౯. పదుమత్థేరఅపదానం

౬౭. ‘‘చతుసచ్చం పకాసేన్తో, వరధమ్మప్పవత్తకో;

వస్సతే [వస్సేతి (?)] అమతం వుట్ఠిం, నిబ్బాపేన్తో మహాజనం.

౬౮. ‘‘సధజం [సదణ్డం (సీ.)] పదుమం గయ్హ, అడ్ఢకోసే ఠితో అహం;

పదుముత్తరమునిస్స, పహట్ఠో ఉక్ఖిపిమమ్బరే.

౬౯. ‘‘ఆగచ్ఛన్తే చ పదుమే, అబ్భుతో ఆసి తావదే;

మమ సఙ్కప్పమఞ్ఞాయ, పగ్గణ్హి వదతం వరో.

౭౦. ‘‘కరసేట్ఠేన పగ్గయ్హ, జలజం పుప్ఫముత్తమం;

భిక్ఖుసఙ్ఘే ఠితో సత్థా, ఇమా గాథా అభాసథ.

౭౧. ‘‘‘యేనిదం పదుమం ఖిత్తం, సబ్బఞ్ఞుమ్హి వినాయకే [సబ్బఞ్ఞుతమనాయకే (స్యా. క.)];

తమహం కిత్తయిస్సామి, సుణాథ మమ భాసతో.

౭౨. ‘‘‘తింసకప్పాని దేవిన్దో, దేవరజ్జం కరిస్సతి;

పథబ్యా రజ్జం సత్తసతం, వసుధం ఆవసిస్సతి.

౭౩. ‘‘‘తత్థ పత్తం గణేత్వాన, చక్కవత్తీ భవిస్సతి;

ఆకాసతో పుప్ఫవుట్ఠి, అభివస్సిస్సతీ తదా.

౭౪. ‘‘‘కప్పసతసహస్సమ్హి, ఓక్కాకకులసమ్భవో;

గోతమో నామ నామేన, సత్థా లోకే భవిస్సతి.

౭౫. ‘‘‘తస్స ధమ్మేసు దాయాదో, ఓరసో ధమ్మనిమ్మితో;

సబ్బాసవే పరిఞ్ఞాయ, నిబ్బాయిస్సతినాసవో’.

౭౬. ‘‘నిక్ఖమిత్వాన కుచ్ఛిమ్హా, సమ్పజానో పతిస్సతో;

జాతియా పఞ్చవస్సోహం, అరహత్తం అపాపుణిం.

౭౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పదుమో థేరో ఇమా గాథాయో అభాసిత్థాతి.

పదుమత్థేరస్సాపదానం నవమం.