౧౦. పుప్ఫచఙ్కోటియత్థేరఅపదానం

౬౮. ‘‘అభీతరూపం సీహంవ, గరుళగ్గంవ పక్ఖినం;

బ్యగ్ఘూసభంవ పవరం, అభిజాతంవ కేసరిం.

౬౯. ‘‘సిఖిం తిలోకసరణం, అనేజం అపరాజితం;

నిసిన్నం సమణానగ్గం, భిక్ఖుసఙ్ఘపురక్ఖతం.

౭౦. ‘‘చఙ్కోటకే [చఙ్గోటకే (సీ.)] ఠపేత్వాన, అనోజం పుప్ఫముత్తమం;

సహ చఙ్కోటకేనేవ, బుద్ధసేట్ఠం సమోకిరిం.

౭౧. ‘‘తేన చిత్తప్పసాదేన, ద్విపదిన్ద నరాసభ;

పత్తోమ్హి అచలం ఠానం, హిత్వా జయపరాజయం.

౭౨. ‘‘ఏకత్తింసే ఇతో కప్పే, యం కమ్మమకరిం తదా;

దుగ్గతిం నాభిజానామి, బుద్ధపూజాయిదం ఫలం.

౭౩. ‘‘సమ్పుణ్ణే తింసకప్పమ్హి, దేవభూతిసనామకా;

సత్తరతనసమ్పన్నా, పఞ్చాసుం చక్కవత్తినో.

౭౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పుప్ఫచఙ్కోటియో థేరో ఇమా గాథాయో అభాసిత్థాతి.

పుప్ఫచఙ్కోటియత్థేరస్సాపదానం దసమం.

సకచిన్తనియవగ్గో సత్తమో.