగుత్తమే;
దిస్వా అనోమదస్సిం తం [అనోమం అమితం (సీ.), అనోమమధితం (స్యా.)], బుద్ధే చిత్తం పసాదయిం.
౫౫. ‘‘అవిదూరే హిమవన్తస్స, అమ్బాసుం ఫలినో తదా;
తతో పక్కం గహేత్వాన, అమ్బం సమధుకం అదం.
౫౬. ‘‘తం మే బుద్ధో వియాకాసి, అనోమదస్సీ మహాముని;
ఇమినా మధుదానేన, అమ్బదానేన చూభయం.
౫౭. ‘‘సత్తపఞ్ఞాసకప్పమ్హి, దేవలోకే రమిస్సతి;
అవసేసేసు కప్పేసు, వోకిణ్ణం సంసరిస్సతి.
౫౮. ‘‘ఖేపేత్వా పాపకం కమ్మం, పరిపక్కాయ బుద్ధియా;
వినిపాతమగన్త్వాన, కిలేసే ఝాపయిస్సతి.
౫౯. ‘‘దమేన ఉత్తమేనాహం, దమితోమ్హి మహేసినా;
పత్తోమ్హి అచలం ఠానం, హిత్వా జయపరాజయం.
౬౦. ‘‘సత్తసత్తతికప్పసతే, అమ్బట్ఠజసనామకా;
చతుద్దస తే రాజానో, చక్కవత్తీ మహబ్బలా.
౬౧. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా అమ్బదాయకో థేరో ఇమా గాథాయో అభాసిత్థాతి.
అమ్బదాయకత్థేరస్సాపదానం అట్ఠమం.
౯. సుమనత్థేరఅపదానం
౬౨. ‘‘సుమనో నామ నామేన, మాలాకారో అహం తదా;
అద్దసం విరజం బుద్ధం, లోకాహుతిపటిగ్గహం.
౬౩. ‘‘ఉభో హత్థేహి పగ్గయ్హ, సుమనం పుప్ఫముత్తమం;
బుద్ధస్స అభిరోపేసిం, సిఖినో లోకబన్ధునో.
౬౪. ‘‘ఇమాయ పుప్ఫపూజాయ, చేతనాపణిధీహి చ;
దుగ్గతిం నాభిజానామి, బుద్ధపూజాయిదం ఫలం.
౬౫. ‘‘ఏకత్తింసే ఇతో కప్పే, యం పుప్ఫమభిరోపయిం;
దుగ్గతిం నాభిజానామి, బుద్ధపూజాయిదం [పుప్ఫపూజాయిదం (సీ.)] ఫలం.
౬౬. ‘‘ఛబ్బీసతిమ్హి కప్పమ్హి, చత్తారోసుం మహాయసా;