౪. పరప్పసాదకత్థేరఅపదానం

౨౦. ‘‘ఉసభం పవరం వీరం, మహేసిం విజితావినం;

సువణ్ణవణ్ణం సమ్బుద్ధం, కో దిస్వా నప్పసీదతి.

౨౧. ‘‘హిమవావాపరిమేయ్యో, సాగరోవ దురుత్తరో;

తథేవ ఝానం బుద్ధస్స, కో దిస్వా నప్పసీదతి.

౨౨. ‘‘వసుధా యథాప్పమేయ్యా, చిత్తా వనవటంసకా;

తథేవ సీలం బుద్ధస్స, కో దిస్వా నప్పసీదతి.

౨౩. ‘‘అనిలఞ్జసాసఙ్ఖుబ్భో [అనిలజోవ అసఙ్ఖోభో (సీ.)], యథాకాసో అసఙ్ఖియో;

తథేవ ఞాణం బుద్ధస్స, కో దిస్వా నప్పసీదతి.

౨౪. ‘‘ఇమాహి చతుగాథాహి, బ్రాహ్మణో సేనసవ్హయో;

బుద్ధసేట్ఠం థవిత్వాన, సిద్ధత్థం అపరాజితం.

౨౫. ‘‘చతున్నవుతికప్పాని, దుగ్గతిం నుపపజ్జథ;

సుగతిం సుఖసమ్పత్తిం [సుగతీసు సుసుమ్పత్తిం (సీ. స్యా.)], అనుభోసిమనప్పకం.

౨౬. ‘‘చతున్నవుతితో కప్పే, థవిత్వా లోకనాయకం;

దుగ్గతిం నాభిజానామి, థోమనాయ [థోమనస్స (స్యా.)] ఇదం ఫలం.

౨౭. ‘‘చాతుద్దసమ్హి కప్పమ్హి, చతురో ఆసుముగ్గతా;

సత్తరతనసమ్పన్నా, చక్కవత్తీ మహబ్బలా.

౨౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పరప్పసాదకో థేరో ఇమా గాథాయో అభాసిత్థాతి.

పరప్పసాదకత్థేరస్సాపదానం చతుత్థం.